රටේ ක්‍රියාත්මක වන්නේ පීඩාකාරි රාජ්‍ය පාලනයක් - සජිත් ප්‍රේමදාස

ඔහු මෙම අදහස් පළ කළේ ගමින් ගමට දොරින් දොරට විපක්ෂ නායක ජංගම සේවාව යටතේ මතුගම නගර සභා ශ්‍රවණාගාරයේ දී මතුගම ප්‍රදේශයේ ජනතා ගැටලු සොයා බැලීම සහ සමගි ජන බලවේගයේ සාමාජික ප්‍රවර්ධනය සඳහා වන ජන හමුවක් සමග එක්වෙමිනි.

එම ජන හමුවේ දී වැඩි දුරටත් අදහස් දැක්වූ විපක්ෂ නායකවරයා...

රටේ දුප්පත්කම 50% දක්වා වර්ධනය වෙලා

අද වන විට රට තුළ නිර්මාණය වී තිබෙන තත්ත්වය සෑම අතකින්ම ව්‍යාකූල වෙලා. ජන සමාජය කියන පිරමීඩයේ පහළම තලයේ සිට ඉහළ තලය දක්වාත් ඉහළ තලයේ සිට පහළ තලය දක්වාත් සෑම අතකින්ම රටේ ක්‍රියාත්මක වන්නේ පීඩාකාරි රාජ්‍ය පාලනයක්. ජනතාවගේ කර පිට පීඩනය අසහනය පැටවීම නිසා මේ මොහොත වන විට රටේ දුප්පත්කම 50% දක්වා වර්ධනය වෙලා. බරපතළ ම ගැටලුව වන්නේ 2028 ණය ගෙවීම යි. වාර්ෂිකව ඇ. ඩොලර් බිලියන 5ක ණය ගෙවීමට නම් විදේශ සංචිත ඉහළ මට්මක පැවැතිය යුතු යි. අප රටට ඇති ප්‍රේෂණ ඉහළ මට්ටමක තිබිය යුතු යි.

ඊට අමතරව 5%ක අවම ආර්ථික වර්ධන වේගයක් අවශ්‍ය යි. ආර්ථික විශේෂඥයන් අනතුරු අඟවන ආකාරයට රටට එන සෘජු විදේශ ආයෝජන, අපනයන ප්‍රවර්ධනය, ආර්ථික වර්ධනය ප්‍රමාණවත් නොමැති බවට පවසන බවත් දුප්පත්කම වැඩි වී ජනතාවගේ අතේ ඇති මුදල් ප්‍රමාණය අඩු වෙනවා. එවිට පාරිභෝජනය, ආයෝජනය, නිෂ්පාදනය, අපනයනය, හා ඉතිරි කිරීම අඩු වෙනවා. මේ සියල්ල ඉහළ මට්ටමක පවත්වාගෙන යෑමට නම් ආර්ථික වර්ධන වේගය ඉහළ යා යුතු යි.

2028 වන විට මහා භයානක, අවදානම් තත්ත්වයක් නිර්මාණය වෙනවා

අද වන විට ක්ෂුද්‍ර කුඩා හා මධ්‍ය පරිමාණ කර්මාන්තකරුවන් අසරණ වී ව්‍යාපාරිකයන්ගේ සම්පත් දේපල වෙන්දේසි වෙනවා. ජනාධිපතිවරණය, මහමැතිවරණය සහ පළාත් පාලන මැතිවරණය නිසා මේ වෙන්දේසිය නතර කළත් ඔවුන්ගේ ණය ප්‍රතිව්‍යුහගත කළේ නැහැ. පසුගිය රජයත් මේ රජයත් කළේ ඡන්ද ලබා ගැනීමට වෙන්දේසිය නතර කිරීම යි. මේ වසරේ දෙසැම්බර් 31 වන විට මේ ණය මර උගුලේ තෙරපී ඇති ව්‍යාපාරික පන්තිය ණය නොගෙවීමේ හැකියාව තුළ ඔවුන්ගේ සම්පත්, දේපළ සියල්ල වෙන්දේසි වෙනවා. එය වන විට අප රටේ ආර්ථිකයට මරු පහරක් එල්ල වෙනවා.

 මේ රජයට ආර්ථිකය වර්ධනය කරන්නට හැකියාවක්, පැහැදිලි වැඩපිළිවෙළක්, කණ්ඩායමක්, දැක්මක් නැහැ. ආර්ථික සැලසුමක් නොමැති නිසා රට ඉබාගාතේ යනවා. 2028 වන විට මහා භයානක අවදානම් තත්ත්වයක් නිර්මාණය විය හැකි යි. අද රටට ලැබෙන්නේ සෘජු විදේශ ආයෝජනවලින් තුනෙන් එකක් පමණයි. ඉතිරි තුනෙන් දෙක නොලැබෙන බවට ජාත්‍යන්තර මූල්‍ය ආයතන අනතුරු අගවනවා. මේ ඉලක්ක සම්පූර්ණ කර ගත නොහැකි වුවහොත් ණය ගෙවා ගත නොහැකිව නැවත වරක් රට බංකොලොත් වෙනවා.

මේ ගැටලුවලට උත්තර සපයන්න රජයට තේරෙන්නෙ නෑ

මේ රට 2022 වගේ තත්ත්වයට වැටෙනවාට අපි කැමති නැහැ. ඒ තත්ත්වයට නොවැටෙන්න නම් මීට වඩා වැඩි වේගයකින් ආර්ථිකය වර්ධනය වී, අපනයන ප්‍රවර්ධනය වී, ජාතික ආර්ථික සැලසුමක් තිබිය යුතු යි. අවංකවම වත්මන් රජයට එවැනි සැලසුමක් නෑ. මම පසුගිය දිනක ගෙවිය යුතු ණය, ඒ සදහා අවශ්‍ය ආර්ථික වර්ධන වේගය සෘජු විදේශ ආයෝජන ගැන පාර්ලිමේන්තුවේ ප්‍රශ්නයක් ඇහුවත් තවමත් රජයෙන් උත්තර ලැබුණෙ නැහැ.