එංගලන්ත සභාවේ නායකයට එහෙම ඉල්ලා අස්වෙන්න සිද්දවුණේ ජෝන් ස්මිත් කියන ළමා දූෂක පූජකයා ගැන හොඳින්ම දැනගෙනත් ඒ ගැන පොලිසියට පැමිණිලි කරන්නවත්, ඔහුට විරුද්ධව කිසිම නීතිමය පියවරක් ගන්නවත් අපොහොසත්වීම නිසා. කොටින්ම එංගලන්ත සභාව ඇතුළේ සිද්දවෙන මේ අපචාරය වසන් කරන්න කටයුතු කරපු නිසා.
කතෝලික සභාවේ හිටපු නායකයා, බෙනඩික්ට් පාප් වහන්සේ, වතිකාන ඉතිහාසයේ දෙවෙනි වතාවට පාප් පදවිය හැර ගියපු කෙනා බවට පත්වෙමින් ඉල්ලා අස් වුණෙත් සභාව ඇතුළෙ ඔඩු දුවපු ළමා ලිංගික අපචාර වසන් කරපු නිසා.
නමුත් ඔහුගේ අනුප්‍රාප්තිකයා, ෆ්‍රැන්සිස් පාප් වහන්සේ, කතෝලික පල්ලිය ඇතුළේ සිද්දවෙන ළමා අපචාරවලට විරුද්ධව සෘජුව පෙනී සිටිමින් ඒවා වළක්වන්නත් උත්සුක වුණා. ඒ නිසාම ෆ්‍රැන්සිස් පාප් වහන්සේගේ ධුර කාලයේදී ඕස්ට්‍රේලියාවේ ජෝර්ජ් පෙල් (Cardinal George Pell) කාදිනල්වරයා වගේ සභාවෙ ඉහළම පෙළේ නායකයින්ට සිර දඬුවම් පවා නියම වුනා.
ජස්ටින් වෙල්බි, බෙනඩික්ට් පාප් වහන්සේ, ෆ්‍රැන්සිස් පාප් වහන්සේ
එංගලන්ත සභාවේ සහ කතෝලික පල්ලියේ විතරක් නෙවෙයි, ලංකාවේ බෞද්ධ විහාරස්තානවලත් සිද්දවෙන ළමා අපචාර නිමක් නැහැ.
අවුරුදු ගාණකට කලින් බීබීසී සංදේශය වෙනුවෙන් මම කරපු ගවේෂණයකදී අනාවරණය වුණ විදියට, ළමා ආරක්ෂක අධිකාරිය විසින් දශකයක් ඇතුළත බෞද්ධ භික්ෂූන් 110 දෙනෙක් ළමා ලිංගික අපයෝජන හෝ ළමුන්ට පහරදීම් චෝදනා මත අත්අඩංගුවට අරගෙන තිබුණ. ඒත් ඒ අතරින් වැරදිකරුවන් වෙලා තිබුණෙ භික්ෂූන් තුන් දෙනෙක් විතරයි. ළමා ආරක්ෂක ක්‍රියාධරයෙක් මට කියපු විදියට, රාජපක්ෂ පාලනාධිකාරියෙන් එල්ලවුණ බලපෑම් නිසා ළමා අපයෝජන ගැන චෝදනා එල්ලවුණ සමහර භික්ෂූන් සාක්ෂි තිබුණත් නිදහස් කරන්නත් ඔවුන්ට සිද්දවෙලා තිබුණ.
සබැඳි ලිපිය
Sri Lanka's hidden scourge of religious child abuse
ළමා අපචාර වසන් කිරීම නිසා එංගලන්ත සභාවේ මහා නායකතුමාට (කැන්ටබරියේ අගරගුරු තුමා) පදවිය අහිමි වුණත්, කතෝලික සභාවේ මහා නායක තුමා (පාප් වහන්සේ) ළමා අපයෝජකයින්ට වැට බඳින පියවර ගත්තත්, බෞද්ධ මහා නායකවරුන්ගෙන් නම් මම දැක්කේ මේ අපචාර ගැන කන් බිහිරි කරවන තරමේ නිහඬ බවක්.
