ඔහු ධුරයේ දිවුරුම් දීම අබියස ඩොලරය ශක්තිමත්ව, ආසියානු කොටස් වෙළඳපොළේ ද ධනාත්මක පැහැයක් දක්නට ඇතැයි, රොයිටර්ස් පුවත් සේවය පවසයි.
ග්‍රෙනෙච් වේලාවෙන් පැය 1700ට හෙවත් එක්සත් ජනපද වේලාවෙන් අද මධ්‍යාහ්න 12.00 ට ඔහු ධුරයේ දිවුරුම් දීමට නියමිතය. ධුරයේ දිවුරුම් දුන් වහා, ඔහු විසින් විධායක බලතල ප්‍රකාරව ඉතා වැදගත් අණ පනත් රැසක් සෘජුව ක්‍රියාත්මක කරනු ඇතැයි, අපේක්ෂා කෙරේ. එරට සංක්‍රමණිකයින් පිලිබඳ ගැටළුව එහි මුල් තැනක් ගනී. එක්සත් ජනපදයට සේන්දු වූ සංක්‍රමණිකයින් දස දහස් ගණනක් පිටුවහල් කිරීමට හෝ ආපසු හරවා යැවීමට නියමිතය. එය විශාල මුදලක් සහ වසර ගණනක් ගතවන කර්තව්‍යයක් ද වේ.
අද එක්සත් ජනපදයට, රජයේ නිවාඩු දිනයකි. එබැවින්, ජනපති ධුරයේ සමාරම්භය අබියස, සාම්ප්‍රදායික මූල්‍ය වෙළඳපොළ මත විදේශ විනිමය සංවේදීව දිස් වුවද, අද ප්‍රකාශයට පත් කිරීමට නියමිත ට්‍රම්ප් ගේ රාජ්‍ය බදු සහ ප්‍රතිපත්තිය පාදක කොට හෙට (21) සිට ආසියානු කොටස් වෙළඳපොළ නව ප්‍රවණතා හට ගනු ඇතැයි අපේක්ෂිතය.
අද උදෑසන ආසියානු කොටස් වෙළඳපොළ, එක්සත් ජනපද කොටස්හි ඇතැම් ශේශවල යම් හීනවීම් වාර්තා විය. එහෙත්, ට්‍රම්ප්ගේ ජනපතිවරණ ජය හමුවේ, ඉකුත් වසර අග භාගයේ සිට ඩොලරය ශක්තිමත්ව පවතී.
ජපානයේ තෝකියෝ කොටස් වෙළඳපොළ නික්කේ (Nikkei) දර්ශකය 1%කින් ඉහළ ගියේය. එක්සත් ජනපද කොටස් වෙළඳපොළ, එරට විශාලතම සමාගම් සියයේ ක්‍රියාකාරීත්වය පසුගිය නොවැම්බර මුල සිට සතිපතා වර්ධනය වෙමින් පවතී.
ඉකුත් සැප්තැම්බරයේ සිට යුරෝ ඒකකය මත ඩොලරයේ අගය 14%කින් ඉහළ ගොස් තිබේ.
නව ජනපතිවරයාගේ බලාත්මක ආර්ථික ප්‍රතිපත්ති ව්‍යුහය තුළ ඩොලරය තව දුරටත් ඉදිරියට ගමන් කරනු ඇතැයි මූල්‍ය විශ්ලේෂකයෝ පවසති.
ට්‍රම්ප් විසින් ගෙන ඒමට නියමිත ඇතැම් තීරු බදු තර්ජනාත්මක ස්වරූපයක් ගන්නේ නැත්තේම නොවේ. ගෝලීය ආනයන මත ක්‍රියාත්මක තීරුබදු ප්‍රතිශතය 10%කි. චීන ආනයන මත එය 60% දක්වා ඉතා ඉහළ අගයක පවතී. ඊට අමතරව කැනේඩියානු සහ මෙක්සිකානු භාණ්ඩ මත 25%ක අධි භාරයක් පැනවේ.
(REUTERS ඇසුරින් සටහන | හර්ෂ උදයකාන්ත විසිනි)
මූලාශ්‍ර: Dollar strong, stocks creep higher as second Trump term dawns