මුලතිව් දිස්ත්‍රික් ලේකම් කේ.විමලනාදන්ගේ ප්‍රධානත්වයෙන් දිස්ත්‍රික්කයේ සෙසු පරිපාලන නිලධාරින් සමග මේ ගැන විශේෂ කතා බහක් ඉකුත් සතියේ සුම් ඔස්සේ පැවැත්විණි.
එහිදී අනාවරණය වුයේ යුද්ධය නිසා උන්හිටි තැන් අහිමිව ඉන්දියාවට පළා ගොස් නැවත පැමිණ මුලතිව් හි පදිංචි වී සිටින පවුල් ගැන අධිකරණ, බන්ධනාගාර සහ ආණ්ඩුක්‍රම ප්‍රතිසංස්කරණ අමාත්‍යංශය මගින් තොරතුරු රැස් කරන බවයි.
2009 වසරේ සිට 2022 දක්වා මුලතිව් දිස්ත්‍රික්කයේ පවුල් 405කට අයත් පුද්ගලයින් 878 දෙනකු ඉන්දියාවේ සිට පැමිණ නැවත පදිංචි වී තිබේ.
නැවත පදිංචි කළ මෙම ජනයාගේ ගැටළු හඳුනාගෙන දිස්ත්‍රික් මට්ටමින් විසඳාගත නොහැකි ගැටලු කොළඹට යොමු කරන බව මුලතිව් දිස්ත්‍රික් ලේකම්වරයා මෙහිදී අනාවරණය කළේය.
එක්රැස් කරන ලද දත්ත මත පදනම්ව, උප්පැන්න සහතික, මරණ සහතික, පුරවැසිභාවය, ජාතික හැඳුනුම්පත, ළමුන් පාසල්වලට ඇතුළත් කිරීම, ඉඩම්, උපාධිය, ජීවනෝපාය සහ නීතිමය ගැටළු හඳුනා ගෙන ඒවාට ඉක්මන් විසදුම් ලබා දීමට ද නියමිතය.
තිස් වසරක් පුරා පැවති යුද ගැටුම් වලින් දිවි ගළවා ගැනීමට ඉන්දියාවට පළා ගිය ලක්ෂ ගණනක් උතුරු නැගෙනහිර දෙමළ ජනයා අතරින් 92,000 කට වැඩි පිරිසක් තවමත් එරටය. ඇතැම් දෙනා වරින් වර නැවත පදිංචියට පැමිණ ඇත.
2021 වනවිට තමිල්නාඩුවේ අනාථ කඳවුරු 108ක ලාංකිකයන් 58,843 ක් ඉන්නා බව ඉන්දීය ස්වදේශ කටයුතු අමාත්‍යංශ ලේඛණ වල දැක්වෙයි. ඊට අමතරව 34,135 ක් රජයේ ලියාපදිංචි වී කඳවුරුවලින් පිටත දිවි ගෙවති.
වත්මන් ආර්ථික අර්බුදය හමුවේද බොහෝ පිරිස් ඉන්දියාවට පළා යන බවට පුවත් දිනෙන් දින වාර්තාවේ.
