බලහත්කාරයෙන් අතුරුදහන් කිරීම් පිළිබඳ එක්සත් ජාතීන්ගේ කමිටුව, එහි 29 වැනි සැසිවාරයේදී, ඊයේ (26) වැනි දින ජිනීවා නුවරදී ශ්‍රී ලංකාවේ පළමු කාලාන්තර වාර්තාව සමාලෝචනය කිරීමට නියමිතව තිබු අතර මෙම සමාලෝචනය සඳහා සහභාගී වන ශ්‍රී ලංකා නියෝජිත පිරිසේ නායකත්වය දරනු ලබන්නේ අධිකරණ හා ජාතික ඒකාබද්ධතා අමාත්‍ය, පාර්ලිමේන්තු මන්ත්‍රී, හර්ෂණ නානායක්කාර විසිනි.
මෙම සමාලෝචන රැස්වීමේ දී ලංකාවේ ත්‍රස්තවාදය වැළැක්වීමේ පනත සහ එහි භාවිතාව පිළිබඳව සාකච්ඡා කිරීමට නියමිතව ඇති අතර ශ්‍රී ලංකාව මගින් එයට ඉදිරිපත් කරනු ලබන වාර්තාවෙහි 61 සිට 65 වන ඡේද වන ත්‍රස්තවාදය වැළැක්වීමේ පනතට සිදු කරන කප්පාදුව සහ සාධාරණ නඩු විභාගයක් සඳහා පවතින අයිතිය පිළිබඳ වන වැඩ පිළිවෙද දක්වා ඇත.
එම ලිපියේ සදහන් වන අන්දමට ත්‍රස්තවාදය වැළැක්වීමේ පනතට 2022 අංක 12 පනත මගින් ගෙන ආ සංශෝධනය අනුව “අත් අඩංගුවට ගනු ලබන දින සිට මාස 12ක් ඉකුත් වීමෙන් පසුවත් එම තැනැත්තාට එරෙහිව නඩු විභාගය ආරම්භ කර නොමැති නම්, සැකකරුට ඇප දිය යුතු” ය. එම කරුණු පදනම් කරගනිමින් නඳුන් චින්තක වික්‍රමරත්න ගේ පියා ප්‍රශ්න කර සිටින්නේ නඩු විභාගය අවසන් වනතුරු සිය පුතා රඳවා ලබාගෙන සිටින්නේ කුමන පදනම යටතේ ද යන්න ය.
මතු පළ වන්නේ නඳුන් චින්තක වික්‍රමරත්න ගේ පියා 2025 සැප්තැම්බර් 26 ජිනීවාහී දී පැවති “බලහත්කාරී අතුරුදහන් කිරීම් පිළිබඳ සමාලෝචන රැස්වීම” වෙත ඉදිරිපත් කළ සම්පූර්ණ ලිපිය යි.
