පසුගිය රජයේ ඉඩම් මංකොල්ලය වත්මන් රජයත් අනුමත කරලා - සජිත් ප්‍රේමදාස

යන බලප්‍රදේශවල පවුල් 350ක පුද්ගලියන් 1000කට වැඩි ප්‍රමාණයක් 1972 සිට වසර 53ක් නොකඩවා ම අඛණ්ඩව ම බඩඉරිගු, වී ගොවිතැන, එළවළු ගොවිතැන, රටඉදි, කොමඩු ආදී වගා කටයුතු කළ ගොවිබිම් අක්කර 800ක් 2023 සිට නතර කර ඇති බවත්, 2024 අගෝස්තු මාසයේ නඩු දමා 2025 අධිකරණ නියෝගයක් මත මේ වගා බිම් තහනම් කර ඇතැයි විපක්ෂ නායක සජිත් ප්‍රේමදාස පැවසී ය.

ඔහු මේ අදහස් පළ කළේ අද ත්‍රිකුණාමලය ආසනයේ මුත්තු නගර් ගම්මානයේ ගොවීන්ගේ ඉඩම් ගැටලුව සම්බන්ධයෙන් සොයා බැලීමට ගිය අවස්ථාවේ දී ය.

එම අවස්ථාවේ දී වැඩි දුරටත් අදහස් දැක්වූ විපක්ෂ නායකවරයා...

ඉඩම් මෙන් ම වගා අයිතිය කොල්ල කෑමක්

1972 සිට මේ ප්‍රදේශයේ ජනතාව දිසාපතිවරු, ප්‍රාදේශීය ලේකම්වරු හමු වී මේ ඉඩම්වලට බලපත්‍ර ඉල්ලුම් කර තිබුණත් ඒවා ප්‍රතික්ෂේප කර තිබෙනවා. වසර 50කට වැඩි ප්‍රමාණයක් වගා කටයුතු කළ ඉඩම් වරායේ ඉඩම් කියා අයිතිවාසිකම් කියා ගොවිතැන තහනම් කර අක්කර 200ක් සෝලා බලශක්තිය වෙනුවෙන් සමාගම් ගණනාවකට ලබා දී තිබෙනවා.

සූරිය බලශක්තිය ප්‍රවර්ධනය කරනවාට විරුද්ධ නැහැ. නමුත් වගා භූමියේ අක්කර 800කින් අක්කර 200ක් මංකොල්ල කාලා සෝලා ව්‍යාපෘති සඳහා ලබා දීමට විරුද්ධ යි. සෝලා ව්‍යාපෘති සඳහා ඇති තරම් ඉඩම් තිබුණත් මේ පවුල් 350 ඉලක්ක කර වගා භූමිය විනාශ කර සෝලාවලට වෙන් කිරීම බරපතල ආසාධාරණයක්. ඒ වගේ ම මේ ක්‍රියාව ඉඩම් මෙන් ම වගා අයිතිය කොල්ලකෑමක්.

මුත්තුනගරකුලම් වැව විනාශ කරලා

මේ ඉඩම්වලට: පොහොර සහනාධාරය, ගොවි ණය, වගා ණය ආදිය ලබා දී තිබෙනවා. මේවා දුන් පසුගිය ආණ්ඩුවේ අයත් එකට එකතු වී මේ ඉඩම් කොල්ල කාලා. මැති ඇමතිවරු වගා කටයුතු ගැන සාකච්ඡාවලට පැමිණ වගා කටයුතු ගැන සොයා බලා ආශිර්වාද කළත් මෙසේ අනුමත වූ ගොවිබිම් පසුගිය ආණ්ඩුව මෙන්ම වත්මන් ආණ්ඩුවත් මේ ඉඩම් මංකොල්ලය අනුමත කර තිබෙනවා. පාසල්, කෝවිල්, පල්ලි ආදිය පවා බිහි වී තිබෙනවා. මේ වන විට මුත්තුනගරකුලම් වැව විනාශ කරලා; අනික් වැව් පවා විනාශ කරන්න යනවා.

ආරක්ෂක අංශ යොදවා ගොවිජනතාව බියවද්දවනවා

ධන බලය, රාජ්‍ය බලය උපයෝගී කර ගෙන මේ ආකාරයට ඉඩම් මංකොල්ල කන්න බැහැ. සමගි ජන බලවේග රජයක් යටතේ මේ ඉඩම් නැවත ලබා දෙනවා. එමෙන්ම වගා නොකරණ මුඩු බිම්වලින් සූර්ය බලශක්ති ව්‍යාපෘතිය ක්‍රියාත්මක කරන්න පුළුවන්. ඒ සඳහා වගා බිම් යොදා ගැනීම සිදු කිරීමට අවශ්‍ය නැහැ. සූර්ය බලශක්තිය ප්‍රවර්ධනය කළ යුත්තේ ගොවි බිම් සූරා ගෙන නෙවෙයි. අවම වශයෙන් වාරි පහසුකම් සහිත විකල්ප ඉඩම් ලබා දීමට රජයට හැකියාව තිබුණත් එය ද කරලා නැහැ. නඩු දමා ආරක්ෂක අංශ උපයෝගී කර ගෙන ගොවිජනතාව බියවද්දවනවා.