පළාත් බද වාර්තාකරුවන් පවසන්නේ මන්නාරම පේසාලේ ප්‍රාදේශිය ලේකම් කොට්ඨාසයට අයත් පේසාලේ ග්‍රාමයේ සුළං ටර්බයින් සවිකිරීම සදහා භුමිය පරික්ෂා කිරිමට 2025 වප් පොහොය දිනයේ ජියෝ ඉංජිනියරින් (GEO ENGINEERING CONSULTANS (PVT) LTD ) සමාගමේ යන්ත්‍රෝපකරණ සමග එහි නිලධාරීන් පිරිසක් පැමිණ සිටි බවයි.
පොලීසිය බලා සිටියදීම විරෝධතා දක්වා ඔවුන් පසු බස්වන්නට ගම්වාසීන් සමත්ව ඇත.
පරිසරයටත්, ජන ජීවිතයටත් විනාශකාරී ලෙසින් මන්නාරම් දුපතේ ඉදිකෙරෙන සුළං බලාගාර සම්බන්ධයෙන් යළි සලකා බැලීමට ජනාධිපතිවරයා විසින් ප්‍රකාශයට පත් කළ මාසයක කාලය ගත වීමට පෙරම අලුතින් වැඩ කටයුතු අරඹා ඇති ආකාරය විරෝධතා කරුවන් පසුගිය සමයේ හෙලි කර තිබුනි.
ටෙන්ඩර් කැඳවා කොන්ත්‍රාත් ප්‍රදානය කර, මේ වනවිට මන්නාරම් දුපතේ ආරම්භ කර ඇති මෙගාවොට් 20ක සහ යෝජිත මෙගාවොට් 50 ක සුළං විදුලි බලාගාර දෙකෙහි ඉදි කිරීම් කටයුතු තාවකාලිකව අත්හිටුවීමට 2025 අගෝස්තු 13 වැනිදා ජනාධිපතිවරයා තීරණය කර තිබුනේ ඒ සම්බන්ධයෙන් ජනාධිපති කාර්යාලයේදී පැවැති සාකච්ඡාවකදීය.
ඉන් පසුව රජයේ නිලධාරීන් සමග පැවැති කිසිදු සාකච්ඡාවකින් සිය ගැටළුවලට විසදුම් නොලැබුනු බවට මන්නාරම් වාසීහු චෝදනා කරති.
සංවර්ධන ව්‍යාපෘති තවදුරටත් පමා කිරීමෙන් සිදුවන්නේ රටේ ආර්ථිකය ගොඩ නැගීමට තිබෙන අවස්ථාව මඟ හැරයාම පවසන ජනාධිපතිවරයා 2025 අගෝස්තු 13 වැනිදා අවධාරණය කර තිබුනේ සංවර්ධන ව්‍යාපෘතිවලට විරෝධතා දැක්වීම නිසා සිදු වන්නේ ආයෝජකයන්ට, කර්මාන්තකරුවන්ට සහන ලබාදීමට ආණ්ඩුවට නොහැකි වන බවයි.
පරිසරවේදීන්, සමාජ ක්‍රියාකාරීන් හා විරෝධතාකරුවන් පසුගියදා හෙලි කර තිබුනේ ජනාධිපතිවරයා විරෝධතාකරුවන්ට ලබා දුන් පොරොන්දු කඩ කරමින් මන්නාරම් දුපතේ අලුතින් ස්ථාපිත කිරීමට නියමිත සුළං බලගාර ව්‍යාපෘතිය ක්‍රියාත්මක කිරීම සඳහා අදාල අංශ වලට අවසර ලබා දී ඇති බවයි.
ශ්‍රී ලංකාවේ විශාලතම දූපත වන මන්නාරමේ ජන ජීවිතයට හා පරිසරයට විනාශය කැදවමින් පුනර්ජනනීය බලශක්තිය නිෂ්පාදනය කරන අධිබල සුලං බලාගාර තැනීමට විරෝධය දක්වන ප්‍රදේශවාසීන් එකහෙළා ඉල්ලා සිටින්නේ එම ව්‍යාපෘති වහාම මන්නාරම් දුපතෙන් ඉවතට ගෙන යන ලෙසයි.
