ඇෆ්ගනිස්තාන හිටපු නායකයෙකු මෙන්ම ඊයේ (18) තරගයේ දී සිය කණ්ඩායම වෙනුවෙන් ප්‍රහාරාත්මක ඉනිමක් ක්‍රීඩාකළ මොහොමඩ් නබිද ඒ අතර සිටියි.
ඔහු සිය 'X' ගිණුමේ දුනිත් සහ ඔහුගේ පියා එක්ව සිටින ඡායාරූපයක් පළකරමින් දුනිත්ගේ පවුලේ අයට හෘදයාංගම ශෝකය පළ කර ඇත.
"තම ආදරණීය පියාගේ වියෝව ගැන දුනිත් වෙල්ලාලගේ සහ ඔහුගේ පවුලේ අයට හෘදයාංගම ශෝකය පළකරනවා. ශක්තිමත්ව සිටින්න සහෝදරයා" යනුවෙන් පවසා තිබේ.
එමෙන්ම බංග්ලාදේශ විස්සයි20 නායක ලිටන් දාස් සිය ෆේස්බුක් ගිණුමේ සටහනක් තබමින් පවසා ඇත්තේ, දුනිත්ගේ පවුලට ශක්තිය ලබා දෙන්නැයි තමන් දෙවියන්ගෙන් අයැද සිටින බවයි.
"දුනිත් වෙල්ලාලගේ, ඔබ ශක්තිමත්ව ඉන්න.
ඔබේ පියා වන සුරංග වෙල්ලාලගේ වයස අවුරුදු 54 දී අභාවප්‍රාප්තවීම ඇසීම අතිශයින් කණගාටුයි. ඔහු හිටපු ක්‍රිකට් ක්‍රීඩකයෙක්.
දෙවියන්ගෙන් ඉල්ලා සිටිනවා ඔහුට සදාකාලික සාමය ලබා දී, මෙම අසීරු අවස්ථාවේදී දුනිත්ගේ පවුලට ශක්තිය ලබා දෙත්වා" යනුවෙන් දක්වා ඇත.
ඔවුන්ට අමතරව බංග්ලාදේශ ක්‍රීඩකයන් වන ටස්කින් අහ්මඩ්, තව්හිද් රිදෝයි ඇතුළු කිහිප දෙනෙකුම සිය ශෝකය පළකර තිබේ.
ශ්‍රී ලංකා ක්‍රිකට් කණ්ඩායමේ යොවුන් තුන් ඉරියව් ක්‍රීඩක දුනිත් වෙල්ලාලගේගේ පියා වන සුරංග වෙල්ලාගේ මහතා හදිසියේ ඇති වූ හෘදයාබාධයක් හේතුවෙන් ඊයේ (18) අභාවප්‍රාප්ත විය.
මියයන විට ඔහුගේ වයස අවුරුදු 54කි. හදිසියේ ඇති වූ හෘදයාබාධයක් හේතුවෙන් ඔහු පානදුර රෝහලට ඇතුළත් කළ අවස්ථාවේදී මියගොස් තිබිණ.
සුරංග වෙල්ලාලගේ මහතා මෙලෙස අභාවප්‍රාප්ත වී ඇත්තේ ඔහුගේ පුත්‍රයා වන දුනිත් වෙල්ලාලගේ ඇෆ්ගනිස්ථානය සමග ඊයේ රාත්‍රියේ ආසියානු කුසලාන ක්‍රිකට් තරඟාවලියේ තීරණාත්මක තරඟයට ක්‍රීඩා කරමින් සිටින අතරතුරයි.
තරඟය අවසානයේ ශ්‍රී ලංකා ක්‍රිකට් කණ්ඩායමේ කළමණාකරුවන් විසින් සිය පියාගේ අභාවය පිළිබඳව දුනිත් වෙල්ලාලගේට දැනුම්දී ඇත.
ඊයේ රාත්‍රියේ පැවති ශ්‍රී ලංකා - ඇෆ්ගනිස්ථාන තරගය අතරතුර අබුඩාබි හි ක්‍රීඩකයන් ඇඳුම් මාරුකරන කාමරයට වෙල්ලාලගේගේ පියාගේ අභාවය පිළිබඳ ඛේදජනක පුවත ක්‍රීඩක කාමරය ලැබී තිබිණ.
කණ්ඩායම් නිලධාරීන් මුලින්ම නිවසේ වෛද්‍ය හදිසි අවස්ථාවක් පිළිබඳව දුනිත්ට දැනුම් දී ඇති අතර මිනිත්තු කිහිපයකට පසු ඔහුගේ පියා මිය ගිය බව තහවුරු කර ඇත.
කණ්ඩායම් කළමනාකාරිත්වයෙන් එම පුවත ලැබීමෙන් පසු සංවේදී වූ වෙල්ලාලගේ ටික වේලාවකට පසු කණ්ඩායම් නවාතැන් ගන්නා හෝටලයට ආපසු ගොස් තම ශෝකයට පත් පවුල සමඟ එක්වීමට ගුවන් යානයකින් කොළඹ කරා පැමිණීමට නියමිතව තිබිණ. දුනිත් සමඟ කණ්ඩායම් කළමනාකරු මහින්ද හලංගොඩ ද ශ්‍රී ලංකාව බලා පිටත්වීමට නියමිතව සිටියේය.
තම කණ්ඩායම ඉහළට ඔසවා තැබීමට තීරණාත්මක ජයග්‍රහණයක් ලබා ගත් ශ්‍රී ලංකා ක්‍රීඩකයින් මෙම පුවතින් ශෝකයට පත්වූ අතර එය ශෝකය පළකිරීම වෙනුවෙන් නිහඬතාවයද පළකර ඇත.
මේ අතර ශ්‍රීලංකා ක්‍රිකට් කණ්ඩායමේ හිටපු ආරම්භක පිතිකරු චරිත් සේනානායක සිය සමාජ ජාල ගිණුමේ මේ පිළිබඳ සටහනක් තබා ඇත.
පහතින් දැක්වෙන්නේ චරිත්ගේ සටහනයි.
"වෙල්ලාගේ පියාගේ අභාවය ගැන ඇහුවම ඇත්තටම දුකයි. ඔහුගේ ආත්මය සමාදානයේ සැතපේවා.! තමන්ගේ දරුවා ජාතිය නියෝජනය කරන විට දෙමව්පියෙකු දරන බර මම හොඳටම දන්නවා. එය ආඩම්බරය, පීඩනය සහ පරිත්‍යාගය යන සියල්ල එක තැනකට එකතු වෙන තැනක්. මේක අපිත් එක්ක ඉන්න වගේම, මගේම ආදරණීය පියා ඇතුළු මියගිය හැම මවක්ම සහ පියෙක්ම ඉටුකරන දේ ඇතුළේ කරන පුංචි කැපවීමක් විතරයි"
