තම ජීවිත අවදානම හෝ ආරක්ෂාව ගැන නොසිතා රට ජාතිය ගැන සිතා කටයුතු කළ යුද වීරයන්ට ඉන්දියානු රජය සලකන්නේ ඉතාම ඉහළින් බවත් නමුත් ශ්‍රී ලංකා රජය එසේ නොසළකන බවත් මන්ත්‍රීවරයා තවදුරටත් පැවසිය.
පාරිභෝගික සහ නිෂ්පාදන ගොවි ජනතාව යන දෙපිරිසටම වැඩි වාසි අත්වන ආකාරයට භාණ්ඩ හා සේවා මිලදී ගැනීමට නව වෙළෙඳපොළ යාන්ත්‍රණයක් සකසා තිබෙන කසාගල සමූහ ව්‍යාපාරයේ මූලස්ථානය කොළඹ බත්තරමුල්ල කොස්වත්ත ප්‍රදේශයේ විවෘත කිරීමේ අවස්ථාවට එක්වෙමින් දයාසිරි ජයසේකර එසේ කීය.
එහිදී වැඩිදුරටත් අදහස් දැක්වූ ඔහු ඉන්දියාව රණවිරුවන්ට සළකන ආකාරයත්, ශ්‍රී ලංකාව සළකන ආකාරයත් අහසට පොළොව මෙන් අසමානතා පවතින බව පැහැදිලි කළේය.
ඔහු මෙසේ ද කීය.
''ඉන්දියාවේ දසලක්ෂයක් වූ හමුදාවට නායකත්වය දුන් ඉන්දියාවේ පළමු ෆීල්ඩ් මාර්ෂල්වරයා සෑම් මනුක්ෂ්‍යයා නම් වූ රණවිරුවාට විශ්‍රාම ලැබීමෙන් පසු සෑම පහසුකමක්ම සැපයීමට ඉන්දියන් රජය කටයුතු කළා. නමුත් ශ්‍රී ලංකාවේ තිස් වසරක යුද්ධය නිමා කිරීමට නායකත්වය සැපයූ හිටපු ජනාධිපති මහින්ද රාජපක්ෂ මහතා ආරක්ෂා කිරීමට ශ්‍රී ලංකා රජය කටයුතු කරන්නේ නෑ.''
තම ජීවිත අවදානම ගැන නොසිතා රට වෙනුවෙන් සහ ජාතිය ආරක්ෂාකරගැනීම වෙනවෙන් තීන්දු තීරණ ගෙන කටයුතු කළ ජනාධිපති මහින්ද රාජපක්ෂ මහතාගේ සේවය ඉතාම ප්‍රශංසනීයයි. යුද ජයග්‍රහණයෙන් පසු පාලන බලය ගෙනයෑමේදී යම් යම් වැරදි අඩුපාඩු එතුමා අතින් සිදුවන්නට ඇති. ඒවා පිළිබඳව වෙනම තර්ක කළ හැකියි. නමුත් ඔහු ජනාධිපතිවරයා ලෙස කළ සේවය සළකා බලා ජීවිත ආරක්ෂාව සහතික කිරීමට රජය කටයුතු කළ යුතුයි.
ලෝකයේ අසීරු, අමාරු තීන්දු තීරණ ගන්නා නායකයින් කාලයෙන් කාලයට බිහිවෙනවා. එවන් නායකයෙක් ලෙස මහින්ද රාජපක්ෂ මහතා සැලකිය හැකියි. අපේ රටේ තිස් වසරක යුද්ධය හිටපු ජනාධිපතිවරු ගණනාවකට නිමා කරන්නට නොහැකි වුණා. නමුත් මහින්ද රාජපක්ෂ මහතා එය නිමකිරීමට නායකත්වය ලබා දුන්නා. අද ඔහු කිසිම ආරක්ෂාවක් නැතිව තංගල්ලට වී සිටිනවා. තවම සතුරු කඳවුරු වලින් හිටපු ජනාධිපතිවරයාට තර්ජන පවතිනවා. මේවා පිළිබඳව විශ්ලේෂණයක් සිදුකොට එතුමාගේ ආරක්ෂාව සහතික කළ යුතුයි. තවමත් කොටි හෙවණැලි තිබෙනවා. ඒ නිසයි අප මහින්ද රාජපක්ෂ මහතාගේ ආරක්ෂාව සහතික කිරීමට කටයුතු කරන ලෙස රජයෙන් ඉල්ලා සිටින්නේ.''
(සටහන | ජේ.මුණසිංහ)
