ඇමති ධූරයක් ලැබීම වරප්‍රසාදයක් ලෙස සැලකූ යුගය නිමා කළ බව මුදල් හා ක්‍රමසම්පාදන නියෝජ්‍ය ඇමැති ධුරයේ වැඩ භාර ගනිමින් කම්කරු ඇමති අනිල් ජයන්ත ප්‍රනාන්දු කියයි.
අනුර කුමාර දිසානායක ජනපති යටතේ අමාත්‍ය ධුර දැරීම වගකීම් පැවරීමක් බව ඔහු කියා සිටියි.
මුදල් හා ක්‍රම සම්පාදන නියෝජ්‍ය අමාත්‍යවරයා ලෙස දිවුරුම් දුන් ආචාර්ය අනිල් ජයන්ත ප්‍රනාන්දු සහ ආර්ථික සංවර්ධන නියෝජ්‍ය අමාත්‍යවරයා ලෙස දිවුරුම් දුන් නිශාන්ත ජයවීර අද (13) පෙරවරු මුදල් අමාත්‍යාංශයේ දී වැඩ භාර ගත්හ.
එහි දී අනිල් ජයන්ත ප්‍රනාන්දු කියා සිටියේ අමාත්‍ය ධුරයක් හිමි වීම වරප්‍රසාද හිමිවීමක් ලෙස අර්ථ දැක් වීම ඉතිහාසයට එක් වූ අදහසක් බවයි.
එය සැබැවින් ම වරප්‍රසාද හිමි වීමක් නොව වගකීමක් හිමි වීමක් බව ද ඇමතිවරයා සඳහන් කළේය.
මෙහි දී අදහස් දැක්වූ ආර්ථික සංවර්ධන නියෝජ්‍ය අමාත්‍ය නිශාන්ත ජයවිර,
ශ්‍රී ලංකාව බරපතල ආර්ථික අර්බුදයකින් ගොඩ ගැනීම සඳහා කටයුතු කළ නිලධාරින් මෙම අවස්ථාවේ වත්මන් පාලනයට සිය සහයෝගය ලබාදෙමින් රට තවදුරටත් ආර්ථික වශයෙන් ඉදිරියට රැගෙන යාම සඳහා සහය ලබා දෙනු ඇති බවට විශ්වාසයයි කීය.
මුදල් අමාත්‍යාංශ ලේකම් ආචාර්ය හර්ෂණ සූරියප්පෙරුම ප්‍රමුඛ නිලධාරීහු මෙම අවස්ථාවට එක්ව සිටියහ.
(සටහන | ජේ. මුණසිංහ)
