* ව්‍යාජ සමාගම් ජාලයේ 7 වන සැකකරු ලබන 01 දා තෙක් බන්ධනාගාරයට
භාණ්ඩ ආනයනය කිරීමේ මුවාවෙන් ව්‍යාජ සමාගම් පහක් පිහිටුවා, කිසිදු භාණ්ඩයක් මෙරටට නොගෙන්වා රුපියල් බිලියන 24.85කට අධික වටිනාකමකින් යුත් ඇමරිකානු ඩොලර් සංචිත විදේශ ගිණුම් වෙත යැවූ බව කියන සිද්ධියක් සම්බන්ධයෙන් අත්අඩංගුවට ගත් සැකකරුවකු ලබන ඔක්තෝබර් මස 01 වනදා දක්වා රක්ෂිත බන්ධනාගාර ගත කිරීමට කොළඹ ප්‍රධාන මහේස්ත්‍රාත් අසංග එස්. බෝදරගම අද නියෝග කළේය.
මෙසේ රක්ෂිත බන්ධනාගාර ගත කෙරුණේ කොළඹ 12, වේල්ලවීදිය ප්‍රදේශයේ පදිංචි 35 හැවිරිදි නෙයිනා මොහොමදු මොහොමඩ් නැමැත්තෙකි. පොලිස් මූල්‍ය අපරාධ විමර්ශන කොට්ඨාසය (FCID) විසින් වැල්ලම්පිටිය ප්‍රදේශයේදී මෙම සැකකරු අත්අඩංගුවට ගෙන අධිකරණය හමුවට ඉදිරිපත් කර තිබිණි.
රජයේ නීතිඥවරයා ඉදිරිපත් කළ කරුණු
නඩුව කැඳවූ අවස්ථාවේදී පැමිණිල්ල වෙනුවෙන් කරුණු දැක්වූ රජයේ ජ්‍යෙෂ්ඨ නීතිඥ ඔස්වල්ඩ් පෙරේරා අධිකරණය හමුවේ පෙන්වා දුන්නේ, මෙරට ලියාපදිංචි ව්‍යාජ සමාගම් 89ක් යොදාගනිමින් සංවිධානාත්මකව සිදු කෙරෙන මහා පරිමාණ විදේශ විනිමය පිටකිරීමේ ජාවාරමට අදාළ විමර්ශනයේ 7 වන සැකකරු ලෙස මොහු නම් කර ඇති බවයි.
මීට පෙර රක්ෂිත බන්ධනාගාර ගත කර සිටින මොහොමඩ් ජෙෆ්රි සහ මොහොමඩ් මුසාම්මිල් මොහොමඩ් ඉන්පාස් යන සැකකරුවන් හා සමානවම, මෙම සැකකරු ද 'ලකී බ්‍රැන්ඩ්' නමැති සමාගම ඇතුළු ව්‍යාජ සමාගම් 5ක් මෙහෙයවා ඇති බව නීතිඥවරයා සඳහන් කළේය. බැංකු නිලධාරීන් කිහිපදෙනෙකුගේ සහාය ද ඇතිව, කිසිදු ආනයනයක් සිදු නොකර ටෙලිග්‍රැෆික් ට්‍රාන්ස්ෆර් (TT) ක්‍රමය මඟින් විදේශයන් වෙත මෙම මුදල් බැර කර ඇති බව ද විමර්ශනවලදී හෙළිව තිබේ.
විමර්ශනයට ලක් වූ සමාගම් 89න් 72ක ක්‍රියාකාරීත්වය මීට පෙර අත්අඩංගුවට ගත් සැකකරුවන් සහ මොහු විසින් මෙහෙයවා ඇති බවත්, තවත් සමාගම් 5ක් සම්බන්ධයෙන් පරීක්ෂණ අවසන් කිරීමට නියමිත බවත් රජයේ නීතිඥවරයා කියා සිටියේය. සැකකරු සතු දේපළ සහ වාහන තෙවන පාර්ශව වෙත පවරා ඇති බවට තොරතුරු අනාවරණය වී ඇති හෙයින්, ඔහුට ඇප ලබාදුනහොත් විමර්ශනවලට බාධා සිදුවිය හැකි බැවින් ඇප ලබාදීමට තරයේ විරුද්ධ වන බව ද ඔහු අධිකරණයට දන්වා සිටියේය.
