'මාර්ග ආරක්ෂණ සැලැස්ම 2025–2026' අවම පිරිවිතරයන්ට අනුකූලව මගී පහසුව සහ ආරක්ෂාව ඉහළ නැංවීම ප්‍රධාන ඉලක්කයයි
ශ්‍රී ලංකා ගමනාගමන මණ්ඩලයේ (ශ්‍රී ලංගම) නගරාන්තර හා දුරගමන් සේවාවන්හි ගුණාත්මකභාවය ඉහළ නැංවීම සහ මගීන්ට වඩාත් සුවපහසු ප්‍රවාහන සේවාවක් ලබාදීමේ අරමුණින්, වායුසමනය කළ (Deluxe මාදිලියේ) අතිනවීන බස් රථ 600ක් මිලදී ගැනීමට අමාත්‍ය මණ්ඩලයේ අනුමැතිය හිමිව තිබේ.
වැඩබලන ප්‍රවාහන, මහාමාර්ග සහ නාගරික සංවර්ධන අමාත්‍යවරයා විසින් ඉදිරිපත් කරන ලද අදාළ යෝජනාවට අමාත්‍ය මණ්ඩලය මෙලෙස අනුමැතිය ලබාදී ඇත.
ප්‍රතිපාදන සංශෝධනය සහ අලුත් පිරිවිතර
2026 වර්ෂයේ රජයේ ආයෝජන වැඩසටහන යටතේ ශ්‍රී ලංගමය වෙනුවෙන් ආසන 49 සිට 54 දක්වා ධාරිතාවකින් යුත් Standard මාදිලියේ නව බස් රථ 600ක් මිලදී ගැනීම සඳහා රුපියල් මිලියන 14,400ක අයවැය ප්‍රතිපාදන වෙන්කර තිබිණි.
කෙසේ වෙතත්, එකී ප්‍රතිපාදන වෙන් කිරීමෙන් අනතුරුව හඳුන්වා දෙන ලද 'මාර්ග ආරක්ෂණ සැලැස්ම 2025–2026' යටතේ මගී ප්‍රවාහනය සඳහා යොදාගනු ලබන බස් රථ විශේෂිත ආරක්ෂිත වාහන ලෙස හඳුනාගෙන ඇත. ඒ අනුව, නගරාන්තර හා දුරගමන් සේවා සඳහා භාවිතයට සුදුසු බස් රථවල අවම පිරිවිතර සකස් කරනු ලැබූ අතර, එම නව පිරිවිතරයන්ට අනුව අදාළ සේවාවන් සඳහා වායුසමනය කළ Deluxe මාදිලියේ බස් රථ යෙදවීම අත්‍යවශ්‍ය බවට නිර්දේශ කර තිබේ.
Deluxe බස් රථ ගෙන්වීමට අවසර
එම නිර්දේශ සැලකිල්ලට ගනිමින්, දැනටමත් වෙන්කර ඇති රුපියල් මිලියන 14,400ක ප්‍රතිපාදන සීමාව ඇතුළත සිටිමින්, Standard මාදිලියේ බස් රථ වෙනුවට මගීන්ට වඩාත් සුවපහසු සහ ආරක්ෂිත Deluxe මාදිලියේ වායුසමනය කළ බස් රථ 600 මිලදී ගැනීම සඳහා අවශ්‍ය ඉදිරි ප්‍රසම්පාදන පියවර ගැනීමට මෙලෙස කැබිනට් අනුමැතිය හිමිව ඇත.
මෙම නවීකරණ ව්‍යාපෘතිය හරහා දිවයින පුරා ඩිපෝ පද්ධතිය සවිමත් කරමින්, මාර්ග ආරක්ෂණ ප්‍රමිතීන්ට අනුකූලව ගුණාත්මක පොදු ප්‍රවාහන සේවාවක් ජනතාව වෙත සමීප කිරීමට රජය අපේක්ෂා කරයි.
