රජයේ ආරක්ෂක අංශ විසින් උතුරේ පවත්වාගෙන යන ව්‍යාපාරයක් වසා දැමීමට ප්‍රාදේශීය සභාවක් නියම කළ බවට වාර්තාවන පළමු අවස්ථාව මේ බව විශ්වාස කෙරේ.
මුහුදුබඩපත්තු ප්‍රාදේශිය සභාවේ සභාපති සින්නරාජා ලෝගේෂ්වරන් පවසන්නේ ප්‍රදේශවාසී කරණවෑමියන් පිරිසකගෙන් ලද පැමිණිලි එම තීරණයට එළඹීමට හේතුවූ බවයි.
මෙලෙස වසා දැමීමට නිවේදන නිකුත් කර ඇත්තේ මුලතිව්, මුහුදුබඩපත්තු ප්‍රාදේශිය ලේකම් කොට්ඨාසයට අයත් කේපාපුලව්හි යුද හමුදාව විසින් වන සංරක්ෂණ දෙපාර්තමේන්තුව සතු ඉඩමක පවත්වාගෙන ගිය ‘බ්ලූ බෙල්ස් සැලූන්’ නම් වායු සමනය කරන ලද බාබර් සාප්පුවයි.
ජාතික ආරක්ෂාවේ නාමයෙන් යුද හමුදාව දෙමළ ජනතාවගේ ජීවිතවලට සහ ආර්ථිකයට බලපාන මෙවැනි ක්‍රියාකාරකම්වල නිරත වීම ඉතා නරක සිදුවීමක් ලෙස මුහුදුබඩපත්තු ප්‍රාදේශිය සභාවේ සභාපති සින්නරාජා ලෝගේෂ්වරන් පෙන්වා දෙයි.
“හමුදාව විසින් පවත්වාගෙන යනු ලබන කොණ්ඩා කපන ස්ථානය වසා දමන්න කියලා අපි නිවේදනය කරලා තියනවා. ජාතික ආරක්ෂාවේ නාමයෙන් හමුදාව අපගේ ජනතාවගේ ජීවිතවලට සහ ආර්ථිකයට බලපාන මෙවැනි ක්‍රියාකාරකම්වල නිරත වීම ඉතා නරක සිදුවීමකි.”
ප්‍රාදේශිය සභාව විසින් නිකුත් කළ නිවේදනයට අවනත නොවුනහොත් ඒ සම්බන්ධයෙන් නීතිමය පියවර ගන්නා බවත් ඉලංගෙයි තමිල් අරසු කච්චි (ITAK) නියෝජිතයකු වන මුහුදුබඩපත්තු ප්‍රාදේශිය සභාවේ සභාපති සින්නරාජා ලෝගේෂ්වරන් වැඩි දුරටත් පවසා තිබුනි.
“හමුදාවේ කාර්යය ප්‍රදේශයේ ආරක්ෂාව සහතික කිරීම මිසක් ජනතාවගේ රැකියාව කරන එක නෙමෙයි. මේක නිසා ජනතාවට බලපෑම් සිදු වෙනවා. හමුදාවේ මෙම ක්‍රියාව අපි දැඩි ලෙස හෙළා දකිනවා. මේ නිසා තමයි අපි දෙමළ නිජබිමෙන් හමුදාව ඉවත් කරන ලෙස ඉල්ලා සිටින්නේ. නිවේදනයෙන් පසු එය වසා දමනු ඇතැයි අපි බලාපොරොත්තු වෙනවා.”
යුද නිමාවෙන් පසු උතුරු නැගෙනහිර දෙමළ ජනයාගේ භුමිය බලහත්කාරයෙන් අත්පත්කරගනිමින්, සංචාරක කර්මාන්තය, කාෂිකර්මාන්තය ඇතුළු මහා හා සුළු පරිමාන ව්‍යාපාරවල යෙදී ඉන්නා බවට ආරක්ෂක හමුදාව වෙත පසුගිය සමයේ දිගටම චෝදනා එල්ල වී තිබුනි.