පහලගම සෝමරත්න නායක හිමි
ඒ නිහඬ බව කොයි තරම් ද කියනවා නම්, හත් අවුරුදු දැරියක අපයෝජනය කිරීම නිසා සිරගත කරලා, අද මේ වනතුරුත් බ්‍රිතාන්‍යයේ ළමා අපයෝජකයින්ගේ ලැයිස්තුවේ නම තියන පහලගම සෝමරත්න අදත් ගම්පහ පළාතේ නායක හිමිනමක් විදියට බෞද්ධ විහාරස්තාන භාරව කටයුතු කිරීම මහා නායක හිමිවරුන්ට ප්‍රශ්නයක් නෙවෙයි. අනික පහලගම සෝමරත්න ඒ දැරිය අපයෝජනය කළේ ලංකාවේදී නම් ඔහු කවදාවත් හිරේ නොවැටෙන්නත් ඉඩ තිබුණ.
ඒ වගේම තමයි ලංකාවේ කතෝලික සභාව..
එදා ළමා කටයුතු ඇමති තිස්ස කරලියද්ද මාත් එක්ක කියපු විදියට, ළමා අපයෝජන කියන්නේ බෞද්ධ සංස්ථාවේ විතරක් නෙවෙයි කතෝලික පල්ලිය පුරාත් පැතිරුණු පිළිකාවක්. 
ඒත් කාදිනල් මැල්කම් රංජිත් කවදාවත් කතෝලික පල්ලියේ ළමා අපචාර ගැන කතා කරනවා මම අහල නැහැ. ඒ වෙනුවට කාදිනල් තුමත්, බෞද්ධ මහා නායක හිමිවරුත්, දරුවන්ට ලිංගික අධ්‍යාපනය ලබාදීමට විරුද්ධ මැදගොඩ අභයතිස්ස වගේ අන්තවාදී හිමිවරුත් දැන් තමන්ට කිසිම දැනුමක් නැති සමලිංගික සම්බන්ධතා ගැන බිල්ලෙක් මවමින් ඉන්නවා.
සබැඳි ලිපිය
ළමා ලිංගික අපචාර: අපේ හතේ පොත සහ සය හැවිරිදි දැරිය ගැන 'දෙබිඩි පිළිවෙතක්'
ඒ වගේම කතෝලික සංස්ථාවේ ළමා අපචාර නොදැක්ක වගේ, ඇහුණේ නෑ වගේ ඉන්න කාදිනල් උන්නාන්සෙ ලංකාවේ සමලිංගික විවාහ නීතිගත කරන්න හදනවා කියල පට්ටපල් බොරුවක් කියමින් සැරෙන් සැරේ බිල්ලෝ මවනවා.
මුලින්ම මේක පැහැදිලිව කියන්න ඕනේ.
ළමා අපචාර කියන්නේ නීතියෙන් දඬුවම් කළ යුතු, ඒ වගේම සමාජයෙන් අතුගා දැමිය යුතු, පිළිකාවක්.
වැඩිහිටියන් දෙදෙනෙක් අතර සමලිංගික හෝ වෙනත් ඕනෑම ආකාරයක ලිංගික සම්බන්ධතාවයක් කියන්නේ ආණ්ඩුවට හෝ ආගමික සංස්ථාවලට අත ගහන්න අයිතියක් නැති, මානව අවශ්‍යතාවයක්. ලංකාව වගේ සමහර රටවල් යල් පැනගිය වික්ටෝරියානු බ්‍රිතාන්‍ය නීතියක් තියාගෙන සමලිංගික සම්බන්ධතා නීති විරෝධී කරලා තියන බව ඇත්ත. ඒ නීතිය තවදුරටත් තබාගෙන සිටීමත් 21 වෙනි ශතවර්ෂයේදී බරපතල මානව හිමිකම් උල්ලංඝනයක්.
