එහිදී විදුලිබල අමාත්‍යංශයේ සහ විදුලිබල මණ්ඩලයේ ආරක්‍ෂක අංශය ඒකාබද්ධ ජාතික නිදහස් විදුලි සේවක සංගමයේ සභාපති ප්‍රියන්ත මදුකුමාර සහ ලේකම් සමින්ද මාදුගොඩ ගමගේ සාකච්ඡාවෙන් ඉවත් කළ අතර විදුලිබල අමාත්‍යංශයේ ආරක්‍ෂක නිලධාරීන් කීපදෙනෙක් සමින්ද මාදුගොඩ ගමගේ ඉහළ මහලේ සිට ඇදගෙන ගොස් එළියට දැමූ ආකාරය දැකගත හැකිවිය.
එහිදී පොරබැදීමෙන් තුවාල ලැබූ යැයි කී චමින්ද ගමගේ 1990 ගිලන් රථයකින් රෝහල වෙත රැගෙන ගියේය.
දෙපාර්ශවය අතර සාකච්ඡාව පැවැත්වෙමින් තිබියදී සමින්ද ගමගේ කිසියම් ලිපියක් අමාත්‍යවරයාට ඉදිරිපත් කරමින් අමාත්‍යවරයාට ද එම තනතුර දැරිය නොහැකි යැයි පවසමින් විරෝධ පළකිරීමත් සමඟ ඔහු සහ සභාපතිවරයා එම ස්ථානයෙන් ඉවත්කරන ලෙස අමාත්‍යවරයා දැන්වීමෙන් පසුව ආරක්‍ෂක නිලධාරීන් ඔවුන් ඉවත්කිරීමට කටයුතු කර තිබේ.
මෙම සිද්ධිය පිළිබඳව කළ විමසුමකදී විදුලිබල මණ්ඩලයේ වෘත්තිය සමිති නියෝජිතයෙක් පැවසුවේ අමාත්‍යවරයා සුපුරුදු පරිදි ගැටලුවට ‘බලමු බලමු’ යැයි පැවසීම හේතුවෙන් සමින්ද ඊට විරුද්ධව අදහස් දැක්වූ බවත් එහිදී ඔහු ඉවත් කරන ලෙස අමාත්‍යවරයා නිල් පැහැදි නිල ඇදුමින් සැරසී සිටි විදුලිබල මණ්ඩලයේ ආරක්‍ෂයට පැවසූ බවත්ය.
එම වෘත්තීය සමිති නිලධාරීන් සාකච්ඡාවෙන් ඉවත් කළ ආකාරය පිළිගත නොහැකි බවත් ඔවුන් ඇදගෙන ආ විදුලිබල මණ්ඩලයේ ආරක්‍ෂක නිලධාරීන් ද එම මණ්ඩලයේ සේවකයන් බව ද මතකයේ තබාගත යුතු බවත් ඒ නිලධාරියා වැඩි දුරටත් සඳහන් කළේය.
මෙම සිද්ධිය පිළිබඳව බලශක්ති අමාත්‍යංශයේ නිලධාරියකුගෙන් කළ විමසුමකදී පැවසුවේ අදාල වෘත්තිය සමිති නියෝජිතයන් දෙදෙනාට එම සාකච්ඡාවට සහභාගිවීමේ අයිතියක් නොමැති වුවද සහභාගි වීමේ අවස්ථාව දුන් බවත් ඔවුන් සාකච්ඡාව කඩාකප්පල් කිරීමට උත්සහ කිරීම හේතුවෙන් ඉවත්කළ බවත්ය.
එම සිද්ධියෙන් පසුව සමින්ද ගමගේ පැවසුවේ ඒකාබද්ධ ජාතික නිදහස් සේවක සංගමය ලියාපදිංචි වෘත්තීය සමිතියක් බවත් ව්‍යවස්ථා විරෝධීව කටයුතු කිරීම නිසා අමාත්‍යවරයාට ලිපියක් භාරදීමට පැමිණි බවත්ය.
එහිදී ආරක්‍ෂක අංශ නිලධාරීන් තමන්ට පහරදීම හේතුවෙන් දැඩි අපහසුතාවට පත්ව සිටින බව ද සමින්ද මාදුගොඩ ගමගේ වැඩි දුරටත් සඳහන් කළේය.
( lankadeepa | යොහාන් භාසුර)
