2000 සහ 2010 අතර සිවිල් යුද්ධය වාර්තා කිරීමේදී අවම වශයෙන් මාධ්‍යවේදීන් සහ මාධ්‍ය සේවකයන් 44 දෙනෙකු මිය ගොස් ඇත. අද වන තෙක්, මේවාට වගකිව යුතු කිසිදු අපරාධකරුවකු අත්අඩංගුවට ගෙන නොමැත.
"මේ මට්ටමේ දණ්ඩ විමුක්තිය මගින්, නිතිපතා තම ජීවිත පරදුවට තබන, ස්වයං-වාරණ ක්‍රියාත්මක කරන හෝ පිටුවහල්ව සේවය කරන රටේ ඉතිරිව සිටින ප්‍රවෘත්ති වාර්තාකරුවන්ට බියකරු පණිවිඩයක් යවයි," ජාත්‍යන්තර සත්‍යය සහ යුක්තිය ව්‍යාපෘතියේ (ITJP) විධායක අධ්‍යක්ෂ යස්මින් සූකා පැවසුවා ය.
අනාරක්ෂිතව පැවති නිමලරාජන්ගේ නිවස
ITJP සහ REDRESS එක්ව කර්තෘත්වය දරන ලද සහ ප්‍රකාශයට පත් කරන ලද පිටු 70 කින් යුත් මෙම වාර්තාව, BBC වාර්තාකරු නිමලරාජන් මයිල්වාගනම් ඝාතනය සම්බන්ධයෙන් ශ්‍රී ලංකා පොලිස් විමර්ශනය පිළිබඳ අධිකරණ විද්‍යාත්මක විශ්ලේෂණයක් ඉදිරිපත් කරන අතර, එය විමර්ශන අසාර්ථකත්වය පිළිබඳ පෙළපොත් නඩුවක් බවට සමාලෝචනය කරයි.
මෙහි දී අපරාධ ස්ථානය ආරක්ෂිත කිරීම හෝ ලේඛනගත කර නොතිබුණු අතර - ඡායාරූප ලබාගෙන හෝ අධිකරණ වෛද්‍ය සාක්ෂි එකතු කිරීම ද කර නොතිබුණි.
හමුදා මුරපොළවල් කිහිපයකින් වට වූ අධි ආරක්ෂක කලාපයක දැඩි ඇඳිරි නීතිය අතරතුර මෙම අපරාධය සිදු වුව ද, නිමලරාජන්ගේ නිවස කිසි විටෙකත් වට කර ආරක්ෂා කර තිබුණේ නැත. එදින රාත්‍රියේ රාජකාරියේ යෙදී සිටි ආරක්ෂක නිලධාරීන් කිහිප දෙනෙකු සම්මුඛ සාකච්ඡා කිරීමට වසර ගණනාවක් ගත වූ අතර බොහෝ දෙනෙකු හඳුනා ගැනීම හෝ ප්‍රශ්න කිරීම සිදු නොවීය. ගිනි අවි පිළිබඳ සාක්ෂි වැරදි ලෙස හැසිරවීම නිසා විශ්ලේෂණය පැහැදිලි කළ නොහැකි ලෙස ප්‍රමාද විය.
නිමලරාජන්ට එල්ල වූ මරණ තර්ජන හෝ ඔහුට ලැබුණු දුරකථන ඇමතුම් සම්බන්ධයෙන් කිසිදු පරීක්ෂණයක් සිදු නොකළ නමුත් ඒ වෙනුවට වටහා ගත නොහැකි ලෙස ඔහුගේ බැංකු ගිණුම විමර්ශනය කර ඇත. චෝදනා එල්ල වූ සැකකරුවන්ට නිදහසේ සැරිසැරීමට, තවත් මිනීමැරුම් සිදු කිරීමට සහ රටින් පිටවීමට පවා අවසර දී ඇති අතර, ඒ සඳහා ආරක්ෂක හමුදාවල සහාය ලැබුණු බව කියවේ. ප්‍රශ්න කිරීම්වල දී සැකකරුවන් හුදෙක් සම්බන්ධය ප්‍රතික්ෂේප කර නිර්දෝෂී බව ප්‍රකාශ කර තිබුණි. ඔවුන්ගේ ප්‍රකාශ මතුපිටින් සලකා බලා අපරාධය සම්බන්ධයෙන් චෝදනා එල්ල නොකර ඔවුන් නිදහස් කර ඇත. කනස්සල්ලට කරුණක් වන්නේ, නඩුවේ සැකකරුවන් නිතිපතා තැළීම් සහ පහරදීම් තුවාල සහිතව පැමිණ, ඔවුන්ට අත්අඩංගුවේ දී වධ හිංසා පමුණුවා ව්‍යාජ පාපොච්චාරණවලට අත්සන් කිරීමට බල කළ බවට චෝදනා කිරීමයි.