මට මේ දීර්ඝ පූර්විකාව කරන්න හිතුණේ බෞද්ධ භික්ෂූන්ගෙන් සහ කාදිනල් තුමාගෙන් එල්ලවුණ විරෝධයත් එක්ක, LGBTQI ප්‍රජාවට නිදහසේ සංචාරය කරන්න පුළුවන් රටක් විදියට ලංකාව හඳුන්වල දෙමින් දියත් කරපු අලුත්ම සංචාරක ප්‍රවර්ධන ව්‍යාපෘතිය අත් හරින්න ආණ්ඩුව තීරණය කරපු බව දැකපු වෙලාවේ.
විශේෂයෙන්ම, ලංකාවේ සමලිංගික අයිතිවාසිකම් මුලින්ම පිළිගත්ත දේශපාලන පක්ෂයේ නායකයා, අනුර කුමාර දිසානායක ජනාධිපති තුමා මහානායක වරු හමුවෙලා ආණ්ඩුවේ එහෙම ප්‍රතිපත්තියක් නැහැ කියල පොරොන්දු වුණාම මට පුදුම හිතුණ.
මම හිතන විදියට ලංකාවේ ජනතාව අනුර සහෝදරයා ජනාධිපති පදවියට පත්කර ගත්තෙත්, තුනෙන් දෙකක බහුතරයකින් මාලිමාවට ආණ්ඩු බලය දුන්නෙත්, ඉතිහාසය පුරාම රටේ ප්‍රගමනයට වඩා අවගමනයට දායක වුණ ආගමික සංස්ථා - මහානායක හිමිවරු සහ කාදිනල් තුමා වගේ අය - එක්ක එකතුවෙලා ප්‍රගතිශීලී පියවර ආපස්සට තියන්න නෙවෙයි.
පුෂ්ප කුමාර කියල රට වැසියෝ හඳුන්වපු එක නායකයෙක් රටට කරපු විනාශය අපි දැක්ක.
දිනපතාම ප්‍රසිද්ධියේ පන්සල් වන්දනා කරන අතරේ, ප්‍රසිද්ධියේ "අපේ හාමුරුවනේ" කියල දේශනාව පටන් ගත්තත් රහසිගතව මහා නායකලට සුද්ද සිංහලෙන් අමතපු නායකයෝ රටේ සංස්කෘතියටත්, ආර්ථිකයටත් කරපු විනාශය අපි දැක්ක.
මම හිතන්නේ රටේ ජනතාව තවත් පුෂ්ප කුමාර කෙනෙක්වත්, මහ රජාණෝ කෙනෙක්වත් අනුරගෙන් බලාපොරොත්තු වුණේ නැහැ කියල. ඒ වගේම ඊළඟ මැතිවරණය ඔලුවේ තියාගෙන පන්සලට, පල්ලියට යටවෙලා ප්‍රගතිශීලී ප්‍රතිසංස්කරණ යටපත් කරන්න ජනතාව මාලිමාව පත්කර ගත්තේ නැහැ.
එතනදි ගතානුගතිකවාදී, අන්තවාදී ආගමික සංස්ථාවෙන් පමණක් නෙවෙයි, වෙනත් ඕනෑම බලවේගයකින් මතුවෙන බාධා බිඳගෙන ආණ්ඩුව ඉදිරියට යාවි කියන එකයි මම හිතන විදියට ජනතාවගේ බලාපොරෝත්තුව වුණේ.
විශේෂයෙන්ම අනුර සහෝදරයා බෞද්ධ මහානායකයින් සහ කාදිනල් තුමා වැනි පසුගාමී බලවේගවලට මේ විදියට යටවේවි කියල මම හිතන විදියට ජනතාව අපේක්ෂා කළේ නැහැ.
(සටහන | සරෝජ් පතිරණ)
බීබීසී හිටපු ජ්‍යෙෂ්ඨ සම්පාදක
sarojpathi@gmail.com
(Saroj Pathirana ෆේස්බුක් පිටුවෙන්...)
2025 ඔක්තෝබර් 06
