ශ්‍රී ලංකාව සහ ලිතුවේනියාව අතර 30 වසරක රාජ්‍යතාන්ත්‍රික මිතුදම සනිටුහන් කරමින් එරට නියෝජ්‍ය විදෙස් ඇමතිවරයා මෙරට සංචාරයක නිරත විය. ඒ හරහා මෙරට තොරතුරු තාක්ෂණ, GovTech සහ අධ්‍යාපන ක්ෂේත්‍ර රැසකට යුරෝපීය හවුල්කාරිත්වයේ නව මංපෙත් විවර වේ.
ශ්‍රී ලංකාව සහ යුරෝපා සංගමයේ ප්‍රමුඛ සාමාජිකයකු වන ලිතුවේනියාව අතර නිල සබඳතා ඇරඹී ගෙවී ගිය දශක තුනක කාලය තුළ දෙරටේ සබඳතාව ඉහළම තලයකට ඔසවා තැබූ සංචාරයක් පසුගියදා කොළඹදී නිමාවට පත්විය. ඒ, ලිතුවේනියානු විදේශ කටයුතු නියෝජ්‍ය අමාත්‍ය විඩ්මන්තස් වර්බිකාස් (Vidmantas Verbickas) ගේ ප්‍රධානත්වයෙන් යුත් ඉහළ පෙළේ රාජ්‍ය දූත පිරිසකගේ පැමිණීමත් සමඟයි.
මෙම සංචාරය හුදෙක් රාජ්‍යතාන්ත්‍රික හමුවකට පමණක් සීමා නොවී, නවීන තාක්ෂණය, තොරතුරු පද්ධති සහ ද්විපාර්ශ්වික ආර්ථික ප්‍රතිලාභ කෙරෙහි සෘජුව යොමු වූ වැඩපිළිවෙළක් නිර්මාණය කිරීම විශේෂත්වයකි.
දේශපාලන උපදේශන යාන්ත්‍රණයකට අත්සන් තැබේ
විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍ර ගේ ආරාධනයෙන් සිදුවූ මෙම සංචාරයේදී දෙරට අතර නිල දේශපාලන උපදේශන පිළිබඳ අවබෝධතා ගිවිසුමකට (MoU) එළැඹිණි.
මෙම එකඟතාව හරහා එක්සත් ජාතීන්ගේ සංවිධානය ඇතුළු බහුපාර්ශ්වික ජාත්‍යන්තර වේදිකාවලදී දෙරටේ අන්‍යෝන්‍ය සහයෝගය තහවුරු කරගැනීමට මෙන්ම වෙළෙඳ, සංචාරක සහ ආයෝජන ප්‍රමුඛතා පිළිබඳව අඛණ්ඩ රාජ්‍ය මට්ටමේ සමාලෝචනයක් පවත්වාගෙන යාමට නිල රාමුවක් සකස් වී ඇත. විදේශ ලේකම් අරුණි රණරාජා ප්‍රමුඛ විදේශ අමාත්‍යාංශයේ නිලධාරීහු මෙම සාකච්ඡා සම්බන්ධීකරණය කළහ.
GovTech සහ FinTech: ලිතුවේනියානු අත්දැකීම් ලංකාවට
වර්තමාන ලෝකයේ රාජ්‍ය පරිපාලන ඩිජිටල්කරණය (GovTech) සහ මූල්‍ය තාක්ෂණය (FinTech) අතින් යුරෝපයේ කැපී පෙනෙන ඉදිරි පිම්මක් තැබූ රටක් ලෙස ලිතුවේනියාව ජාත්‍යන්තරයේ පිළිගැනීමට ලක්ව තිබේ.
ඩිජිටල් ආර්ථික නියෝජ්‍ය අමාත්‍ය (ඉංජිනේරු) එරංග වීරරත්න සමඟ පැවති හමුවේදී මෙන්ම GovTech ශ්‍රී ලංකා සහ ශ්‍රී ලංකා මෘදුකාංග හා සේවා සමාගම් සංගමය (SLASSCOM) සමඟ පැවති සාකච්ඡාවලදී ලිතුවේනියානු විශේෂඥ දැනුම මෙරටට ලබාගැනීම කෙරෙහි ප්‍රමුඛ අවධානය යොමු විය.
