ජනතා ගැටලු පෙන්වද්දි පාර්ලිමේන්තුවේ මයික්‍රෆෝන් විසන්ධි කරනවා - සජිත් ප්‍රේමදාස

හෙතෙම මෙම අදහස් පළ කළේ ගමින් ගමට දොරින් දොරට විපක්ෂ නායක ජංගම සේවය යටතේ මැදවච්චිය, කැබිතිගොල්ලෑව ප්‍රදේශයේ ගොවි ජනතාවගේ ගොවි ගැටලු සොයා බැලීම සඳහා මැදවච්චිය ප්‍රදේශයට ගිය අවස්ථාවේ දී ය.

එම අවස්ථාවේ දී වැඩි දුරටත් අදහස් දැක්වූ විපක්ෂ නායකවරයා...

ජනතාව ආණ්ඩු පාර්ශ්වයේ විවිධ රංගනවලට අහු වෙලා

විපක්ෂ නායකවරයා ලෙස මමත් විපක්ෂයේ සෙසු මන්ත්‍රීවරුනුත් නැගී සිටින්නේ පෞද්ගලික දේවල් පැවසීමට නෙවෙයි; ජනතා ගැටලු ඉදිරිපත් කිරීමට. ඒ නිසා ඒ අවස්ථාවේ එයට බාධා කරන එක, අදහස් ප්‍රකාශනයට බාධා පැමිණවීම බාල, පහත් ක්‍රියාවක්. විය යුත්තේ මයික්‍රෆෝන විසන්ධි කිරිම හෝ බාධා කිරීම නෙවෙයි; විපක්ෂය ඉදිරිපත් කරන ජනතාවගේ ගැටලුවලට සවන්දී ප්‍රායෝගික පිළිතුරු ලබා දීම යි.

අද ඇත්තේ විසඳුම් ලබා දීම නෙවෙයි, බොරු කතා ඉදිරිපත් කර විපක්ෂයේ කටවල් වහන යුගයක්. මෙය දේශපාලන නාට්‍යයක් නෙවෙයි; ජනතාවගේ ගැටලු රජය හමුවේ ඉදිරිපත් කර, ජනතා ගැටලුවලට විසඳුම් ලබා දීමට අවශ්‍ය මග පෙන්වීම සිදු කිරීමක්. 2020 වසරේ සිට මෙය ක්‍රියාත්මක වුණ නිසා මෙය දේශපාලන රංගන නෙවෙයි. ජනතාව ආණ්ඩු පාර්ශ්වයේ විවිධ රංගනයන්ට හසුවී බලා සිටියට විපක්ෂයක් ලෙස සමගි ජන බලවේගය රගපෑම්වලින් තොරව සැබෑ ලෙසම ජනතා ගැටලුවලට විසඳුම් ලබා දෙනවා.

ආණ්ඩුවේ නළු නිළි සංගමය

අද පොදු ජනතාව මුහුණ දෙන්නේ බරපතළ ගැටලුවලට වුනත් ඒවාට රජයට විසඳුම් නැහැ. රණසිංහ ප්‍රේමදාස මහතා ආරම්භ කළ ඇගලුම් කම්හල් අද වැසී ගොස් තිබෙනවා. දහස් ගණනකගේ රැකියා නැති වී තරුණ තරුණියන් පවා අනාථ වෙලා. ඊට අමතරව අලි මිනිස් ගැටුමට පවා විසඳුම් නැහැ. වගා හානියට, ජීවිත හානියට, දේපළ හානියට විධිමත් රක්ෂණ වැඩපිළිවෙළක් නැහැ. මැතිවරණ කාලයේ විදුලි වැට සකස් කරනවා කියපු අය දේශපාලන රංගනවල නිරත වෙමින් කුප්‍රකට නළුවන් වෙලා.

ජනතාව රජයන යුගයක් අපි බිහි කරනවා

වීවලට ලබා දෙනවා කියපු සහතික මිල අද නෑ. රුපියල් 120ට වී ගන්නවා කිව්වට අද රුපියල්105ටත් තෙත වී රුපියල් 90ටත් 95ටත් මිලදී ගෙන, ගොවියා සදාකාලිකව දුප්පතුන් බවට පත් කරවන මේ බොරුකාර රැවටිලිකාර වංචාකාර ක්‍රමවේදය පරාජය කළ යුතු යි.