ඔහු මෙම අදහස් පළ කළේ, බත්තරමුල්ල පරිසර අමාත්‍යංශ ශ්‍රවණාගාරයේ ඊයේ (25) පැවති බලශක්ති කාර්යක්ෂමතාවෙන් යුත් විදුලි උපකරණ ප්‍රවර්ධනය කිරීමේ වැඩසටහන යටතේ ශ්‍රී ලංකා සුනිත්‍ය බලශක්ති අධිකාරිය විසින් සංවිධානය කරන ලද වායුසමීකරණ යන්ත්‍ර සඳහා විදුලි කාර්යක්ෂමතා ලේබල් හඳුන්වා දීම හා සම්බන්ධ වැඩසටහන අමතමිනි.
එම අවස්ථාවේ දී වැඩි දුරටත් අදහස් දැක්වූ අමාත්‍යවරයා
''පසුගිය දිනවල මා ඉන්දියාවේ සංචාරයක යෙදුණා. විදුලිබල ක්ෂේත්‍රයේ ඔවුන් ලබා ඇති දියුණුව ඉතා ඉහළයි. නවීන තාක්ෂණය හා නව සංකල්ප භාවිතා කරමින් ක්ෂේත්‍රයේ ලොකු ගමනක් යන්න ඔවුන්ට පුළුවන් වෙලා තියෙනවා. විදුලි ක්ෂේත්‍රය හා සම්බන්ධ ආයතනවල පරිපාලන ව්‍යුහයන් එහිදී විශාල වැදගත්කමක් දරණ බව මට පෙනී ගියා. එබැවින් විදුලිබල ප්‍රතිව්‍යුහගතකරණ වැඩපිළිවෙල අඛණ්ඩව ක්‍රියාත්මක කරමින් එම ක්ෂේත්‍රයේ අඛණ්ඩ වර්ධනය වෙනුවෙන් ක්‍රියාකරනවා.''
බලශක්ති කාර්යක්ෂමතාව ප්‍රවර්ධන වැඩපිළිවෙල යටතේ වායුසමීකරණ යන්ත්‍ර සඳහා බලශක්ති ලේබල් හඳුන්වා දීම හරහා වෙළදපොළේ ඇති වායු සමීකරණ යන්ත්‍රවල කාර්යක්ෂමතාව ඉහළ දැමීමත් ජාතික වශයෙන් විදුලි ඉල්ලුම කළමණාකරණය කර ගැනීමත්, පොසිල ඉන්ධන භාවිතය අවම කිරීමට සහය වීම තුළින් පරිසර ඉලක්ක ජය ගැනීමට දායකවීමත් අපේක්ෂා කරන අතර ශ්‍රී ලංකා සුනිත්‍ය බල අධිකාරිය ජාතික ප්‍රමිති ආයතනය ලංකා විදුලි සමාගම ඇතුළු ආයතන රැසක ප්‍රධානීන් වායුසමීකරණ යන්ත්‍ර නිෂ්පාදන හා බෙදාහැරීමේ සමාගම් ඇතුළු ක්ෂේත්‍රයේ පාර්ශවකරුවන් රැසක් මේ අවස්ථාවට එක්ව සිටියහ.
(සටහන | ශාන් මොහොමඩ්)
