අදාළ සැකකරුවන් දෙදෙනා කෙසෙල්වත්ත පොලීසිය මගින් පෙරේදා (5) පස්වරුවේ අත්අඩංගුවට ගෙන අධිකරණයට ඉදිරිපත් කර ඇත.
එහිදී අදාළ සැකකරුවන් එළැඹෙන 13 වනදා දක්වා රක්ෂිත බන්ධනාගාර ගත කරන ලෙස කොළඹ මහේස්ත්‍රාත්වරයා අධිකරණය නියම කර තිබේ.
අලුත්කඩේ අධිකරණ සංකීර්ණය ආසන්නයේ පිහිටි සාංචි ආරච්චිවත්ත ප්‍රදේශයේ පදිංචි මොහොමඩ් රිස්වාන් සහ මොහොමඩ් ඉර්ෂාන් යන සැකකරුවන් දෙදෙනා මෙසේ රක්ෂිත බන්ධනාගාර ගත කෙරුණි.
මෙහිදී කෙසෙල්වත්ත පොලීසිය අධිකරණය හමුවේ කරුණු දක්වමින් මෙම සැකකරුවන් දෙදෙනා රිමාන්ඩ් බාරයේ සිටි කපිල චන්ද්‍රසේන ව නාඳුනන බවත්, රුපියල් 15000 බැගින් මුදල් ලබාගෙන ඇපකරුවන් වශයෙන් ඉදිරිපත් වී ඇති බව සඳහන් කළේය.
ඇප තැබීම සඳහා පැමිණි මෙම සැකකරුවන් සම්බන්ධයෙන් සැකසහිත තත්ත්වයක් ඇතිවීම හේතුවෙන්, අධිකරණ කාර්ය මණ්ඩලය කළ පැමිණිල්ලකට අනුව මොවුන් අත්අඩංගුවට ගත් බව පොලිසිය පැවසීය.
සැකකරුවන්ට නිශ්චිත රැකියාවක් හෝ ආදායම් මාර්ගයක් නැති බවත් විමර්ශනවලදී අනාවරණය වී තිබේ.
ඒ අනුව සැකකරුවන් ඉදිරි විමර්ශන සඳහා රක්ෂිත බන්ධනාගාර ගත කිරීමට නියම කළ කොළඹ අතිරේක මහෙස්ත්‍රාත් ලහිරු සිල්වා, ඇප තැබීම සඳහා මොවුන් ග්‍රාම නිලධාරි සහතික ලබා ගැනීම පිළිබඳ විමර්ශන සිදුකර වාර්තාවක් ඉදිරිපත් කරන ලෙසත් නියම කළේය.
ශ්‍රී ලංකන් ගුවන් සමාගමට එයාර් බස් ගුවන් යානා මිලදී ගැනීමේදී ඇමෙරිකානු ඩොලර් මිලියන 2 ක අල්ලසක් ලබා ගත්තේ යැයි කියන සිද්ධියක් සම්බන්ධයෙන් රක්ෂිත බන්ධනාගාර ගත කර සිටි එම සමාගමේ හිටපු ප්‍රධාන විධායක නිලධාරී කපිල චන්ද්‍රසේන ඇප මත මුදා හරින ලෙස කොළඹ මහේස්ත්‍රාත් අධිකරණය පෙරේදා (මැයි 5 වැනිදා) නියම කළේය.
කොළඹ ප්‍රධාන මහේස්ත්‍රාත් අසංග. එස්. බෝදරගම විසින් මෙම නියෝගය ප්‍රකාශයට පත් කරන ලදි.
ඒ අනුව සැකකරු රුපියල් ලක්ෂ 05 ක මුදල් ඇප සහ රුපියල් ලක්ෂ 100 බැගින් වූ ශරීර ඇප තුනක් මත මුදා හැරීමට නියෝග කෙරුණි.
සැකකරුගේ විදේශ ගමන් තහනම් කිරීමට ද නියෝග කළ මහේස්ත්‍රාත්වරයා ඔහුගේ විදේශ ගමන් බලපත්‍රය අධිකරණයට භාරදිය යුතු බවටත් නියෝග කළේය.
මෙම නඩුකරය ඉකුත් 28 වැනිදා කැඳවූ අවස්ථාවේදී සැකකාර කපිල චන්ද්‍රසේන වෙනුවෙන් පෙනී සිටි ජනාධිපති නීතිඥ රියන්සි අර්කුසලරත්න විසින් මෙම ඇප ඉල්ලීම ඉදිරිපත් කර තිබිණි.
(මුලාශ්‍රය - aruna)