විත්තියේ නීතිඥ තර්කය
සැකකරු වෙනුවෙන් පෙනී සිටි නීතිඥ ප්‍රසාද් සිල්වා කරුණු දක්වමින් ප්‍රකාශ කළේ, සිය සේවාදායකයා පසුගිය නොවැම්බර් මාසයෙන් පසු කිසිදු මුදල් හුවමාරුවකට සම්බන්ධ වී නොමැති බවයි.
අදාළ සමාගම සම්බන්ධයෙන් රේගු දෙපාර්තමේන්තුව කළ සොයාගැනීම්වලින් අනතුරුව, සැකකරු රේගුවට මෙන්ම අපරාධ පරීක්ෂණ දෙපාර්තමේන්තුවට ද පූර්ණ සහයෝගය ලබාදී ඇති බව නීතිඥවරයා පැවසීය. මෙම ගනුදෙනුවලදී කොමිස් මුදලක් ලබාගැනීම හැර තම සේවාදායකයාට මහා පරිමාණ ලාභයක් අත්පත්ව නොමැති බව පෙන්වා දුන් නීතිඥවරයා, ඕනෑම කොන්දේසියක් යටතේ ඔහුට ඇප ලබාදෙන ලෙස ඉල්ලා සිටියේය.
දෙපාර්ශ්වයේම කරුණු දැක්වීම් සලකා බැලූ කොළඹ ප්‍රධාන මහේස්ත්‍රාත්වරයා, සිද්ධිය සම්බන්ධයෙන් වන විමර්ශන මෙතෙක් අවසන්ව නොමැති බැවින් සැකකරු ඔක්තෝබර් 01 වනදා දක්වා රක්ෂිත බන්ධනාගාර ගත කිරීමට නියෝග කළේය.
මූල්‍ය පද්ධතිය තුළ TT ක්‍රමයේ භාවිතය සහ පසුබිම
සාමාන්‍ය වෙළෙඳ ගනුදෙනුවලදී ටෙලිග්‍රැෆික් ට්‍රාන්ස්ෆර් (TT) හෙවත් විද්‍යුත් විගමන පැවරුම් ක්‍රමය යනු එක් බැංකුවක සිට තවත් විදේශීය බැංකු ගිණුමකට සෘජුවම මුදල් යවන කඩිනම් ක්‍රමවේදයකි. ව්‍යාපාරිකයන් භාණ්ඩ ඇණවුම් කිරීමේදී අත්තිකාරම් ගෙවීම් සඳහා මෙම ක්‍රමය බහුලව භාවිත කරනු ලබයි.
කෙසේ වෙතත්, භාණ්ඩ ඇණවුම් කළ බවට ව්‍යාජ බිල්පත් සහ ලේඛන බැංකු පද්ධතියට ඉදිරිපත් කරමින් රටින් ඩොලර් පිටකිරීමේ මෙම ක්‍රමවේදය හරහා මත්ද්‍රව්‍ය ජාවාරම්කරුවන්ගේ හෝ වෙනත් නීතිවිරෝධී උපයීම් විශුද්ධිකරණයට (Money Laundering) ලක් කෙරෙන්නේ ද යන්න පිළිබඳව ද මුදල් විශුද්ධිකරණය වැළැක්වීමේ පනත ප්‍රකාරව ආරක්ෂක අංශවල පුළුල් අවධානය යොමුව තිබේ. මෙරට බැංකු කිහිපයක නිලධාරීන් ද සම්බන්ධ කරගනිමින් සිදුව ඇතැයි පැවසෙන මෙම මහා පරිමාණ මුදල් හුවමාරු ජාලය පිළිබඳව මූල්‍ය අපරාධ විමර්ශන කොට්ඨාසය ඉදිරි පරීක්ෂණ මෙහෙයවයි.
සබැඳි පුවත් :
The Leader: රුපියල් බිලියන 24ක විදේශ විනිමය පිටරට පැටවූ සැකකරු FCID දැලේ
