පාරිභෝගික සුරක්ෂිතතාව වෙනුවෙන් 2003 අංක 9 දරන පනතේ ප්‍රතිපාදන යටතේ අතිවිශේෂ ගැසට් නිවේදනයක්
ශ්‍රී ලංකා ප්‍රමිති ආයතනයේ (SLSI) වලංගු නිෂ්පාදන ප්‍රමිති සහතික ලාංඡනය නොමැති සනීපාරක්ෂක තුවා වෙළෙඳපොළට නිකුත් කිරීම, ප්‍රවාහනය සහ අලෙවි කිරීම සම්පූර්ණයෙන්ම තහනම් කරමින් පාරිභෝගික කටයුතු පිළිබඳ අධිකාරිය (CAA) විසින් අතිවිශේෂ ගැසට් නිවේදනයක් නිකුත් කර තිබේ.
පාරිභෝගික සුරක්ෂිතතාවය සහ නිෂ්පාදනවල ගුණාත්මකභාවය ඉහළ නැංවීමේ අරමුණින් ක්‍රියාත්මක කරනු ලබන මෙම නව රෙගුලාසි මාලාව 2026 ඔක්තෝබර් මස 08 වැනිදා සිට දිවයින පුරා නිල වශයෙන් බලපැවැත්වෙන බව එම දෙපාර්තමේන්තුව නිවේදනය කරයි.
දේශීයව නිෂ්පාදනය කරනු ලබන හෝ විදේශයන්ගෙන් මෙරටට ආනයනය කරනු ලබන සියලුම වර්ගයේ සනීපාරක්ෂක තුවා සඳහා මෙම නව නියෝගය එකලෙස අදාළ වන බව එම නිවේදනයේ පැහැදිලිව දක්වා ඇත.
බලපැවැත්වෙන නිශ්චිත ප්‍රමිති කාණ්ඩ
පාරිභෝගික කටයුතු පිළිබඳ අධිකාරියේ වැඩබලන සභාපති එස්. එම්. ඩී. සූරියකුමාර ගේ අත්සනින් යුතුව නිකුත් කර ඇති මෙම ගැසට් නියෝගය ප්‍රධාන වශයෙන් නිෂ්පාදන කාණ්ඩ දෙකක් (02) යටතේ ක්‍රියාත්මක වේ:
SLS 1732 ප්‍රමිතිය:
SLS 1748 ප්‍රමිතිය:
මෙම අදාළ ප්‍රමිති සහතිකයන් නොමැති කිසිදු නිෂ්පාදනයක් මෙරට තුළ නිෂ්පාදනය කිරීම, ඇසිරීම, බෙදා හැරීම, ප්‍රවාහනය කිරීම, ගබඩා කිරීම, විකිණීම මෙන්ම විකිණීම සඳහා ප්‍රදර්ශනය කිරීම ද ඔක්තෝබර් 08 වැනිදායින් පසු නීතිවිරෝධී වරදක් ලෙස සලකනු ලබයි.
නෛතික පසුබිම සහ ආනයන පාලනය
මෙම විශේෂ නියෝගය නිකුත් කර ඇත්තේ 2003 අංක 9 දරන පාරිභෝගික කටයුතු පිළිබඳ අධිකාරිය පනතේ 12(2) වැනි වගන්තියෙන් පැවරී ඇති බලතල ප්‍රකාරවය. ශ්‍රී ලංකා ප්‍රමිති ආයතනය විසින් නිකුත් කරනු ලබන නිල SLS භාණ්ඩ සහතික ලාංඡනය සහිත නිෂ්පාදන පමණක් ඉදිරියේදී දේශීය වෙළෙඳපොළ තුළ සංසරණය විය යුතුය.
මීට අමතරව, විදේශ රටවලින් ආනයනය කරනු ලබන සනීපාරක්ෂක තුවා මෙරට වෙළෙඳපොළට නිකුත් කිරීමට පෙර, ශ්‍රී ලංකා ප්‍රමිති ආයතනය විසින් ක්‍රියාත්මක කරනු ලබන 'ආනයන පරීක්ෂණ යෝජනා ක්‍රමය' (Import Inspection Scheme) යටතේ අනිවාර්ය පරීක්ෂාවකට ලක් කර නිසි අනුමැතිය ලබාගත යුතු බව ද ගැසට් නිවේදනයේ සඳහන් වේ.
මෙම නීතිමය ප්‍රතිපාදන ක්‍රියාත්මක වීමත් සමඟ පාරිභෝගිකයින් තමන් මිලදී ගන්නා සනීපාරක්ෂක තුවා ඇසුරුම්වල වලංගු SLS ප්‍රමිති සහතික ලාංඡනය පවතින්නේ දැයි හොඳින් පරීක්ෂා කර බැලිය යුතු බව ද පාරිභෝගික කටයුතු පිළිබඳ අධිකාරිය වැඩිදුරටත් මහජනතාවගෙන් ඉල්ලා සිටී.
