ඔහු මෙම අභියෝගය කළේ අද (24) පාර්ලිමේන්තුවේ දී පැවති විවාදයක දී ය.
එම විවාදයේ දී වැඩි දුරටත් අදහස් දැක්වූ අජිත් පී. පෙරේරා...
මීට පෙරත් ත්‍රිපුද්ගල කමිටුවක් පත් කරා
''සංස්කෘතික අරමුදලේ මිලියන 8000ක වංචාවක් වී ඇති බවට රජය විසින් පත් කළ කොමිෂන් සභාවක් මගින් සොයා ගෙන ඇති බවට නියෝජ්‍ය සංස්කෘතික ඇමති ගමගෙදර දිසානායක ප්‍රකාශයක් කරා. මේ චෝදනාව පසුගිය රජයත් මේ රජයත් පාර්ලිමේන්තුවේත් ඉන් පිටතත් දිගින් දිගටම මතු කළා.
ගමගෙදර දිසානායක ගේ ප්‍රකාශය අනුව මේ කාරක සභාව 2025 ජූලි 15 වැනිදා අ.ම.ප./25/1154/802/018 යන අමාත්‍ය මණ්ඩල පත්‍රිකාව අනුව මධ්‍යම සංස්කෘතික අරමුදල සම්බන්ධයෙන් පරීක්ෂා කිරීමට ත්‍රිපුද්ගල කමිටුවක් පත් කර තිබෙනවා. ඒ අනුව 2007 සිට 2020 දක්වා කාලසීමාවේ දී ආගමික ස්ථානවල විවිධ කටයුතු සඳහා මධ්‍යම සංස්කෘතික අරමුදල මගින් මූල්‍ය ආධාර ලබා දීමේ දී සිදුවූ අක්‍රමිකතා සොයා බැලීමට මෙම කමිටුව පත්කර තිබෙනවා.
වැරදි නොකරන අයට අසත්‍ය චෝදනා කරන්න එපා
මෙම කමිටුව මාස 2ක් තුළ වාර්තා ඉදිරිපත් කළ යුතු යි. එවැනි වාර්තාවක් ඇත්නම් සභාව දැනගත යුතු නිසා මේ කමිටුව මාස 2ක් ඇතුළත වාර්තාවක් සකස් කර තිබේ නම් ඉදිරිපත් කරන්න කියල අපි අභියෝග කරනවා. එසේ නොවන්නේ නම් මන්ත්‍රිවරුන් සඳහා වන ආචාරධර්ම සංග්‍රහය අනුව දඩුවම් ලැබිය යුතු වරදක්.
මේ ගැටලුව ගැන වසන්ත ජිනදාස මහ අධිකරණ විනිසුරුවරයාගේ ප්‍රධානත්වයෙන් යුත් කමිටුවක් හරහා පරීක්ෂණයක් සිදු කළා. එම පරීක්ෂණ වාර්තාව තිබෙනවා. එම නිසා වැරදි නොකරන අයට අසත්‍ය චෝදනා කරන්න එපා. මේ වාර්තාවේ පවා එය සඳහන් වෙනවා.
කමිටු පිට කමිටු දැමුවත් වරදක් සොයාගෙන නැහැ
මීට පෙර ගාමිණී සරත් එදිරිසිංහ, ගෝඨාභය ජයරත්න, හරිගුප්ත රෝහණධීර කමිටුව මගින්ද පුද්ගල ඉලක්ක චෝදනාවක් හෝ වංචාවක් සොයා ගෙන නැහැ. අල්ලස් කොමිසමට යොමු කළ පසු 2022.11 දින දරන නියෝගය අනුව අල්ලස් පනත යටතේ කටයුතු කිරීමට ප්‍රමාණවත් කරුණු නොමැති නිසා ඉදිරි කටයුතු සිදු නොකිරීමට තීරණය කර තිබෙනවා.
ඒබඳු මොහොතක කමිටු පිට කමිටු දැමුවත් අද වන තුරු වරදක් සොයාගත නොහැකි වෙලා තිබෙනවා. වගකිවයුතු නියෝජ්‍ය ඇමතිවරයකු ලෙස මේ කමිටු වාර්තාව ඉදිරිපත් කළ යුතුයි; එහෙමත් නැතිනම් සමාව ගත යුතු යි.''
