ඒ අනුව කොළඹ මැණික් වෙන්දේසියන්ට අමතරව තායිලන්තය, සිංගප්පූරුව, ජපානය, ඇමරිකාව ඇතුලු ලොව පිළිගත් මැණික් වෙළෙඳ පොළවල් වෙත මෙරට වෙළෙඳුන්ගේ මැණික් යොමු කිරිමට තමන් කටයුතු කරන බව ගෝලීය ප්‍රවර්ධන ජාත්‍යන්තරයේ ප්‍රධාන විධායක නිලධාරී ආචාර්ය තිලකසිරි විතාරණ ප්‍රකාශ කළේය.
මෙරට ආධුනික මැණික් වෙළෙඳුන්ට, පතල්කරුවන්ට මෙරටින් පිට මැණික් වෙළෙඳාම් කිරීමේ අත්දැකීම්, අවස්ථා සලසා දීම තමන් සිදු කරන බවද ඔහු කීය. ඒ අනුව ආධුනික මැණික් වෙළෙඳුන්ට විදේශ වෙළෙඳ පොළ වෙත ප්‍රවේශ වීමට ඉඩ කඩ සලසා දෙමින් එම අත්දැකීම ලබා ගැනීමට මෙන්ම තව දුරටත් මැණික් වෙළෙඳාම පිළිබඳව ගැඹුරින් කරුණු අධ්‍යයනය කිරීමට ඉඩකඩ සලසාදීම සිදුකරන බවද තිලකසිරි විතාරණ කීය.
රට රටවල මැණික් අලෙවි මධ්‍යස්ථාන සහ පුහුණු වැඩසටහන් වලට ශ්‍රී ලාංකික පිරිසට ඉඩ
මෙරටින් තෝරා ගනු ලබන ආධුනික මැණික් වෙළෙඳුන් පතල්කරුවන් පිරිසකගේ කණ්ඩායමක් මුලින්ම ලෝකයේ ජාත්‍යන්තර මැණික් අලෙවි මධ්‍යස්ථානයක් සේ ප්‍රකට තායිලන්තයේ තිබෙන ජාත්‍යන්තර මැණික් මධ්‍යස්ථානය වෙත රැගෙනයාමට කටයුතු කරන බවත් එය ලබන මස මැද වන විට ආරම්භ කිරීමට අපේක්ෂා කරන බවත් ප්‍රධාන විධායක නිලධාරීවරයා කීය.
මැණික් අලෙවිය සහ මැණික් සහ සම්බන්ධ සියලු කාර්යයන් පිළිබඳ පුහුණුවක් දේශීය හා විදේශීය විද්වත් උපදේශකවරුන්ගෙන් ලබා දීමද මෙමගින් බලාපොරොත්තුවේ.
කොළඹින් දුර බැහැර ප්‍රදේශවල මැණික් පතල්කරුවන්ට, සුළු හා මධ්‍යපරිමාණ මැණික් අලෙවිකරුවන්ට සහ මැණික් ගැනුම්කරුවන්ට වඩාත් සාධාරණ සහ ප්‍රමිතියෙන් ඉහළ මැණික් මිලදී ගැනීමට ඉඩකඩ ලබා දෙමින් පසුගිය මාස කිහිපය පුරා සිංහ ඔක්ෂන් සමාගම මැණික් පොළ සහ වෙන්දේසි රැසක් පවත්වා තිබේ.
එම අත්දැකීම් පාදක කර ගනිමින් ඉදිරියේදී පැවැත්වීමට ජාත්‍යන්තර මැණික් වෙළෙඳ පොළ දිනා ගැනීමට ශ්‍රී ලාංකික පිරිස් යොමු කිරීමේ කටයුතු සඳහා අනුග්‍රහකත්වය ලබා දීමට සිංහ ඔක්ෂන් සමාගම සූදානම්වී සිටී.
(සටහන | ජේ.මුණසිංහ)
