ඩීපක් යාදව් නමැති 49 හැවිරිදි පියා දියණියට වෙඩි තබා තිබෙන්නේ ගුරුග්‍රාම් පෙදෙසේ ඔවුන්ගේ නිවසේදී. 25 හැවිරිදි රාධිකා පුහුණුකාරියක ලෙස කටයුතු කිරීමට පෙර ජාත්‍යන්තර ටෙනිස් සම්මේලනය (ITF) මෙහෙයවන තරගමාලාවන් හි ඒකල හා යුගල ක්‍රීඩිකාවකව සිටියා.
තරුණ කාන්තාවක් පතරොම් තුවාලවලින් මිය ගිය බවට නගරයේ පෞද්ගලික රෝහලක් විසින් තමන්ට දැන්වූ බවත් තමන් රෝහලට යන විට එහි සිටියේ රාධිකාගේ මාමා කුල්ඩීප් යාදව් පමණක් වන අතර ඇගේ මාපියන් එහි නොසිටි බවත් ගුරුග්‍රාම් පොලිසිය පවසනවා.
කුල්ඩීප් පොලිසියට කළ පැමිණිල්ලට අනුව, පියා නැවත නැවත පෑ විරෝධය නොතකා දියණිය දිගටම නගරයේ ටෙනිස් ඇකඩමියක් පවත්වා ගෙන යාම පිළිබඳව ඔහු පසුවෙමින් සිටියේ මහත් අවුලෙන්.
ITF වෙඩ් අඩවියට අනුව, රාධිකා ඇයගේ ක්‍රීඩා දිවිය තුළ ITF අනුග්‍රහය යටතේ ඒකල තරග 36ක් සහ යුගල තරග 7ක් ක්‍රීඩා කර තිබෙනවා. ඇය අවසන් වතාවට ඒකල තරගයක් 2024 මාර්තු මාසයේ ද, යුගල තරගයක් 2023 වසරේ ජූනි මාසයේ ද ක්‍රීඩා කළා. ඇගේ අවසාන ජාත්‍යන්තර තරගයට ක්‍රීඩා කර වසරකට වැඩි කාලයක් ගෙවී ගොස් තිබුන ද ඇය ගුරුග්‍රාම් හි ඇගේ ඇකඩමියේ පුහුණුකාරියක ලෙස ක්‍රියා කර තිබෙනවා. මේ කාරණයයි ඇය සහ ඇගේ පියා අතර මතභේදයට හේතුව වී තිබෙන්නේ.
ඩීපක් කලක් තිස්සේ සසලව සිටියේ ඔහුගේ දියණියගේ ආදායම සම්බන්ධයෙන් ගම්වාසීන් ඔහුට ඇනුම් පද කියා අපහාස කිරීම නිසා. ඔවුන්ගේ මේ සරදම්වලින් ඔහු මහත් අපහසුවට පත්ව සිටියා. නිවසේ වැඩකටයුතු සිදුවන්නේ දුවගේ මුදලින් බවත් ඔහු ඇගෙන් යැපෙමින් සිටින බවත් කියමින් ගම්වාසීන් නිතරම ඔහුව සමච්ච්ලයට ලක්කර තිබෙනවා. ඔහු රාධිකා ට කිහිප අවස්ථාවකදීම ඇකඩමියේ වැඩකිරීම නතර කරන ලෙසට ඉල්ලා තිබුනත් ඇය එය ප්‍රතික්ෂේප කර තිබෙනවා. ඉවසීමේ සීමාව ඉක්මවා යාමෙන් පසුව පියා දුවට වෙඩි තබා ඇතැයි පොලිසිය කියනවා.
ඩීපක්ගේ ආදායම පැමිණියේ ඔහුට අයත් කුඩා දේපළ දෙකකින් ලැබෙන කුලියෙන් බව ද පොලිසිය සඳහන් කරනවා.
ඩීපක් ඔහු කළ අපරාධය පිළිගෙන තිබෙන බව වාර්තා වනවා. තමා දියණියගේ පිටුපසින් සිට තෙවතාවක් ඇයට වෙඩි තැබුවේ ඇය ඇකඩමිය වසා දමන ලෙසට තමා කළ ඉල්ලීම් ප්‍රතික්ෂේප කළ නිසා බව ඔහු පොලිසියට ප්‍රකාශ කර තිබෙනවා.
ඇගේ පිටේ වෙඩි උණ්ඩ තුනක් හා උරහිසේ තවත් උණ්ඩයක් තිබූ බවයි පශ්චාත් මරණ පරීක්ෂණයේදී තහවුරු වී තිබෙන්නේ.
රාධිකාගේ පිටුපසින් පැමිණ පියා ඇයට වෙඩි තබා තිබෙන්නේ ඇය නිවසේ ආහාර පිසිමින් සිටියදී බව පැවසෙනවා.
පරීක්ෂණ පැවැත්වෙද්දී හෙළිවී තිබෙන කරුණු අනුව රාධිකාගේ ටෙනිස් ක්‍රීඩාවට මුලදී සහාය දුන් පියා දියණියට ඇගේ ඇකඩමිය විවෘත කිරීම සඳහා රුපියල්‌ කෝටි දෙකක මුදලක් පවා ලබා දී තිබෙනවා. කෙසේ වෙතත් මෑතකදී තමා උපන් ගමට ගිය අවස්ථාවේදී ඩීපක් ට ගම්වාසීන් “ලජ්ජාවක් නැති පියෙක්” කියා සරදම් කර තිබෙනවා. ඉන් මහත් සිත්තැවුලට පත් ඔහු නැවත නිවසට පැමිණීමෙන් පසුව ටෙනිස් ඇකඩමිය වසා දමන ලෙසට රාධිකාගෙන් ඉල්ලා තිබෙනවා.
ඇය එම ඉල්ලීම ප්‍රතික්ෂේප කිරීම නිසා මහත් වේදනාවට පත් ඩීපක් දින තුනක් තිස්සේ සිය දිවි නසා ගැනීමට කල්පනා කිරීමෙන් පසුව අවසානයේ දියණියට වෙඩි තබා මරා දැමීමට තීරණය කළ බව පරීක්ෂණවලින් හෙළි වී තිබෙනවා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com