ගණුදෙනු පහසුකම් අධිකරණ පද්ධතියට හඳුන්වාදීම අගවිනිසුරු ප්‍රිති පද්මන් සුරසේන ගේ ප්‍රධානත්වයෙන් අද ( 10) ශ්‍රේෂ්ඨාධිකරණ පරිශ්‍රයේ දී සිදු කෙරිණ.
මෙම ගෙවුම් පද්ධති ස්වයංක්‍රීයකරණය මගින් ඉදිරියේ දී මහේස්ත්‍රාත් අධිකරණයේ සිට ශ්‍රේෂ්ඨාධිකරණය දක්වා වන: අධිකරණ දඩ ගෙවීම්, නඩු ගාස්තු, මුද්දර ගාස්තු, සහතික පිටපත් ගාස්තු යන සියලු ගෙවීම් කාඩ්පත් මගින් සහ මාර්ගගත ගෙවීම් පද්ධතිය හරහා අන්තර්ජාලය මගින් ගෙවීම් සිදුකිරීමට මහජනතාවට පහසුකම් සැලසේ.
නීතිඥවරුන්ට සහ මහජනතාවට ශ්‍රේෂ්ඨාධිකරණ නඩු කටයුතු සහ ගෙවීම් සිදු කිරීමේදී DEBIT සහ CREDIT කාඩ් මඟින් ගෙවීමේ පහසුව අද සිට ලබා දී ඇත.
අධිකරණ සේවා කොමිෂන් සභාවේ සාමාජික විනිසුරුවරුන් සහ ශ්‍රී ලංකා නීතීඥ සංගමයේ සභාපති නිතිඥ, රජිව් අමරසුරිය සහ ශ්‍රේෂ්ඨාධිකරණ රෙජිස්ට්‍රාර්වරයා සහ නියෝජ්‍ය රෙජිස්ට්‍රාර්වරු ද මෙම අවස්ථාවට සහභාගි වූහ.
ශ්‍රී ලංකාවේ අධිකරණ පද්ධතිය ඩිජිටල් කිරීම සඳහා ගරු අගවිනිසුරු ප්‍රීති පද්මන් සූරසේන ගේ මාර්ගෝපදේශනය යටතේ ක්‍රියාත්මක වන කඩිනම් වැඩපිළිවෙළ මෙම මස12 වන දින අධිකරණ සහ ජාතික ඒකාබද්ධතා අමාත්‍ය නීතිඥ හර්ෂණ නානායක්කාර ගේ සහභාගිත්වයෙන් කොළඹ අලුත්කඩේ විනිශ්චයකාරවරුන් ගේ පුහුණු ආයතන ශ්‍රවණාගාරයේ දී ආරම්භ කිරිමට නියමිතව ඇත.
ශ්‍රී ලංකා නීතීඥ සංගමයේ සභාපති නිතිඥ, රජිව් අමරසුරිය සහ නීතිඥ නිකිණි මාපිටිගම ද මෙම වැඩපිළිවෙළ සම්බන්ධයෙන් අදහස් පළ කළහ.
