බංග්ලාදේශයේ අංක 2 පිතිකරුවාගේ සිට පහළට අංක 8 පිතිකරුවා දක්වා වන කඩුලු හත බිඳ වැටුනේ ලකුණු පහක් පමණක් ඇතුළත.
මිනිත්තු 15ක් ඇතුළත සිදුවූ ODI ඉතිහාසයේ එක් වඩාත්ම අප්‍රසන්න කඩාවැටීමකදී බංග්ලාදේශය ලකුණු 100 ට කඩුලු 1 සිට ලකුණු 105 ට කඩුලු 8 දක්වා ලිස්සා වැටුනේ පන්දු 20ක් ඇතුළත.
දෙවැනි කඩුල්ලේ බිඳ වැටීමේ සිට අට වැනි කඩුල්ල දක්වා මෙවැනි අඩුම මුළු ලකුණු සංඛ්‍යාවක් වාර්තා වූ ප්‍රථම අවස්ථාවයි මේ.
මේ කඩාවැටීම සිදුකළේ වනිඳු හසරංග හා කමිඳු මෙන්ඩිස්.
මේ පන්දු යවන්නන් දෙදෙනා තුළ දඟ පන්දු යවන්නන් තිදෙනෙකු සිටියේ මෙන්ඩිස් වමතින් මෙන්ම දකුණතින් ද පන්දු යැවූ නිසා.
හසරංග සහ මෙන්ඩිස් පිළිවෙලින් කඩුලු හතරක් (10/4) සහ කඩුලු තුනක් (19/3) ලබා ගත් අතර ශ්‍රී ලංකා කණ්ඩායමේ පන්දු රැකීම ද ඉහළ මට්ටමක තිබුණා.
මිලාන් රත්නායකගේ නියම ඉලක්කයට පන්දුව විසිකිරීම හා ජනිත් ලියනගේ ප්‍රදර්ශනය කළ උඩ පන්දු රැකීම ද බංග්ලාදේශයේ කඩාවැටීමේ ගිනිපුපුරු විහිදුවීමට හේතුවක් වුණා.
ඊට පෙර නායක චරිත් අසලංක ශ්‍රී ලංකා ඉනිමට නැංගුරමක් වෙමින් ලබා ගත් ශතකය මත ඕවර 49.2කින් මුළු ලකුණු 244ක් වාර්තා වී තිබුණා. කඩුල්ලේ අනෙක් අන්තයෙන් සහායක් නොමැතිව අසලංක පන්දු 123කින් ලකුණු 106ක් රැස්කළේ හතරේ පහර හයක් සහ හයේ පහර හතරක් ද එල්ල කරමින්.
අසලංක ඔහුගේ සිවුවැනි ODI ශතකය වාර්තා කිරීමත් සමග ඔහු ඛෙත්තාරාම ක්‍රීඩාංගණයේ ලකුණු දහස ඉක්මවා ගියේ සනත් ජයසූරිය, විරාට් කෝලි සහ සචින් ටෙන්ඩුල්කාර් සමග සම තත්ත්වයට පිවිසෙමින්.
එම ඉලක්කය හඹා යාමේදී බංග්ලාදේශය ඕවර 35.5ක් ඇතුළත ලකුණු 167කට දැවී ගියේ ඔවුන්ට ලකුණු 77ක දැවැන්ත පරාජයක් අත්කර දෙමින්.
ශ්‍රී ලංකාව 244 - අසලංක 106, කුසල් මෙන්ඩිස් 45 (ටස්කින් 47/4, ටන්සිම් 46/3)
බංග්ලාදේශය 167 - ටන්සිඩ් 62, ජකිර් 51 (හසරංග 10/4, කමිඳු 19/3)
ඡායාරූප අනුග්‍රහය - ශ්‍රී ලංකා ක්‍රිකට්
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com