කොළඹ වරාය චීන ලොජිස්ටික්ස් ව්‍යාපෘතිය අත්හිටුවයි: වරාය අධිකාරියෙන් බේරුම්කරණයක්

වසර ගණනාවක සැලසුම හමාර කළ නිල නිවේදනය

කොළඹ වරාය පරිශ්‍රය තුළ ‘දකුණු ආසියානු වාණිජ සහ සැපයුම් කේන්ද්‍රය’ (SACLH) නමින් ස්ථාපිත කිරීමට ගිය දැවැන්ත ව්‍යාපෘතියෙන් ඉවත්වීමට චයිනා මර්චන්ට්ස් පෝර්ට් හෝල්ඩින්ග්ස් සමාගම (CMPort) තීරණය කර ඇත.

හොංකොං කොටස් වෙළෙඳපොළ වෙත නිල ප්‍රකාශයක් නිකුත් කරමින් සමාගම සඳහන් කරන්නේ බාහිර පරිසරයේ වෙනස්වීම්, ව්‍යාපෘතිය ක්‍රියාත්මක කිරීමේ කාලරාමුවේ ගැටලු සහ වාණිජමය සාධක සැලකිල්ලට ගනිමින් මෙම තීරණයට එළඹුණු බවයි. දෙපාර්ශවයටම වඩාත් හිතකර පියවර ලෙස මෙම ගිවිසුම අවසන් කිරීමට එකඟ වූ බවද එහි දැක්වේ.

ඩොලර් මිලියන 21.9ක බේරුම්කරණ ගෙවීම

ව්‍යාපෘතිය අත්හිටුවීමෙන් අනතුරුව මේ දක්වා සිදුකර ඇති ආයෝජන සමථයකට පත්කිරීම වෙනුවෙන් ශ්‍රී ලංකා වරාය අධිකාරිය (SLPA) ඇමෙරිකානු ඩොලර් මිලියන 21.905ක එකවර ගෙවීමක් සිදුකිරීමට නියමිතය.

ගිවිසුම අත්සන් කර දින තිහක් ඇතුළත මෙම මුදල ව්‍යාපෘති සමාගම වෙත ගෙවිය යුතුය. චීන සමාගමේ අනුබද්ධ ආයතනය විසින් යොදවා තිබූ ඩොලර් මිලියන 26ක මූලික ආයෝජනයෙන් නියමිත බදු සහ ප්‍රමාද ගාස්තු අඩුකිරීමෙන් පසු ඉතිරිවන ප්‍රධාන කොටස මෙම මුදලින් ආවරණය වේ.

කොටස් හිමිකාරිත්වය සහ පසුබිම

මෙම ව්‍යාපෘතිය පවත්වාගෙන යාම සඳහා බ්‍රිතාන්‍ය වර්ජින් දූපත්වල ලියාපදිංචි කර තිබූ ‘ෆෝචූන් සෙන්ටර් ගෲප් ලිමිටඩ්’ (FCGL) නම් අනුබද්ධ සමාගමේ 70%ක බහුතර කොටස් හිමිකාරිත්වය චයිනා මර්චන්ට්ස් සමාගම සතුවිය.

ඉතිරි කොටස්වලින් 15%ක් ශ්‍රී ලංකා වරාය අධිකාරිය සතුවූ අතර, අනෙක් 15%ක හිමිකාරිත්වය ඇක්සස් ඉංජිනේරු සමාගමට (Access Engineering PLC) හිමිව තිබිණි. වරාය අධිකාරිය විසින් ගෙවනු ලබන වන්දි මුදල අවසානයේදී මෙම කොටස්කරුවන් තිදෙනා අතර බෙදීයනු ඇත.

ගැසට් නිවේදන සහ දිගුකාලීන බදු සහන

මෙම ව්‍යාපෘතිය 2023 දෙසැම්බර් මාසයේදී උපායමාර්ගික සංවර්ධන ව්‍යාපෘතියක් ලෙස ගැසට් පත්‍රයක් මඟින් ප්‍රකාශයට පත්කර තිබූ අතර, ඊට වසර 15ක පූර්ණ ආයතනික ආදායම් බදු සහ ලාභාංශ බදු සහන හිමිව තිබිණි.

එමෙන්ම කොළඹ වරාය තුළ සැපයුම් සහ ගබඩා පහසුකම් පවත්වාගෙන යාමේ වසර 50ක පූර්ණ තනි අයිතියක්ද චීන සමාගම වෙත හිමිවන පරිදි කොන්දේසි සැකසී තිබූ බව වාර්තා සඳහන් කරයි. ව්‍යාපෘතිය අවසන් කිරීමට තීරණය කළද, ඊට අදාළ මුල් ගැසට් නිවේදනය අවලංගු කළ බවට රජයේ මුද්‍රණ දෙපාර්තමේන්තුවේ මෙතෙක් නිල සටහනක් පළවී නොමැති බව නිරීක්ෂණය වේ.

මූලාශ්‍ර සබැඳිය :

Sunday Times Colombo - China Merchants logistics hub project off; SLPA agrees to $21.9m settlement deal