චීනය මෙහෙයුම් කටයුතු සිදුකරන හම්බන්තොට වරාය ආසන්නයේ ඉදිරිකිරීමට යෝජිත සයිනොපෙක් තෙල් පිරිපහදුව මෙරට විශාලතම සෘජු විදෙස් ආයෝජනය ලෙස සැලකෙන බවද ආරංචි මාර්ග පැවැසුවේය.
බදු නිදහස් කිරීම් පිළිබඳව සහ පිරිපහදුවේ නිපදවන තෙල්වලින් මෙරට අලෙවි කිරීමට අවසර ලබාදෙන ප්‍රතිශතය සම්බන්ධයෙන් එකඟතාවකට පැමිණීමට නොහැකි වීම තවමත් තෙල් පිරිපහදුවේ ඉදිකිරීම් ආරම්භ නොවීමට හේතුව බව ආරංචි ප්‍රකාශ කළේය.
ජනාධිපති අනුර කුමාර දිසානායක මෙම වසර මුලදී චීනයේ සිදුකළ නිල සංචාරයේදී සයිනොපෙක් තෙල් පිරිපහදුව සඳහා වන අවබෝධතා ගිවිසුමට අත්සන් තැබිණි.
තෙල් පිරිපහදුවේ නිපදවනු ලබන ඉන්ධනවලින් සියයට 20 ක් දේශීය වෙළෙඳපොළේ අලෙවි කිරීමට සහ ඉතිරිය අපනයනය කිරීමට අවසර දීමට ශ්‍රී ලංකාව මීට පෙර එකඟත්වය පළ කර තිබූ බවත් මෙරට වෙළෙඳපොළේ සියයට 40 ක් අලෙවි කිරීමට අවසර දෙන ලෙස සයිනොපෙක් සමාගමෙන් පසුව නව යෝජනාවක් ඉදිරිපත් වූ බවත් ආරංචි මාර්ග ප්‍රකාශ කළේය.
දෙපාර්ශවයට මෙරට වෙළෙඳපොළේ අලෙවි කිරීමට අවසර ලබාදෙන ප්‍රතිශතය සම්බන්ධයෙන් සහ බදු නිදහස් කිරීම් ලබාදීම සම්බන්ධයෙන් තවමත් දෙපාර්ශ්වය එකඟතාවකට පැමිණීමට නොහැකි වී තිබෙන බවද ආරංචි මාර්ග පැවැසුවේය.
කෙසේ වෙතත් බලශක්ති අමාත්‍ය කුමාර ජයකොඩි පසුගියදා ප්‍රකාශ කර සිටියේ සයිනොපෙක් තෙල් පිරිපහදුවේ ඉදිකිරීම් කටයුතු මෙම වසරේ ආරම්භ කරනු ඇතැයි රජය අපේක්ෂා කරන බවයි.
සයිනොපෙක් තෙල් පිරිපහදුව සඳහා 2023 වසරේදී කැබිනට් අනුමැතිය හිමිවූ බවත් එය දිනකට බොරතෙල් බැරල් ලක්ෂ 2 ක ධාරිතාවකින් යුක්ත බවත් බලශක්ති අමාත්‍යවරයා එහිදී පවසා තිබිණි.
(lankadeepa | විමුක්ති එස් රුද්‍රිගු)