රාජ්‍ය සේවාවන් කඩිනම් කිරීම, මහජන සේවා ඩිජිටල්කරණය සහ කෘත්‍රිම බුද්ධිය (AI) භාවිතයෙන් දත්ත ආරක්ෂණය තහවුරු කිරීම සම්බන්ධයෙන් යුරෝපීය ප්‍රමිතීන්ට අනුකූල සහයෝගීතාවක් ගොඩනැගීමට මෙහිදී එකඟතාව පළ කෙරිණි. දේශීය තොරතුරු තාක්ෂණ ව්‍යවසායකයන්ට යුරෝපා වෙළෙඳපොළ සමඟ සෘජුව ගනුදෙනු කිරීමට මෙය මහඟු පිටුවහලකි.
අධ්‍යාපනය, පර්යේෂණ සහ වෘත්තීය අවස්ථා
දෙරට අතර සහයෝගීතාවයේ තවත් සංවේදී කලාපයක් වූයේ උසස් අධ්‍යාපන ක්ෂේත්‍රයයි. කොළඹ විශ්වවිද්‍යාලයේ උපකුලපති මහාචාර්ය ඉන්දික මහේෂ් කරුණාතිලක හමුවූ ලිතුවේනියානු නියෝජ්‍ය ඇමතිවරයා, ශ්‍රී ලාංකික සිසුන්, කථිකාචාර්යවරුන් සහ ජාත්‍යන්තර සබඳතා හදාරන්නන් අමතා විශේෂ දේශනයක් පැවැත්වීය.
විදෙස් නිරීක්ෂකයන් පෙන්වා දෙන්නේ, මෙරට තරුණ පරපුරට, පර්යේෂකයන්ට සහ වෘත්තිකයන්ට ලිතුවේනියානු රාජ්‍ය විශ්වවිද්‍යාල සහ තාක්ෂණ ආයතන හරහා පශ්චාත් උපාධි හා උසස් පර්යේෂණ අවස්ථා විවර කරගැනීමට මෙය පදනමක් සපයන බවයි.
සංස්කෘතික බැඳීම සහ දූත මණ්ඩල සත්කාරය
කොළඹ අලියොන්ස් ෆ්‍රොන්සේ (Alliance Française) ශ්‍රවණාගාරයේදී පැවති 30 වැනි සංවත්සර සංගීත ප්‍රසංගය දෙරටේ සංස්කෘතික සබඳතාව මැනවින් විදහා දැක්වීය. ප්‍රකට ලිතුවේනියානු පියානෝ වාදන ශිල්පිනී ඇලෙක්සැන්ඩ්‍රා කොල්පකොවයිටේ-ධර්මවර්ධන සහ ශ්‍රී ලාංකික වයලීන වාදන ශිල්පිනී ෂෙහානි ප්‍රනාන්දු එක්ව ඉදිරිපත් කළ සංගීත නිර්මාණ සහභාගී වූ රාජ්‍යතාන්ත්‍රිකයන්ගේ ඉහළ ඇගයීමට ලක්විය.
ශ්‍රී ලංකාවේ ලිතුවේනියානු තානාපතිනි ඩයනා මිස්කෙවිචිනේ ගේ මඟපෙන්වීම යටතේ කොළඹ පිහිටි ලිතුවේනියානු ගෞරවනීය කොන්සල් කාර්යාලය සහ ගෞරවනීය කොන්සල් ආර්. එම්. මනිවන්නන් (R. M. Manivannan) ඇතුළු කණ්ඩායම මෙම සංචාරයේ නිල හා ව්‍යාපාරික හමු සාර්ථක කරගැනීම වෙනුවෙන් සම්බන්ධීකරණය සැපයූහ.
වසර තිහක මිත්‍රත්වයේ අත්තිවාරම මත ගොඩනැගෙන මෙම නව රාජ්‍යතාන්ත්‍රික හා ආර්ථික ප්‍රවේශය, ඉදිරි කාලසීමාවේදී මෙරට තොරතුරු තාක්ෂණ ව්‍යාපාරික ක්ෂේත්‍රයට මෙන්ම යුරෝපා අධ්‍යාපන සිහින දකින දේශීය තරුණ ප්‍රජාවටද ප්‍රායෝගික වාසි රැසක් අත්කර දෙනු ඇතැයි අපේක්ෂා කෙරේ.