"සියලු සාක්ෂි වහාම සුරක්ෂිත කරනු" - විදේශීය කාන්තාවන් 28ක් ඇතුළු රැඳවියන් රට වටා විසුරුවද්දී ශ්‍රී ලංකා මානව හිමිකම් කොමිසම (HRCSL) බන්ධනාගාර ලොක්කන්ට දැඩි උපදෙස් මාලාවක් නිකුත් කරයි
මීගමුව බන්ධනාගාරය තුළ පසුගිය ජූලි 5 සහ 6 දෙදින තුළ සිදු වූ බිහිසුණු ප්‍රචණ්ඩ ක්‍රියා හේතුවෙන් විනාශ වූ බන්ධනාගාර පරිශ්‍රය නිල වශයෙන් "අපරාධ ස්ථානයක්" (Crime Scene) ලෙස ප්‍රකාශයට පත් කර ඇති අතර, එහි සිටි සමස්ත රැඳවියන් වහාම ක්‍රියාත්මක වන පරිදි වෙනත් ප්‍රදේශවලට විතැන් කිරීමට රජය පියවර ගෙන තිබේ.
අධිකරණ සහ ජාතික ඒකාබද්ධතා අමාත්‍යාංශය අද (09) නිල නිවේදනයක් නිකුත් කරමින් ප්‍රකාශ කළේ, පරිශ්‍රයට සිදුව ඇති දැඩි හානිය සහ ඉදිරි විමර්ශන කටයුතුවල ආරක්ෂාව සලකා මීගමුව බන්ධනාගාරය තුළ රැඳවියන් රඳවා තැබීම සහමුලින්ම නුසුදුසු බව බන්ධනාගාර පරිපාලනය තීන්දු කර ඇති බවයි.
මරණ පරීක්ෂණවලින් හෙළි වූ බිහිසුණු ඇත්ත
මීගමුව රෝහලේ තැන්පත් කර තිබූ සිරුරු 28 අතරින් සිරුරු 24ක පශ්චාත් මරණ පරීක්ෂණ කටයුතු විශේෂඥ වෛද්‍ය සුජීව වික්‍රමනායක ගේ ප්‍රධානත්වයෙන් යුත් පංච පුද්ගල අධිකරණ වෛද්‍ය කණ්ඩායමක් විසින් අද සවස නිම කරනු ලැබීය.
මරණ සිදු වූ ආකාරය:
සිදු කරන ලද විද්‍යාත්මක පරීක්ෂණවලට අනුව මරණ 14ක්ම සිදු වී ඇත්තේ වෙඩි වැදීමෙනි. තවත් මරණ 9ක් තියුණු හෝ මොට ආයුධවලින් සිදු කළ අමානුෂික පහරදීම් හේතුවෙන් සිදු වී ඇති අතර, එක් මරණයක් සම්බන්ධයෙන් විවෘත තීන්දුවක් ලබා දී තිබේ.
නිලධාරීන්ට අත් වූ ඉරණම:
කැරැල්ලෙන් මියගිය බන්ධනාගාර නිලධාරීන්ට කැරලිකරුවන් විසින් ඉතා අමානුෂික ලෙස පහර දී ඇති බවත්, ඔවුන්ගේ මරණවලට සෘජු හේතුව හිසට එල්ල වූ බරපතළ තුවාල බවත් වෛද්‍ය වාර්තා තහවුරු කරයි. මියගිය ඉන්දීය ජාතිකයා ඇතුළු ඉතිරි සිරුරු 4 පිළිබඳ පරීක්ෂණ මේ වන විටත් ක්‍රියාත්මකය.
රට පුරා විසිරෙන රැඳවියන් සහ නව බන්ධනාගාර
විමර්ශන නිලධාරීන්ට බාධාවකින් තොරව සාක්ෂි එකතු කිරීමට ඉඩ සැලසීම සහ බන්ධනාගාර පද්ධතියේ පවතින දැඩි සිර ඝනත්වය පාලනය කිරීම වෙනුවෙන් රැඳවියන් තාවකාලිකව විතැන් කිරීම අරඹා ඇත.
කාන්තා රැඳවියන් මාරු කිරීම:
මීගමුව බන්ධනාගාරයේ සිටි කාන්තා රැඳවියන් 73 දෙනෙකු අද දින වහාම ක්‍රියාත්මක වන පරිදි වෙනත් බන්ධනාගාර වෙත මාරු කර යැවූ බව බන්ධනාගාර මාධ්‍ය ප්‍රකාශක, කොමසාරිස් ඒ.සී. ගජනායක පැවසීය. ඉන් 33 දෙනෙකු වාරියපොළ බන්ධනාගාරයටත්, තවත් 40 දෙනෙකු පල්ලෙකැලේ බන්ධනාගාරයටත් යොමු කර ඇති අතර, ඒ අතර විදේශීය කාන්තාවන් 28 දෙනෙකු ද සිටිති.
මහමෝදර සහ බෝගම්බර සක්‍රීය වෙයි:
මීගමුව පරිශ්‍රය ප්‍රතිසංස්කරණය කර අවසන් වන තුරු, බන්ධනාගාර ආඥා පනතේ ප්‍රතිපාදන ප්‍රකාරව ගාල්ල "මහමෝදර" සහ මහනුවර "පැරණි බෝගම්බර" පරිශ්‍රයන් දෙක තාවකාලික බන්ධනාගාර ලෙස ප්‍රකාශයට පත් කරමින් අමාත්‍යාංශය විශේෂ නියෝග නිකුත් කර තිබේ.
මානව හිමිකම් කොමිසමෙන් (HRCSL) දැඩි නියෝග
මේ අතර, 1996 අංක 21 දරන පනතේ බලතල ප්‍රකාරව ශ්‍රී ලංකා මානව හිමිකම් කොමිෂන් සභාව විසින් බන්ධනාගාර කොමසාරිස් ජනරාල්වරයා වෙත විශේෂ සහ අනිවාර්ය උපදෙස් මාලාවක් අද සන්නිවේදනය කර ඇත.
සාක්ෂි ආරක්ෂා කිරීම:
මීගමුව බන්ධනාගාරය තුළ සිදු වූ සාමූහික ඝාතන සහ ප්‍රචණ්ඩත්වයට අදාළ කිසිදු සාක්ෂියක් විනාශ වීමට ඉඩ නොතබා ඒවා සුරක්ෂිත කළ යුතු බව HRCSL අවධාරණය කරයි.
බාධාවකින් තොර ප්‍රවේශය:
දිවයිනේ ඕනෑම බන්ධනාගාර පරිශ්‍රයකට කොමිසමේ නිලධාරීන්ට ඕනෑම අවස්ථාවක බාධාවකින් තොරව ඇතුළු වීමට ඉඩ දිය යුතු අතර, විමර්ශන ස්වාධීන සහ අපක්ෂපාතී මට්ටමකින් පැවැත්වීමට බන්ධනාගාර බලධාරීන් පූර්ණ සහයෝගය දීම අනිවාර්ය කර තිබේ.
මීගමුව ප්‍රධාන මහේස්ත්‍රාත් ශිලනී පෙරේරා ගේ නියෝගය පරිදි සිද්ධියට අදාළ සියලුම පශ්චාත් මරණ පරීක්ෂණ වාර්තා සහ පොලිසියේ සවිස්තරාත්මක විමර්ශන වාර්තාව කඩිනමින් අධිකරණයට ඉදිරිපත් කිරීමට නියමිතය.