මේ අතර, ඝාතනයට වගකිව යුතු බවට චෝදනා එල්ල වන ඊළාම් මහජන ප්‍රජාතන්ත්‍රවාදී පක්ෂයේ (EPDP) නායක ඩග්ලස් දේවානන්දගෙන් ශ්‍රී ලංකා පොලිසිය කිසි විටෙකත් මෙම ඝාතනය සම්බන්ධයෙන් ප්‍රශ්න කර නොමැත. ඒ වෙනුවට, ඔහු 2000 සිට සෑම රජයක ම පාහේ කැබිනට් අමාත්‍යවරයෙකු ලෙස නැවත නැවතත් පත් කර ඇති අතර, 2024 දී පමණක් එම තනතුර අහිමි වූ නමුත් පාර්ලිමේන්තු මන්ත්‍රීවරයෙකු ලෙස දිගටම රැඳී සිට ඇත. ඊට වෙනස්ව, නිමලරාජන්ගේ මව සහ පියා තම පුතාගේ ඝාතනය සම්බන්ධයෙන් යුක්තිය බලාපොරොත්තුවෙන් කැනඩාවේ පිටුවහල්ව සිටියදී මිය ගියහ.
ලංකාවෙන් පලා ගිය සැකකරු
ශ්‍රී ලංකාව තුළ විශ්වාසදායක දේශීය වශයෙන් වන වගවීමක් නොමැති බැවින්, එක්සත් රාජධානිය මෙම ඓතිහාසික අපරාධය සම්බන්ධයෙන් පරීක්ෂණයක් ආරම්භ විය. 2022 පෙබරවාරි 25 වැනි දින, එක්සත් රාජධානියේ මෙට්‍රොපොලිටන් පොලිස් යුද අපරාධ කණ්ඩායම විසින්, 2000 දශකයේ මුල් භාගයේ ශ්‍රී ලංකා සිවිල් යුද්ධයට සම්බන්ධ යුද අපරාධ චෝදනා සම්බන්ධයෙන් ‘ක්‍රියාශීලී පරීක්ෂණයක්’ ලෙස හැඳින්වූ විමර්ශනයකින් අනතුරුව, නිමලරාජන් ඝාතනය සම්බන්ධයෙන් එංගලන්තයේ නෝර්තැම්ප්ටන්ෂයර් හි නම් නොකළ 48 හැවිරිදි පුද්ගලයෙකු අත්අඩංගුවට ගත් බව නිවේදනය කළේය.
යුද අපරාධ කණ්ඩායම ප්‍රසිද්ධ ආයාචනයක් නිකුත් කරමින් ඔවුන් තම පරීක්ෂණ දිගටම කරගෙන යන බවත් විමර්ශනයට සහාය විය හැකි සෘජු තොරතුරු ඇති ඕනෑම අයෙකුගෙන් ඇසීමට උනන්දුවෙන් සිටින බවත් ප්‍රකාශ කර ඇත. බ්‍රිතාන්‍ය පොලිසිය විසින් සැකකරුගේ අනන්‍යතාවය ප්‍රසිද්ධියට පත් නොකළ නමුත් ඔහු ‘නැපෝලියන්’ ලෙස හැඳින්වෙන ඊපීඩීපී සාමාජිකයෙකු බවට පුළුල් ලෙස විශ්වාස කෙරෙන අතර, ඔහු අත්අඩංගුවට ගැනීමට යාපනය මහේස්ත්‍රාත් අධිකරණය නියෝග කර තිබුණද ඔහු අත්අඩංගුවට ගැනීම මගහැර රටින් පලා ගොස් තිබුණි.
