මීට හේතු වූයේ මේ පිලිපීන ප්‍රතිමාමය බොක්සිං සටන්කරුවා ලාස් වේගාස් හිදී සෙනසුරාදා ලෝක බොක්සිං කවුන්සලයේ වෙල්ටවේට් ශූරයා වන මාරියො බාරියොස් (Mario Barrios) සමග කළ සටන ජය පැරදුමෙන් තොරව අවසන් වීමයි.
30 හැවිරිදි බාරියොස් ඔහුගේ වෙල්ටවේට් කිරුළ රැකගත්තේ තරගයේ වට ගණනාවක්ම පකියාඋ ඔහුගේ ආධිපත්‍යය පවත්වා ගෙන ගොස් තිබියදී. මනී පකියාඋ නැවත බොක්සිං වළල්ලට පිවිසියේ වසර හතරක කාලයක් විශ්‍රාම ගොස් සිටීමෙන් පසුව වීම විශේෂත්වයක්.
තරගයේ එක් විනිසුරුවකු බාරියොස්ගේ වාසියට ලකුණු 115-113ක් ලබා දුන් අතර අනෙක් විනිසුරුවන් දෙදෙනා 114-114 බැගින් ලකුණු ලබා දී තිබුණා.
තරගයේ සමහර අවස්ථාවලදී පකියාඋ සිය වසර 30ක වෘත්තීය සටන් දිවියේ ඇදහිය නොහැකි තවත් පරිච්ඡේදයක් ලියනු ඇති බවක් ප්‍රදර්ශනය කරමින් ඔහුගේ සියලුම ප්‍රයෝග සහ පළපුරුද්ද බාරියොස්ව මෙල්ල කිරීම පිණිස භාවිතා කළා.
එහෙත් බාරියොස් කෙසේ හෝ අවසන් වට තුනේදී සටන්කාමීව තරග කරමින් තරගයේ දිගටම රැඳී සිටීමට සමත් වුණා.
අවසන් වරට ජයග්‍රහණයක් 2019 වසරේදී ලබා ගත් පකියාඋ, ටෙක්සාස්වලින් පැමිණි ඔහුට වඩා උසින් වැඩි ප්‍රතිවාදියා හමුවේ මේ තරගයේ ඉතාමත් දුර්වල ක්‍රීඩකයා ලෙස හඳුන්වා දී තිබුණා.
එහෙත් බර පංති අටක ශූරතා හිමිකර ගෙන සිටින යුගයේ වඩාත්ම ආදරයට ලක්වූ මේ පිලිපීන බොක්සිං සටන්කරුවා දීර්ඝ වේලාවක් සටන් කිරීමට තමන් තුළ අපහසුතාවක් නැති බව පෙන්නුම් කළා.
“මම තවමත් පකියාඋ ට හිස නමා ආචාර කරනවා” යනුවෙන් තරගයෙන් පසුව බාරියොස් පැවසුවා. “එයත් එක්ක බොක්සිං වළල්ල බෙදා ගැනීමට අවස්ථාවක් ලැබීම මා ලැබූ ගෞරවයක්. ඉතාමත් වැඩි පළපුරුද්දක් තියෙන ඔහු මේ ක්‍රීඩාවේ බොහෝ දේවල් සාර්ථක කරගෙන තිබෙනවා. අපි දෙන්නා ආදරය සහ ගෞරවය පමණක් ඉතිරි කරගෙන අන් සියල්ල බොක්සිං වළල්ලේ තියලා ආවා.”
මනී පකියාඋගේ තවමත් ඉතිරිව තිබෙන අපූර්ව ශක්තිය හා දරා ගැනීමේ හැකියාව පිළිබඳව තමා තුළ ගෞරව සම්ප්‍රයුක්ත බියක් ඇති වූ බව බාරියොස් පිළිගත්තා.
“ඔහුගේ ඔරොත්තු දීමේ ශක්තිය ගැන පිස්සු හැදෙනවා. ඔහුට තවමත් රිදෙන්න ගහන්න පුළුවනි. තවමත් හරිම ශක්තිමත්. ඔහුගේ ක්‍රියාකාරී චලනය හා රිද්මය සහ සියලු දේ අතිවිශිෂ්ටයි. ඔහු තවමත් තේරුම් ගැනීමට අපහසු අමාරුකාර සටන්කරුවෙක්!” යැයි බාරියොස් වැඩිදුරටත් සඳහන් කළා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
