"වර්තමානයේ ඉහල යන ජිවන වියදම සළකා වැටුප් වැඩි කරන ලෙස ඉල්ලීම ඉතාමත් සාධාරණ හා යුක්ති සහගත ඉල්ලීමක්. සියයට තිහකින් වැටුප් වැඩි වීමක් ලබා දෙන්න හාම්පුතුන් එකඟ වුනත්, එය සිදුවන්නේ අවුරුදු තුනක් ඇතුලේ අවුරුද්දකට සියයට දහය ගානේ එකතු වෙන විදිහට. මේ විදිහ අපි ප්‍රතික්ෂේප කරනවා," යැයි වතු කාර්ය මණ්ඩල සේවකයන්ගේ අයිතීන් වෙනුවෙන් පෙනී සිටින පැරණිතම වෘත්තීය සමිතියක් වන ලංකා වතු සේවා සංගමයේ ප්‍රධාන ලේකම් චතුර සමරසිංහ පවසයි.
හාම්පුතුන්ගේ සංගමය හා වතු සේවා සංගමය ඉදිරියේදී අත්සන් කිරීමට නියමිත සාමුහික ගිවිසුමට අදාලව මෙම වැටුප් සාකච්ජා පවත්වා තිබේ.
හාම්පුතුන්ගේ සංගමය විසින් මෙම යෝජනාව ඉදිරිපත් කර ඇත්තේ පස්වැනි වරටත් දෙපාර්ශවය අතර ඉකුත් දා පැවැත්වූ සාකච්ජාවේදී ය.
"වතු හිමියන් හොඳටම දන්නවා වැවිලි කර්මාන්ත ක්ෂේත්‍රයේ අපේ වගකීම ගැන. නිෂ්පාදන ක්‍රියාවලියේදී දායකත්වය ගැනත් ඔවුන් හොඳටම දන්නවා. ඒත් කිසිම ප්‍රථිපලදායක නොවන යෝජනා ඉදිරිපත් කරමින් දිගින් දිගටම කල් මරන්නේ ඇයි කියන එක අපිට ගැටළුවක් වගේම අපේ සාමාජිකයන් නොසන්සුන් කරවන්නක්," යැයි ලංකා වතු සේවා සංගමයේ ප්‍රධාන ලේකම්වරයා අවධාරණය කරයි.
වසරකට සියයට දහයක වැටුප් වැඩිවීමක් ඉහල යන ජිවන වියදම හමුවේ කිසිසේත් ප්‍රමාණවත් නොවුන ද, තවදුරටත් හාම්පුතුන් කෙරෙහි විශ්වාසය තබන ඔහු, හැකි ඉක්මනින් වතු කාර්ය මණ්ඩල සේවකයන් වෙනුවෙන් සාධාරණ වැටුප් වැඩිවීමක් ලබා දෙනු ඇතැයි අපේක්‍ෂාවෙන් පසුවේ.
මේ අතර ජනතා වතු සංවර්ධන මණ්ඩලය, ඇල්කඩුව වැවිලි සමාගම සහ රාජ්‍ය වැවිලි සංස්ථාව වැනි රජයේ පාලනය යටතේ පවතින ආයතන වල වතු කාර්ය මණ්ඩල සේවකයන්ට 2019 වසරේ සිට නොගෙවා ඇති සේවක අර්ථ සාධක අරමුදල් ගෙවීමට 2026 අයවැයෙන් මුදල් වෙන් කරන ලෙස වෘත්තීය සමිති විසින් ජනාධිපතිවරයාගෙන් ඉල්ලා තිබේ.
වතු කම්කරුවන්ට අමතරව කාර්ය මණ්ඩල සේවකයන් සඳහා ද පර්චස් 10 ක ඉඩම් අයිතියක් ලබා දෙන්න යන්න ජනාධිපතිවරයා වෙත යොමු කළ තවත් ඉල්ලීමකි.
