ඉසබෙල් අයියන්දේට ලොව ඉහළ ම මූල්‍ය වටිනාකමක් සහිත සාහිත්‍ය සම්මානයක්

චිලී-ඇමෙරිකානු ජාතික ප්‍රකට ලේඛිකා ඉසබෙල් අයියන්දේ (Isabel Allende), ස්පාඤ්ඤය විසින් පිරිනමනු ලබන ලොව ඉහළ ම මූල්‍ය වටිනාකමක් සහිත සාහිත්‍ය සම්මානයක් වන ප්‍රෙමියෝ ප්ලැනටා (Premio Planeta) සම්මානය සහ යුරෝ මිලියනයක (ඩොලර් මිලියන 1.1කට අධික) ත්‍යාග මුදලක් දිනාගෙන ඇත.

ඇය මෙම ජයග්‍රහණය අත්පත් කරගත්තේ 2026 ඔක්තෝබර් මාසයේ දී පැවැත්වුණු මෙම සම්මාන උළෙලේ 75වන සංවත්සරයේ දී ය; ඒ, "ලුස් වෙන්චුරා" (Luz Ventura) නමැති අන්වර්ථ නාමයකින් තරගයට ඉදිරිපත් වෙමිනි.

සම්මානනීය කෘතිය සහ පසුබිම

ඇය මෙම සම්මානය දිනාගත්තේ "La hora antes del alba" (The Hour Before Dawn / අරුණෝදයට පෙර පැය) නම් නවකතාව සඳහා ය. මෙම කෘතියේ විශේෂත්වය වන්නේ ඇය 1982 වසරේදී ලියා මහත් ප්‍රසිද්ධියට පත් වූ ඇගේ ප්‍රථම නවකතාව වන "The House of the Spirits" (La casa de los espíritus) (මෙම කෘතිය 'මායා වාස' යන මැයෙන් ගැමිණී වියන්ගොඩ විසින් ප්‍රඥමයෙන් ම 2002 වසරේ දී සිංහල භාෂාවට පරිවර්තනය කරන ලදී.) කෘතියේ දෙවැනි කොටස (Sequel) ලෙස නිර්මාණය කර තිබීම ය.

ඉසබෙලා අයියන්දේ මෙම කෘතිය"ලුස් වෙන්චුරා" (Luz Ventura) නමැති අන්වර්ථ නාමයකින් ඉදිරිපත් කළේ ඇයි ද යන්න විමසූ විට ඇය පවසා ඇත්තේ  එය ඇගේ මුල් කෘතියේ එන ආලෝකවත් කාන්තා චරිතවලට උපහාරයක් ලෙස තෝරාගත් බව යි.

Premio Planeta සම්මානය යනු කුමක් ද…?

මෙම සම්මාන උළෙල ස්පාඤ්ඤ භාෂිත ලෝකයේ දැවැන්තම ප්‍රකාශන ආයතනයක් වන Grupo Planeta විසින් සංවිධානය කරනු ලබයි. තරග නීතිවලට අනුව ලේඛක ලේඛිකාවන් සිය අනන්‍යතාව සඟවා අන්වර්ථ නාමයකින් සහ වෙනත් තාවකාලික මාතෘකා යටතේ කෘති ඉදිරිපත් කළ යුතු අතර, ජයග්‍රාහකයා කවුදැයි නිල වශයෙන් ප්‍රකාශ කරන්නේ සම්මාන රාත්‍රියේ දී ම පමණි.

බාර්සිලෝනා නුවර පැවැති උත්කර්ෂවත් උළෙලක දී අවුරුදු 84ක් වයසැති ඉසබෙල් අයියන්දේ වෙත මෙම සම්මානය පිරිනමනු ලැබුවේ ස්පාඤ්ඤයේ VI වැනි ෆෙලිපේ රජු සහ ලෙටීසියා රැජින අතිනි.

 

ජාත්‍යන්තර පුවත් ඇසුරිනි