එක්සත් රාජධානියේ විමර්ශනය
2017 දී ITJP සහ REDRESS විසින් යුධ අපරාධ සහ මනුෂ්‍යත්වයට එරෙහි අපරාධ විමර්ශනය කරන එක්සත් රාජධානියේ මෙට්‍රොපොලිටන් පොලිසියේ ත්‍රස්ත විරෝධී විධානය යටතේ ඇති විශේෂඥ ඒකකයකට කළ යොමු කිරීමකින් පසුව එක්සත් රාජධානියේ විමර්ශනය සිදු විය. මෙම යොමු කිරීම නිසා 2001 දී යාපනයේ පැවති දේශපාලන රැලියක් අතරතුර සිදු කළා යැයි කියන අපරාධ සම්බන්ධයෙන් තවත් අත්අඩංගුවට ගැනීමක් 2023 දී සිදු විය.
"මෙම සිද්ධියෙන් පෙන්නුම් කරන්නේ අදාළ රට ක්‍රියා කිරීමට අපොහොසත් වන විට, බරපතළ මානව හිමිකම් උල්ලංඝනයන් සිදු කරන අපරාධකරුවන් වගකිව යුතු බවට පත් කිරීම සඳහා එක්සත් රාජධානිය වැනි රටවලට වැදගත් කාර්යභාරයක් ඉටු කළ හැකි ආකාරයයි," REDRESS හි අධ්‍යක්ෂ රූපට් ස්කිල්බෙක් පැවසීය.
නොනැසී පවතින නිමලරාජන් ගේ උරුමය
බීබීසී සිංහල සේවයේ ප්‍රධානියෙකු සහ දෙමළ මාධ්‍ය කිහිපයකට දායක වූ නිමලරාජන්, සිවිල් යුද්ධයේ උච්චතම අවස්ථාවේ උතුරු යාපනය අර්ධද්වීපයෙන් වාර්තා කළ ස්වාධීන හඬවල් අතර එකක් විය. මැතිවරණ ප්‍රචණ්ඩත්වය සහ ඡන්ද මංකොල්ලකෑම් සම්බන්ධයෙන් විවේචනාත්මක වාර්තා ප්‍රකාශයට පත් කිරීමෙන් ටික කලකට පසු, ශ්‍රී ලංකා රජයට සහයෝගය දක්වන පැරාමිලිටරි කණ්ඩායමක් වන ඊපීඩීපීය විසින් 2000 ඔක්තෝබර් 19 වන දින ඔහු ඝාතනය කරන ලදී.
නිමලරාජන්ගේ උරුමය නොනැසී පවතී: ලන්ඩනයේ බීබීසී හි රැස්වීම් ශාලාවක් ඔහුගේ නමින් නම් කර ඇති අතර, ඔහුගේ සගයන් වාර්ෂිකව යාපනයේදී ඔහු අනුස්මරණය කරති.
මතු සඳහන් සබැඳි ඔස්සේ මාධ්‍යවේදී නිමලරාජන් ඝාතනයේ වාර්තා බලන්න
ශ්‍රී ලාංකීය මාධ්‍යවේදීන් ඝාතන : නිමලරාජන් මෛල්වාගනම්ගේ නඩු විභාගය
KILLING SRI LANKAN JOURNALISTS: THE CASE OF NIMALARAJAN MYLVAGANAM
නිමලරාජන් ඝාතනයේ වාර්තාව ජනගත කිරීම අද (සැප්. 08)
මාධ්‍යවේදී නිමලරාජන් ඝාතනයේ වාර්තාව ජනගත කිරීම අද (සැප්තැම්බර් 08) සවස 02.30ට ශ්‍රි ලංකා පදනම් ආයතනයේ දී පැවැත්වේ.
එම අවස්ථාවේ දී: ජ්‍යේෂ්ඨ මාධ්‍යවේදිනි සහ සමාජ ක්‍රියාකාරිනියක වන මන්දනා ඉස්මයිල් අබේවික්‍රම, මුරසු පුවත් පතෙහි කර්තෘ එන්. විද්‍යාධරන් සහ අනිද්දා පුවත්පතෙහි ප්‍රධාන කර්තෘ කේ. ඩබ්ලියු ජනරංජන අදහස් දැක්වීමට නියමිත ය.
මීට අමතරව මාධ්‍යවේදීන් කිහිප දෙනකු ද කෙටි අදහස් දැක්වීමට නියමිත ය.
මෙම අවස්ථාව සඳහා සහභාගි වන්නැයි අතුරුදන් වුවන් ගේ පවුල් එකතුව ආරාධනා කරති.
