කොළඹ වරාය නගරය කේන්ද්‍ර කරගත් ඕමාන-ශ්‍රී ලංකා නව ආර්ථික කොරිඩෝවක් සැකසෙයි

ඕමාන ආයෝජකයන්ට දකුණු ආසියානු වෙළෙඳපොළට පිවිසීමට නව දොරක් විවර වෙයි.


ශ්‍රී ලංකාව සහ ඕමානය අතර පවතින ආර්ථික සහයෝගීතාව නව මාවතකට යොමු කරමින්, කොළඹ වරාය නගරය (Port City Colombo) කේන්ද්‍ර කරගෙන දකුණු ආසියානු කලාපය ආවරණය වන පරිදි නව ආයෝජන සහ වෙළෙඳ කොරිඩෝවක් (Investment and Trade Corridor) ස්ථාපිත කිරීම පිළිබඳ සාකච්ඡා ආරම්භ වී තිබේ.

මීට සමගාමීව, ඕමාන රජයේ ජ්‍යෙෂ්ඨ දූත පිරිසක් මෑතකදී කොළඹ වරාය නගරයේ නිරීක්ෂණ චාරිකාවක නිරත විය. ඕමාන කර්මාන්ත හා ආයෝජන ප්‍රවර්ධන අමාත්‍යාංශයේ විදේශ වෙළෙඳ සහ ජාත්‍යන්තර සහයෝගිතා උපදේශක පන්කජ් කිම්ජි ගේ ප්‍රධානත්වයෙන් යුත් මෙම දූත පිරිසට ශ්‍රී ලංකාවේ ඕමාන තානාපති අහමඩ් අල් රෂීඩි සහ ඕමාන ව්‍යාපෘති අධ්‍යක්ෂ මූසා අල් කාරූසි ඇතුළු පිරිසක් එක්ව සිටියහ.

මිත්‍රත්වයෙන් ව්‍යාපාරික කේන්ද්‍රස්ථානයක් කරා

දෙරට අතර ද්විපාර්ශ්වික වෙළෙඳ ගනුදෙනු 2018 වසරේදී ඇමරිකානු ඩොලර් මිලියන 118ක් ලෙස සටහන් වූ අතර, එය 2022 වසර වන විට ඇමරිකානු ඩොලර් මිලියන 223ක් දක්වා වර්ධනය වී තිබේ. කෙසේ වෙතත්, මෙම ප්‍රගතිය හුදෙක් රාජ්‍ය තාන්ත්‍රික මට්ටමේ මිත්‍රත්වයකට පමණක් සීමා නොවී, එය සංයුක්ත ආයෝජන සහ ව්‍යාපාරික ගනුදෙනු දක්වා පුළුල් කළ යුතු බව ඕමාන දූත පිරිස අවධාරණය කළහ.

මෙම ආර්ථික කොරිඩෝව ඔස්සේ ඕමාන සමාගම්වලට කොළඹ වරාය නගරයේ විශේෂ ආර්ථික කලාපය (SEZ) හරහා දකුණු ආසියානු කලාපයේ වෙළෙඳපොළ වෙත පිවිසීමටත්, ඒ හරහා ශ්‍රී ලාංකීය සමාගම්වලට මැද පෙරදිග කලාපීය අවස්ථා උදාකර ගැනීමටත් හැකියාව පවතින බව දෙපාර්ශ්වයේම විශ්වාසයයි.

ආයෝජකයන් ආකර්ෂණය කරගන්නා නියාමන රාමුවක්

කොළඹ වරාය නගර ආර්ථික කොමිෂන් සභාවේ අධ්‍යක්ෂ ජනරාල් රෙවන් වික්‍රමසූරිය  පෙන්වා දෙන්නේ, වරාය නගරයේ පවතින නියාමන රාමුව ඕනෑම ප්‍රමාණයක හෝ ඕනෑම රටක ආයෝජකයෙකුට සමානව සහ විනිවිදභාවයකින් යුතුව කටයුතු කිරීමට හැකි පරිදි නිර්මාණය කර ඇති බවයි.

දැනට වරාය නගරය තුළ සමාගම් 175කට අධික සංඛ්‍යාවක් ලියාපදිංචි වී සිටින අතර, 2025 සිව්වන කාර්තුවේ සිට 2026 දෙවන කාර්තුව දක්වා කාලය තුළ ඇමරිකානු ඩොලර් බිලියනයකට අධික ආයෝජන ප්‍රමාණයක් මෙහි සුරක්ෂිත කර ගැනීමට හැකි වී තිබේ.

මෙම දූත මණ්ඩල සංචාරයේ මීළඟ පියවර ලෙස, යෝජිත 'ඕමාන් - දකුණු ආසියානු ආයෝජන සහ වෙළෙඳ කොරිඩෝව' ක්‍රියාවට නැංවීම සඳහා දෙරටේ පෞද්ගලික අංශයේ සහභාගීත්වය, නිශ්චිත ආයෝජන තීරණ සහ නියාමන ක්‍රියාවලීන්හි කාර්යක්ෂමතාව තීරණාත්මක වනු ඇතැයි ආර්ථික විශ්ලේෂකයෝ පෙන්වා දෙති. පසුගිය වසර මුලදී කොළඹ වරාය නගර බලධාරීන් ඕමානයේ මස්කට් නුවරදී පැවැත්වූ ආයෝජක සමුළුවේ අඛණ්ඩ පැමිණීමක් ලෙස මෙම සංචාරය හඳුනාගත හැකිය.


මුලාශ්‍රය :

LANKA NEWS : From Diplomatic Ties to Deals: Oman and Sri Lanka Test a New Investment Corridor