කැනීම් විශේෂඥයන් පවසන්නේ මුදල් ලැබී ඇති නමුත් මේ වන විට ප්‍රදේශයට වැසි වැටීම හේතුවෙන් සිත්තුපාත්ති සමුහ සුසානයේ මීලග අදියරේ කැනීම් කටයුතු මේ මොහොතේ ආරම්භ කිරීමේ හැකියාවක් නොමැති බවයි.
යාපනය, චෙම්මනි සිත්තුපාත්ති සමූහ සුසානය සම්බන්ධ නඩු විභාගය 2025 ඔක්තෝබර් 13 වැනි සදුදා යාපනය මහේස්ත්‍රාත් සෙල්වනායගම් ලෙනින්කුමාර් ඉදිරියේ විභාගයට ගෙන තිබුනි.
අධිකරණ කටයුතු නිමා වීමෙන් අතුරුදහන් තැනැත්තන් පිළිබඳ කාර්යාලයේ (OMP) නීතිඥ පූරණී ජෝසප් මරියනායගම් පළාත් බද මාධ්‍යවේදීන්ට දැනුම් දී ඇත්තේ කැනීම් කටයුතු වෙනුවෙන් ඉල්ලා තිබු රුපියල් ලක්ෂ 190 ක මුදල ලැබී ඇති බවයි.
“කැණීම් කටයුතුවල තෙවැනි අදියර සඳහා අපට මුදල් ලැබී තිබෙනවා. අධිකරණ අමාත්‍යාංශයෙන් ඉල්ලා සිටි රුපියල් මිලියන 19 ක මුදල් ලැබිලා තිබෙනවා.”
පළාත් බද වාර්තාකරුවන් පවසන්නේ අධිකරණ කටයුතු නිමා වීමෙන් පසු යාපනය මහේස්ත්‍රාත් සෙල්වනායගම් ලෙනින්කුමාර්, නීතිඥයන්, අතුරුදහන් තැනැත්තන් පිළිබඳ කාර්යාලයේ නිලධාරීන්, කැනීම් විශේෂඥයන් සමග ගොස් යාපනය, චෙම්මනි සිත්තුපාත්ති සමූහ සුසාන භුමිය නිරීක්ෂණය කළ බවයි.
කැනීම් භුමියේ ඇතැම් ස්ථාන වල ඒ වන විටත් වැසි ජලය රැදී පැවැති ඇති අතර මේ දිනවල ප්‍රදේශයට වැසි ඇද හැලෙන බැවින් මේ මොහොතේ කැනීම් කටයුතු ආරම්භ කළ නොහැකි බව කැනීම් කටයුතු භාර විශේෂඥයන් මහේස්ත්‍රාත්වරයාට දැනුම් දී තිබේ.
2025 නොවැම්බර් 3 වැනිදා මෙම නඩුව යළි කැදවීමට මහේස්ත්‍රාත්වරයා දින නියම කර ඇත.
මීට ඉහත අනුමත කරගත් මුදල් වලින් දින 45 ක් තිස්සේ සිදු කළ දෙවැනි අදියරේ කැනීම් කටයුතු 2025 සැප්තැම්බර් 06 වැනිදා දහවල් නිමා කරන විට සමුහ සුසානයෙන් මතු කරගෙන තිබු ළමා ලපටින්ගේ ද ඇතුළු මිනිස් අස්ථි 240 අතුරින් එකක් හැර සියලු ඇටසැකිලි ගොඩ ගෙන තිබුනි.
චෙම්මනි සිත්තුපාත්ති සමූහ සුසානයෙන් මිනිස් අස්ථි සමගම මේ වන තෙක් ගොඩගන්නා ලද පාරිහාරික වස්තු අතර ළදරු කිරි බෝතල්, බෝනික්කකු ඇතුළු සෙල්ලම් බඩු, ළමා පාවහන් සහ පාසල් බෑග් ද වෙයි.
ශ්‍රී ලංකාවෙන් මේ තාක් හමු වු විශාලතම සමුහ සුසානය ලෙස සැලකෙන්නේ බාල දරුවන් 28 ක් ඇතුළු මිනිස් සිරුරු කොටස් 376 ක් සොයාගත් මන්නාරම සතොස සමුහ මිනී වලයි.
