ආශා ලංකා සමාගම, 2010 සිට ඛනිජ වැලි ක්ෂේත්‍රයට පිවිසුණ මුළුමනින්ම දේශීය සමාගමකි.
මෙරට ඛනිජ වැලි නිස්සාරණ ක්ෂේත්‍රයේ සහ සමුද්‍ර සේවා කටයුතු සම්බන්ධයෙන් 2012 සිට කටයුතු කළ අතර 2016 වර්ෂයේ දී ආශා මිනරල් සමාගම පිහිටුවන ලදී.
එම වර්ෂයේ දීම සමාගම ඉදිරිපත් කළ ඛනිජ වැලි අගය එකතු කිරීමේ නව නිශ්පාදන තාක්ෂණය ද භූ විද්‍යා හා පතල් කාර්යාංශයේ පිළිගැනීමට ලක් විය. දැනට කැණිම් සිදුවන අරුවක්කාලු හුණුගල් නිධියට ආසන්නයේ පිහිටි අක්කර 36 ක භූමිභාගයක් තුළ මෙම සමස්ත ව්‍යාපෘති සිදු කිරීමට සැලසුම් කොට ඇති අතර මේ වෙනුවෙන් ආශා මිනරල් සමාගම ආයෝජනය කිරීමට නියමිත වූ මුදල රුපියල් බිලියන 33 කි.
මේ සඳහා රජයේ අනුමත කිරීම් සියල්ල ලැබීමෙන් පසුව, මේ වන විට මෙම ව්‍යාපෘතියේ පළමු අදියර ලෙස රුපියල් බිලියන 2 ක පමණ මුදලක් වැය කර, අක්කර 20 ක භූමි භාගයක එම කර්මාන්ත අංගනයේ ඉදිකිරීම් කටයුතු සිදු කිරීමට මෙම ආයතනය කටයුතු කර ඇත.
වෙනත් කිසිදු ආයතනයක් මෙවැනි යෝජනාවක් ඉදිරිපත් කර නොතිබූ අතර එසේම රට බරපතල ආර්ථික අර්බුදයක සිරව සිටිය දී තමන්ගේ තනි ආයෝජනයක් මඟින් සිදු කෙරෙන මෙම දැවැන්ත ව්‍යාපෘතිය යෝජනා කිරීමත් අභියෝගාත්මක ව ඇති තත්ත්වයක් තුල මේ ආයතනය රටේ අභිවෘද්ධිය ද සලකා බලා අදාල දැවැන්ත ව්‍යාපෘතියට මුලපුරා ඇත.
වසර තිස්පහකට අධික කාලයක් තිස්සේ හුනුගල් කැණීමේදී ඉවතලන රතුපස් හා කිසිදු ප්‍රයෝජනයක් නොගෙන මුහුදට ගලාගිය ජලය යොදාගෙන බැර ඛනිජ නිස්සාරණය කර ඛනිජ වෙන්කර බැර ඛනිජ අපනයනය කිරීමෙන් රටට ඩොලර් මිලියන ගණනක් ලබාගත හැකි ව්‍යාපෘතිය සම්බන්ධයෙන් වූ යෝජනාව මෙම ආයතනය, ශ්‍රී ලංකා සිමෙන්ති සංස්ථාව වෙත ඉදිරිපත් කර සිමෙන්ති සංස්ථාවේ අධ්‍යක්ෂ මණ්ඩලයේ පූර්ණ අනුමැතිය ලබාගෙන තිබේ.
කෙසේ වෙතත්, සියලු අවශ්‍යතා සපුරා තිබියදීත් මේ දැවැන්ත, පලදායි ව්‍යාපෘතියට එරෙහිව යම් යම් කුමන්ත්‍රණකාරී බාදාකිරීම් සිදුවෙමින් තිබෙන බව වාර්තා වේ.
මීට පෙර අරුවක්කාරු බැර ඛනිජ නිස්සාරණ වැඩබිම වලාන දූෂණ මර්දන ප්‍රහාරක ඒකකය මගින් වැටලීම් කරනු ලැබුවේ සෝදිසි කිරීමේ වරෙන්තුවක් පවා නොමැතිව ය.
ඇතැම් නිළධාරීන්ගේ යම්යම් ක්‍රියාමාර්ග හේතුවෙන් බිලියන ගණනක ආයෝජනයක ප්‍රතිලාබ රටට ලබාගැනීම කල්යමින් තිබෙන බවත් දේශීය ආයතනයක් වෙනුවට විදේශීය ආයතනයකට මෙම ව්‍යාපෘතිය ලබාදීමට කිසියම් පිරිසක් කූඨ වෑයමක යෙදෙනවාද කියා සැකයක් පවතින බවත් අභ්‍යන්තර ආරංචිමාර්ග වලින් වාර්තා වේ.
