මහනුවරදී දැක්වූ ජනපති ගෞරවය
මෙරට වාමාංශික දේශපාලන ධාරාවේ සහ ප්‍රජාතන්ත්‍රවාදී අරගලයේ පුරෝගාමී මෙහෙවරක් ඉටුකළ ජ්‍යෙෂ්ඨ නීතිඥ ලාල් විජේනායක මහතාගේ දේහය තැන්පත් කර ඇති මහනුවර පෞද්ගලික මල්ශාලාව වෙත ජනාධිපති අනුර කුමාර දිසානායක මහතා අද පස්වරුවේ පැමිණියේය.
දේහයට අවසන් ගෞරව පුදකළ ජනාධිපතිවරයා, පවුලේ ඥාතීන් සමඟ සුහදව කතාබහ කරමින් සිය සාතිශය සංවේගය පළ කළ බව ජනාධිපති මාධ්‍ය අංශය තහවුරු කරයි.
මෙම අවස්ථාවට මධ්‍යම පළාත් ආණ්ඩුකාර විශේෂඥ වෛද්‍ය හර්ෂ සුරංග මහතා මෙන්ම නියෝජ්‍ය අමාත්‍ය වෛද්‍ය ප්‍රසන්න ගුණසේන මහතා ඇතුළු මහජන නියෝජිතයින් පිරිසක් ද එක්ව සිටියහ.
ආණ්ඩුක්‍රම ව්‍යවස්ථා ප්‍රතිසංස්කරණයේ ප්‍රමුඛ හඬ
ලාල් විජේනායක මහතා මෙරට දේශපාලන හා නීති ක්ෂේත්‍රය තුළ වඩාත්ම ඇගයීමට ලක්වූයේ ආණ්ඩුක්‍රම ව්‍යවස්ථා ප්‍රතිසංස්කරණ වෙනුවෙන් නොසැලී පෙනී සිටි නීති විශාරදයෙකු වශයෙනි.
2015 වසරේ ස්ථාපිත කළ ආණ්ඩුක්‍රම ව්‍යවස්ථා ප්‍රතිසංස්කරණ පිළිබඳ මහජන අදහස් විමසීමේ කමිටුවේ සභාපතිවරයා ලෙස පත්කරනු ලැබුවේ ඒ මහතායි.
දිවයින පුරා සංචාරය කරමින් විවිධ ජනකොටස්වල අදහස් හා යෝජනා එක්රැස් කර සකස් කළ 'විජේනායක කමිටු වාර්තාව', ශ්‍රී ලංකාවේ ප්‍රජාතන්ත්‍රවාදය සහ බලය බෙදීම පිළිබඳ සංවාදයේ සුවිශේෂී නෛතික ලියවිල්ලක් ලෙස ඉතිහාසයට එක්විය.
දශක ගණනාවක වාමාංශික දේශපාලන ගමන්මග
නීතිඥ වෘත්තියෙන් ඔබ්බට ගිය ඒ මහතා, ලංකා සමසමාජ පක්ෂයේ ක්‍රියාකාරී දේශපාලනය හරහා සිය පොදුජන මෙහෙවර ආරම්භ කළ විද්වතෙකි.
පසුව ප්‍රගතිශීලී දේශපාලන බලවේග ඒකාබද්ධ කරමින් බිහිකළ එක්සත් වාමාංශික පෙරමුණේ ප්‍රධාන ලේකම් ධුරය හොබවමින් වාමාංශික කඳවුරේ මතවාදී නායකත්වය සැපයීමට ඔහු කැපවී කටයුතු කළේය.
ජාතික ජන බලවේගයේ ආරම්භක යුගයේ සිටම එහි ප්‍රතිපත්ති සම්පාදනයට මෙන්ම නීති කටයුතුවලට සුවිශේෂී දායකත්වයක් සැපයූ විජේනායක මහතා, අභාවප්‍රාප්ත වන තෙක්ම එහි ජාතික විධායක සභාව නියෝජනය කරමින් සක්‍රීය භූමිකාවක නිරත විය.
සබැඳි පුවත : නීතිඥ ලාල් විජේනායක දිවි සැරිය නිම කරයි - The Leader