''ආණ්ඩුව සහ විදුලි බල මණ්ඩලය අයි.එම්.එෆ් උපදෙස් සහ කොන්දේසිවලට අනුව 6.8%කින් විදුලි බිල වැඩි කරන්න ගිය අවස්ථාවේ පසුගිය දිනවල තමා ඇතුළු සජබය විදුලි බිල වැඩි කළොත් රට වටේ ගොස් මහපාරට බහිනවා යැයි කියු නිසා අද උදේ පාන්දරම ආණ්ඩුවේ විදුලි බිල වැඩි කිරීමේ තීරණය මහජන උපයෝගීතා කොමිසම ප්‍රතික්ෂේප කර තිබෙනවා.' යයි ඔහු කියා සිටියේ, ඊයේ මහනුවර දී මහනුවර දිස්ත්‍රික් සජබ පළාත් පාලන මන්ත්‍රී සංසදය සමඟ පැවැති හමුවක දී ය.
එම හමුවේ දී වැඩි දුරටත් අදහස් දැක්වූ විපක්ෂ නායකවරයා...
විපක්ෂයේ කාර්යභාරය වන්නේ තරු පහේ හෝටල්වල සිට සාකච්ඡා කිරිම නොව ජනතාව වෙනුවෙන් සැබෑ වගකීම ඉටු කිරිම යි. මහජන උපයෝගීතා කොමිසම මේ ගත් තීන්දුව සම්බන්ධයෙන් සිය ස්තූතිය පුද කර සිටිනවා. ආණ්ඩුවේ අසාධාරණ විදුලි බිල වැඩි කිරිම නතර වූයේ සමගි ජන බලවේගයේ බලපෑම නිසා. මාස 3කට විදුලි බිල වැඩි වීම අත්හිටුවීම පමණක් නොව ඉදිරි දින සති කිහිපය තුළ විදුලි බිල 33%කින් අඩුවිය යුතු යි.
ආණ්ඩුව අයි. එම්. එෆ්. එකේ වහලකු වෙලා
ජනාධිපතිවරයා ප්‍රමුඛ රජය පසුගිය මැතිවරණ වේදිකාවල කියූ ආකාරයට රු. 9000 බිල රු. 6000ත් රු. 3000 බිල රු. 2000 දක්වා 33%කින් අඩුවිය යුතු යි. එසේ නොකළහොත් මෙරට ජනතාව සමඟ මහපාරට බැස අරගල කරනවා. විදුලි බිල වැඩි කරන්න යැයි රජයට බලපෑමක් එන්නේ අයි. එම්. එෆ්. එකෙන්. වත්මන් රජය විපක්ෂයේ සිටින විට කිව්වේ පසුගිය රජයේ අයි. එම්. එෆ්. ගිවිසුම වෙනස් කරනවා කියලා. නමුත් ඔවුන් අදටත් ඒ ගිවිසුම වෙනස් කරේ නෑ. මොවුන් දුන් පොරොන්දු අමතක කර අයි. එම්. එෆ්. එකේ වහලකු වෙලා.
මේ රටේ ජනතාව දැන් ජීවත් වෙන්නෙ දැඩි පීඩනයකින්. අද රටෙන් 50%කටත් වඩා දුප්පත් වෙලා. මේ දුප්පත් ජනතාව මත විදුලි බිල වැඩි කර තවත් පීඩනයක් දෙන්න රජය කටයුතු කරනවා. ප්‍රායෝගික, සක්‍රීය, ඩීල් ගහන්නේ නැති, ජනතාව පාවා නොදෙන, ජනතාවාදී ජනහිතකාමී විපක්ෂයක් ලෙස සමගි ජන බලවේගය රටේ ජනතාවගේ මානව දේශපාලන අයිතිය සුරකිනවා.''
''සමගි ජන බලවේගය අවුරුදු හතරක් තුළ දැවැන්ත කාර්යභාරයක් ඉටු කළා''
2020 ආරම්භ වූ සමගි ජන බලවේගය මේ සිවු වසරක කාලය තුළ මෙරට විපක්ෂයක් ලෙස දැවැන්ත කාර්යභාරයක් ඉටු කර ඇතැයි ද විපක්ෂ නායක සජිත් ප්‍රේමදාස එහිදී පැවසී ය.
''රටේ වයසින් අඩු ප්‍රජාතන්ත්‍රික දේශපාලන පක්ෂය වන්නේ සමගි ජන බලවේගය යි. 2020 පෙබරවාරි මාසයේ ආරම්භ වූ සමගි ජන බලවේගය වසර 30ක් මැතිවරණ කළා යැයි සමහරු හිතා ගෙන හිටියට සමගි ජන බලවේගය මේ වන විට මුහුණ දීල තියෙන්නෙ මැතිවරණ 4කට පමණයි. මේ කාලය තුළ මෙරට විපක්ෂයක් ලෙස දැවැන්ත කාර්යභාරයක් සමගි ජන බලවේගය ඉටු කරා.''
මෙම පුවතට අදාල තවත් ලිපියක්
විදුලි බල මණ්ඩලය ඉල්ලා සිටි 6.8%ක විදුලි ගාස්තු වැඩි කිරීම මහජන උපයෝගීතා කොමිසම ප්‍රතික්ෂේප කළේ ඇයි?
