මෙරට වේදිකා නාට්ය කලාවේ ස්වර්ණමය යුගය වර්ණවත් කළ ප්රවීණ කලාකරුවන් පස්දෙනෙකුගේ අතීත මතකයන් සහ කලා දිවියේ රසමුසු තැන් යළි අවදි වූ අපූරු සංවාදයක් පසුගිය සෙනසුරාදා (21) TV සුප්රීම් නාලිකාව ඔස්සේ විකාශය විය.
‘කොච්චි’ විසින් ඉදිරිපත් කරන ‘එක රෑනේ කුරුල්ලෝ’ වැඩසටහනට මෙවර එක්ව සිටියේ නිශ්ශංක දිද්දෙණිය, විල්සන් ගුණරත්න, රත්නා ලාලනී ජයකොඩි, ප්රසන්නජිත් අබේසූරිය සහ ලාල් කුලරත්න යන ප්රවීණ කලාකරුවන් පස්දෙනාය.
වේදිකාවේ නොමැකෙන වාර්තා සහ අතීත මතක
මහාචාර්ය එදිරිවීර සරච්චන්ද්රයන්ගේ ‘සිංහබාහු’ නාට්යයේ සිංහබාහු චරිතය අඛණ්ඩව වසර 26ක් පුරා රඟපෑමේ අපූරු වාර්තාව ප්රවීණ රංගන ශිල්පී නිශ්ශංක දිද්දෙණිය මහතා මෙහිදී සිහිපත් කළේය.
පාසල් වියේදී සබරගමුව පළාත් ගායන තරගවලින් ජයග්රහණය කරමින් කලාවට පිවිසි ඔහු, ‘පේමතෝ ජායතී සෝකෝ’ නාට්යයෙන් ඇරඹි සිය වේදිකා ගමන ගැන ආවර්ජනය කළේය.
හොරණ විද්යාරත්න පිරිවෙනෙන් ලැබූ කලා ආභාෂය සිය ජීවිතය වෙනස් කළ ආකාරය ප්රවීණ රංගන ශිල්පී ලාල් කුලරත්න මහතා විස්තර කළේය. එවකට පාසල් වේදිකාව තුළ පවා ලෝක දේශපාලනය සහ ප්රජාතන්ත්රවාදය ගැන ගැඹුරින් කතා කළ ‘ආණ්ඩි ටිකයි අම්බලමයි’ සහ ‘සුදු වතාවට පස්සේ’ වැනි ප්රබුද්ධ නාට්ය බිහි වූ බව ඔහු පෙන්වා දුන්නේය.
හාස්යයේ ඖෂධීය ගුණය සහ දේශපාලන ප්රහසනය
දේශපාලන ප්රහසන රංගනය හරහා මෙරට ප්රේක්ෂකයන් අතර අතිශය ජනප්රිය වූ විල්සන් ගුණරත්න මහතා, හාස්යය යනු හුදු විහිළුවක් නොව මානසික ආතතිය දුරු කරන ඖෂධයක් බව පැහැදිලි කළේය.
තමන් අනුකරණය කළ ඇතැම් දේශපාලනඥයන් පවා සිය රංගනයන් නරඹා ඒවා අගය කළ ආකාරය ඔහු සිහිපත් කළේ උපහාසාත්මක රසයකිනි. ජීවිත තර්ජන පවා එල්ල වූ අවස්ථාවලදී වුවද සිය කලා භාවිතය අත්නොහැර කටයුතු කළ බව ඔහු සඳහන් කළේය.
ගුරු භූමිකාව සහ වීදි නාට්ය කලාව
වසර 21ක් පුරා කොළඹ රාජකීය විද්යාලයේ නාට්ය හා රංග කලාව උගන්වමින් නව පරපුරක් කලාවට දායාද කළ අත්දැකීම් රත්නා ලාලනී ජයකොඩි මහත්මිය බෙදා ගත්තාය. විද්යා හා ගණිත විෂයන් හදාරන සිසුන් පවා නාට්ය කාමරයට පැමිණ සිය මානසික ආතතිය සමනය කරගත් ආකාරය ඇය සතුටින් සිහිපත් කළාය.
සෞන්දර්ය කලා විශ්වවිද්යාලයේ ජ්යෙෂ්ඨ කථිකාචාර්ය ප්රසන්නජිත් අබේසූරිය මහතා වීදි නාට්ය කලාවේ සමාජ මෙහෙවර පිළිබඳව අදහස් දැක්වීය. රංගශාලාවලට නොපැමිණෙන ගම්බද ජනතාව වෙත ගොස් ඔවුන්ගේම ප්රශ්න සාකච්ඡා කිරීමට වීදි නාට්ය කලාව ඉතා ප්රබල මාධ්යයක් බව ඔහු පෙන්වා දුන්නේය.
කලාව ව්යාපාරයක් වීම පිළිබඳ විවේචනය
වර්තමාන වේදිකා නාට්ය ක්ෂේත්රය තුළ ඇතැම් පිරිස් කලාව හුදු මුදල් ඉපයීමේ ව්යාපාරයක් බවට පත් කරගෙන ඇති බවට මෙහිදී සංවාදයට ලක් විය.
අතීතයේ පැවති විනය, කැපවීම සහ ගුණාත්මකභාවය වෙනුවට අද වන විට පාසල් දර්ශන හරහා ප්රවේශපත්ර අලෙවි කිරීමේ වාණිජ අරමුණු මුල් වී ඇති බව ලාල් කුලරත්න මහතා පෙන්වා දුන්නේය. කලාවට පිවිසෙන නවකයන් හුදු ජනප්රියත්වය පසුපස හඹා නොගොස් විෂය හොඳින් අධ්යයනය කර විනයකින් යුතුව කටයුතු කළ යුතු බවට මෙම ප්රවීණයෝ සියලු දෙනා අවධාරණය කළහ.
‘මනමේ’ සහ ‘කුවේණි’ වැනි ශෛලිගත නාට්ය ගීත මෙන්ම ‘පත්මාවතී’ නූර්ති ගීත හා ‘ජොහානා’ නාඩගම් ගීත සජීවීව ගායනා කරමින් මෙම ප්රවීණයන් පස්දෙනා වැඩසටහන වඩාත් රසවත් කළහ.
සෑම සෙනසුරාදා දිනකම පෙරවරු 9.30 සිට 11.30 දක්වා TV සුප්රීම්, ඩයලොග් TV (නාලිකා අංක 20) සහ පියෝ TV (නාලිකා අංක 122) ඔස්සේ ‘එක රෑනේ කුරුල්ලෝ’ වැඩසටහන විකාශය කෙරේ.
වැඩිදුර තොරතුරු ඇතුළත් මූලාශ්ර සබැඳිය:



