දේශීය සාම්ප්‍රදායික ආහාර නිෂ්පාදන (Ethnic products) සම්බන්ධයෙන් මෙරට වෙළඳපොළේ ප්‍රකට නාමයක් දිනා සිටින මහරාජා ෆුඩ්ස් (Maharaja Foods PLC) සමාගම, ජාත්‍යන්තර සුපිරි වෙළඳසැල් දැවැන්තයෙකු වන ස්පාර් ශ්‍රී ලංකා (SPAR Sri Lanka) ආයතනය සමඟ එක්ව සිය නවතම සිල්ලර වෙළඳසැල "Maharaja Super – SPAR Savemore" නමින් මේ සතියේදී කොටහේනේදී විවෘත කර තිබේ.
කොළඹ කලාපය තුළ ඒකාබද්ධ සුපිරි වෙළඳසැල් 4ක් ආරම්භ කිරීම සඳහා පසුගිය වසරේ සැප්තැම්බර් මාසයේදී දෙපාර්ශවය අත්සන් කළ ගිවිසුමට අනුව ක්‍රියාත්මක වූ දෙවැනි සාර්ථක පියවර මෙයයි.
කොටස්කරුවන්ගේ සල්ලිවලින් ගැසූ ව්‍යාපාරික ට්‍රික් එක
මහරාජා ෆුඩ්ස් සමාගම මෙම දැවැන්ත සිල්ලර වෙළඳ ව්‍යාපෘතිය සඳහා මුදල් සොයාගත්තේ සාමාන්‍ය ජනතාව මුදල් හිඟයකින් පෙළෙන පසුබිමකය. ඔවුන් කොටස් වෙළඳපොළ හරහා රුපියල් 9 බැගින් වූ සාමාන්‍ය ඡන්ද බලය හිමි කොටස් මිලියන 12.5ක් (1 for 10 Rights Issue) නිකුත් කරමින් රුපියල් මිලියන 112.5ක දැවැන්ත ප්‍රාග්ධනයක් කොටස්කරුවන්ගෙන් සෘජුවම උපයා ගත්තේය.
දේශීය නිෂ්පාදන ජාත්‍යන්තර තලයේ සාප්පු සවාරි අත්දැකීමක් (World-class shopping experience) සමඟ පාරිභෝගිකයා වෙත රැගෙන යාම මෙහි මතුපිට අරමුණ වුවද, සුපිරි වෙළඳසැල් ජාලයන් (Supermarket chains) හරහා මෙරට මධ්‍යම පාන්තික පාරිභෝගිකයා ආකර්ශනය කරගනිමින් කාර්ගිල්ස්, කීල්ස් වැනි දේශීය දැවැන්තයන්ට වෙළඳපොළ තුළ නව තරඟකාරීත්වයක් දීමට ‘මහරාජා - ස්පාර්’ සන්ධානය සූදානම් වන බව පැහැදිලිය.
