ශ්‍රී ලංකා ක්‍රිකට් ආයතනයේ පරිපාලන කටයුතු සඳහා අනවශ්‍ය ලෙස දිගින් දිගටම
එල්ල වන දේශපාලනික අතපෙවීම් හේතුවෙන් ජාත්‍යන්තර ක්‍රිකට් සම්මේලනය (ICC) විසින් ශ්‍රී ලංකා ක්‍රිකට් ආයතනය අසාදුගත කිරීම හෝ අත්හිටුවීම සඳහා සලකා බලමින් සිටින බව ජාත්‍යන්තර ක්‍රිකට් ආරංචි මාර්ග වාර්තා කරයි.
ඊට ආසන්නතම ප්‍රධාන හේතුව වී ඇත්තේ නව ක්‍රීඩා නීති සකස් කිරීමේදී ඇමතිවරයා විසින් නීතිපති දෙපාර්තමේන්තුව හරහා ඇපීල් උසාවි වෙත ලබාදුන් එකඟතාව කඩ කර ඇති බව ජාත්‍යන්තර ක්‍රිකට් සම්මේලනය වෙත වාර්තා වීමත් සමගය.
මීට අදාලව ඇපීල් උසාවියේ ගොනු කර ඇති 460/2020 නඩුවට අදාලව ක්‍රීඩා අමාත්‍යවරයා විසින් 2022.08.30 වන දින නීතිපතිවරයාට ලිඛිතව දැනුම් දී ඇත්තේ ක්‍රීඩා නීතිය වෙනස් කරන අවස්ථාවකදී ක්‍රිකට් වලට අදාල වන කාරණා සම්බන්ධයෙන් ජාත්‍යන්තර ක්‍රිකට් සම්මේලනයේ උපදේශකත්වය ලබාගැනීමට කටයුතු කරන බවය. එමෙන්ම ශ්‍රී ලංකා ක්‍රිකට් ආයතනයේ ව්‍යවස්ථාව සංශෝධනය කිරීමේදී ද ජාත්‍යන්තර ක්‍රිකට් සම්මේලනයේ මාර්ගෝපදේශ සම්බන්ධයෙන් එහි උපදෙස් ලබාගැනීමට කටයුතු කරන බව ද සඳහන් වේ.
කෙසේවෙතත් මේ වනතෙක් ශ්‍රී ලංකා ක්‍රිකට් ආයතනයේ කටයුතු සම්බන්ධයෙන් වන දේශපාලනික අතපෙවීම් වලදී ජාත්‍යන්තර ක්‍රිකට් සම්මේලනය දැනුවත් කිරීමට හෝ ඔවුන්ගේ උපදෙස් ලබාගැනීමට ක්‍රීඩා අමාත්‍යවරයා කටයුතු නොකිරීම හේතුවෙන් ජාත්‍යන්තර ක්‍රිකට් සම්මේලනය විසින් මේ සම්බන්ධයෙන් පරීක්ෂණයක් ආරම්භ කොට ඇති බව වාර්තා වේ.
මේ සම්බන්ධයෙන් ජාත්‍යන්තර ක්‍රිකට් සම්මේලනය විසින් නව ක්‍රීඩා රෙගුලාසි හා අනෙකුත් අනිසි බලපෑම් වලට අදාලව ලිඛිතව කරුණු ශ්‍රී ලංකා ක්‍රිකට් ආයතනය විසින් ලබාගෙන ඇති බව ද වාර්තා වේ.
ජාත්‍යන්තර ක්‍රිකට් සම්මේලනය විසින් සිදුකරන ඉහත පරීක්ෂණයේදී ශ්‍රී ලංකා ක්‍රිකට් ආයතනයේ පරිපාලනය සම්බන්ධයෙන් අනිසි දේශපාලන බලපෑම් එල්ල වන බව සනාථ වන පසුබිමක් තුළ ශ්‍රී ලංකා ක්‍රිකට් සම්බන්ධයෙන් කුමන හෝ ආකාරයේ තහනමක් නිකුත් කිරීම සම්බන්ධයෙන් වැඩි ඉඩකඩක් ඇති බව ජාත්‍යන්තර ක්‍රිකට් ආරංචි මාර්ග සඳහන් කරයි.
සබැඳි පුවත් :
ශ්‍රී ලංකා ක්‍රිකට් : ක්‍රීඩා ඇමති ගෙන් අධිකරණයට ප්‍රතිඥාවක්
