ගෝලීය වෙළෙඳපොළ ජයගන්න අලුත් වේදිකාවක්
ශ්‍රී ලංකාවේ ප්‍රමුඛතම විදේශ විනිමය උපයන මාර්ගයක් වන මැණික් හා ස්වර්ණාභරණ ක්ෂේත්‍රය නූතන ලෝක වෙළෙඳපොළ ඉලක්ක කරගත් නව ගමනකට මුලපුරයි.
ඒ අනුව ‘ශ්‍රී ලංකා මැණික් හා ස්වර්ණාභරණ 2026/27’ වාර්ෂික උළෙල මේ මස 24 වන දින කොළඹ 01, ලෝක වෙළෙඳ මධ්‍යස්ථාන (WTC) පරිශ්‍රයේදී දවස පුරා පැවැත්වේ.
උදෑසන 9.00 සිට පස්වරු 5.00 දක්වා පැවැත්වෙන මෙම ප්‍රදර්ශනය මහජනතාව වෙනුවෙන් විවෘත වන්නේ කිසිදු අයකිරීමකින් තොරවය.
ව්‍යවසායකයින්ට සහ නිර්මාණකරුවන්ට ස්වර්ණමය අවස්ථාවක්
දේශීය මැණික් ව්‍යාපාරිකයින්, නව පරපුරේ නිර්මාණකරුවන් මෙන්ම මහා පරිමාණ අපනයනකරුවන් එකම වහලක් යටට ගෙන ඒම මෙහි මූලික ඉලක්කයයි.
පැසිෆික් මිනරල් පුද්ගලික සමාගමේ අධ්‍යක්ෂ තිලකසිරි විතාරණ පෙන්වා දෙන්නේ, දේශීය කර්මාන්තකරුවන්ට ජාත්‍යන්තර ගැණුම්කරුවන් සෘජුව මුණගැසීමට මෙයින් පුළුල් ඉඩක් නිර්මාණය වන බවයි.
ශ්‍රී ලාංකේය අනන්‍යතාව රැකගනිමින් ගෝලීය වෙළෙඳ ජාලයන් සමග බද්ධ වීමට මෙය සුවිශේෂී පසුබිමක් සපයයි.
වර්ණය, පැහැය සහ නියම වටිනාකම හඳුනාගැනීම
මැණික් ගලක සැබෑ වටිනාකම තීරණය කෙරෙන ප්‍රධාන සාධකය වන්නේ එහි 'ටෝන්' (Tone) හෙවත් නිවැරදි වර්ණ ගැන්වීම සහ පැහැයයි.
මැණික් විද්‍යාඥ සත්‍යජිත් ධර්මප්‍රිය සඳහන් කරන පරිදි, ඉහළම ප්‍රමිතියෙන් යුතු මැණික් හඳුනාගැනීම, පරික්ෂා කිරීම මෙන්ම සෘජුවම මිලදී ගැනීමටත් අලෙවි කිරීමටත් අවශ්‍ය තාක්ෂණික සහ වෘත්තීය පහසුකම් මෙහි ස්ථාපිත කර තිබේ.
පැමිණෙන ගැණුම්කරුවන්ට හා වෙළෙඳුන්ට තම භාණ්ඩ ආකර්ෂණීය ඡායාරූප සහ වීඩියෝ මගින් ඩිජිටල් තාක්ෂණය ඔස්සේ ලොවට ප්‍රදර්ශනය කිරීමේ පහසුකම්ද සලසා ඇත.
ගැණුම්කරුවන්ට සහ විකුණුම්කරුවන්ට විවෘත ඇරයුමක්
මැණික් හා ස්වර්ණාභරණ මිලදී ගැනීමට, විකිණීමට හෝ ක්ෂේත්‍රයේ නව ප්‍රවණතා පිළිබඳ හැදෑරීමට කැමති ඕනෑම අයෙකුට මෙම ප්‍රදර්ශනය විවෘතව පවතී.
සංවිධායකයින් දැනුම් දෙන්නේ මේ පිළිබඳ වැඩිදුර තොරතුරු 077 787 4224 දුරකථන අංකය ඇමතීමෙන් ලබාගත හැකි බවයි.
(සටහන: ජේ. මුණසිංහ)