"කිරි ගොවීන්ගේ ජීවනෝපාය සඳහා මහවැලියෙන් ලබා දුන් හෙක්ටයාර 3025 අපිට ගැසට් කරලා දෙන්න කියලා ඉල්ලීම් කරලා තමයි අපි පාරේ සටන් කරමින් ඉන්නේ. අපි දින 730ක් තිස්සේ විසඳුමක් බලාපොරොත්තුවෙන් ඉන්නවා."
කිරි ගොවීන්ගේ ගැටළුවට විසදුම් ලබා දෙන ලෙස බල කරමින් මඩකලපුව සිත්තාන්ඩි පාසල ඉදිරිපිටදී 2023 වසරේ සැප්තැම්බර් 15 වැනි සිකුරාදා දෙමළ කිරි ගොවීන් ආරම්භ කළ විරෝධතාවයට වසර දෙකක් සම්පුර්ණ වු 2025 සැප්තැම්බර් 15 වැනිදා මයිලත්තමඩු මාදවනෙයි කිරි ගොවි සමිතියේ සභාපති සීනිතම්බි නිමලන් ජනාධිපතිවරයාගෙන් ඉල්ලා සිටියේ තමන්ගේ බඩ වියත තිරසාර ලෙස රැක දෙන විසඳුමක් ලබා දෙන ලෙසයි.
"NPP ආණ්ඩුවේ මන්ත්‍රී කන්දසාමි ප්‍රභු ඇවිල්ලා බැලුවා. නමුත් විසදුමක් නැ. නිලධාරීන් කිව්වේ තණබිම් ටිකෙන් ටික නිදහස් කරනවා කියලා. නමුත් කිසිවක් සිදුවී නැහැ. එම නිසා මෙම ගැටලුවට ස්ථිර විසඳුමක් ලබා දී පවුල් 3000 කගේ ජීවනෝපාය බේරා දෙන ලෙස අපි ජනාධිපතිවරයාගෙන් ඉල්ලා සිටිනවා."
මඩකලපුව සිත්තාන්ඩි පාසල ඉදිරිපිටදී 2023 වසරේ සැප්තැම්බර් 15 වැනි සිකුරාදා දෙමළ කිරි ගොවීන් මුල් වරට විරෝධතාව ආරම්භ කර තිබුනේ 2023 සැප්තැම්බර් 13 වැනිදා මඩකලපුව දිස්ත්‍රික් ලේකම් කාර්යාලයේ පැවැති ගොවි කමිටු රැස්වීමේදී කිරි ගොවීන්ගේ ගැටළුවට විසදුම් ලබා දීමට තමන්ට නොහැකි බව දිස්ත්‍රික් ලේකම් කමලාවතී පද්මරාජා පැවසීමෙන් පසුවයි.
එදින සිට දියත් කළ විරෝධතාවයට වසර දෙකක් සම්පුර්ණ වු 2025 සැප්තැම්බර් 15 වැනි සදුදා චිත්තාන්ඩි ගණ දෙවි කෝවිල අසලින් ආරම්භ කළ විරෝධතා පෙළපාලියකින් අරගල භුමිය වෙත පැමිණි කිරි ගොවීන් දියත් කළ උද්ඝෝෂණයට ඉලංගෙයි තමිල් අරසු කච්චි පාර්ලිමේන්තු මන්ත්‍රීවරුන් වන ෂානක්කියන් රාසමාණික්කම් හා ඉලයතම්බි ශ්‍රීනාත් ද එක්ව සිටියහ.
මඩකලපුව, මයිලත්තමඩු, මාදවනෙයි ප්‍රදේශයේ පිහිටි තෘණ භුමිය හිටපු ජනාධිපති ගෝඨාභය රාජපක්ෂ විසින් නැගෙනහිර ආණ්ඩුකාරධුරය සඳහා පත් කරන ලද වියත් මග ක්‍රියාකාරිණි අනුරාධා යහම්පත් විසින් ඒ සමයෙහි පදිංචි කළ සිංහල පවුල් 150 ට පමණ බඩ ඉරිඟු ඇතුළු බෝග වගා කිරීම සඳහා පවරා දීමත් සමග පාරම්පරිකව කිරි ගවයන් පාලනය කරන්නන් සහ වගාකරුවන් අතර පසුගිය කාලයේ අවස්ථා කිහිපයකදීම ගැටුම් ඇති වී තිබුනි.
කිරි ගොවීන් දෙවසරකට ඉහත දී පෙන්වා දී තිබුනේ ගවයන්ට කැවීම සඳහා භාවිත කළ අක්කර 6000 ක භුමියෙන් සරුසාරෙට තණකොළ වැවෙන අක්කර 2500 ට වැඩි ප්‍රදේශයක් සිංහල ගොවියන් බලහත්කාරයෙන් අල්ලා ගෙන සිටින බවයි.
වසරකට අධික කාලයක් තිස්සේ අඛණ්ඩව සිදු කළ අරගලයේ ප්‍රතිළුලයක් ලෙස සිංහල ගොවීන් එම භුමියෙන් ඉවත්ව ගිය ද කිරි ගවයන්ට තණ කෑම සදහා වෙන්කර තිබෙන භුමිය ගැසට් පත්‍රයක් මගින් මෙතෙක් පවරා නොදීම නිසා පෙර දී මුහුණ දුන් ගැටළුව යළිත් වරක් ඉස්මතු විය හැකි බව මයිලත්තමඩු මාදවනෙයි කිරි ගොවි සමිතියේ සභාපති සීනිතම්බි නිමලන් අවධාරණය කරයි.
