මෙය හුදෙක් මානුෂීය ආධාරයක් පමණක් නොව, ආර්ථික අර්බුදයෙන් පසු ශ්‍රී ලංකාව ක්‍රමයෙන් අත්කර ගනිමින් සිටින මූල්‍ය ස්ථාවරත්වය තහවුරු කිරීමට සහ දේශීය නිෂ්පාදන ආර්ථිකය ශක්තිමත් කිරීමට ලැබුණු සුවිශේෂී උත්තේජනයක් ලෙස ආර්ථික විශ්ලේෂකයෝ පෙන්වා දෙති.
කොටු දැල් ක්‍රමයට නව පණක්: ධීවර පවුල් සිය ගණනකට නොමිලේ යෙදවුම්
ධීවර, ජලජ හා සාගර සම්පත් අමාත්‍ය රාමලිංගම් චන්ද්‍රසේකර් සහ ශ්‍රී ලංකාවේ ජපාන තානාපති අකියෝ ඉසොමාතා (Akio Isomata) අතර මේ සම්බන්ධ නිල ගිවිසුම අත්සන් කෙරිණි.
එක්සත් ජාතීන්ගේ ආහාර හා කෘෂිකර්ම සංවිධානයේ (FAO) තාක්ෂණික දායකත්වය මත ක්‍රියාත්මක වන මෙම වැඩසටහන යටතේ නැගෙනහිර පළාතේ තෝරාගත් ජලාශ 30 ක ‘කොටු දැල්’ (Cage-culture) 200 ක් ස්ථාපිත කිරීමට නියමිතය.
මීට අමතරව, පීඩාවට පත් ධීවරයින් වෙනුවෙන් පළමු වගා චක්‍රය සඳහා අවශ්‍ය මත්ස්‍ය පැටවුන් සහ මත්ස්‍ය ආහාර සම්පූර්ණයෙන්ම නොමිලේ ලබාදීමටත්, නවීන තාක්ෂණික පුහුණුවක් සැපයීමටත් කටයුතු යොදා ඇත. ස්වභාවික විපතකින් ජීවනෝපාය අහිමි වූ ප්‍රජාවකට, නැවත හිස එසවීම සඳහා අත්වැලක් සැපයීම තුළින් සමාජයීය වශයෙන් විශාල සාධනීය බලපෑමක් මෙයින් අපේක්ෂා කෙරේ.
යටිතල පහසුකම් පුනර්ජීවනය සහ විදේශ විනිමය ආරක්ෂා වීම
2022 ආර්ථික කඩා වැටීමෙන් පසු ශ්‍රී ලංකාවේ ණය ප්‍රතිව්‍යුහගතකරණ ක්‍රියාවලියට මුලින්ම සක්‍රීයව දායක වූ ද්විපාර්ශ්වික ණයහිමියෙකු වන්නේ ජපානයයි. ණය ප්‍රතිසංවිධාන එකඟතාවලින් පසු, වසර තුනකට ආසන්න කාලයක් අත්හිටුවා තිබූ ජයිකා (JICA) ආයතනය හරහා ක්‍රියාත්මක වූ සංවර්ධන ව්‍යාපෘති රැසක් මේ වන විට නැවත ආරම්භ කර ඇත.
ගුවන් තොටුපළ නවීකරණය, ප්‍රවාහන හා නාගරික සංවර්ධන ව්‍යාපෘති සඳහා ජපානයෙන් ලැබෙන අඩු පොලී සහ දීර්ඝ කාලීන සහනදායී ණය පහසුකම් මෙරට විදේශ විනිමය සංචිතය ස්ථාවරව පවත්වා ගැනීමට සෘජුවම දායක වේ. විදේශීය ආධාර මත මෙරට ව්‍යාපෘති ක්‍රියාත්මක වන විට, යන්ත්‍ර සූත්‍ර හා අමුද්‍රව්‍ය ආනයනය සඳහා රජයේ ඩොලර් සංචිතය වැය කිරීමට සිදු නොවීම මෙහි ඇති ප්‍රධානතම වාසියයි.
මූල්‍ය ස්ථාවරත්වය සහ ජාත්‍යන්තර විශ්වාසය
ජාත්‍යන්තර මූල්‍ය අරමුදල (IMF) විසින් ශ්‍රී ලංකාවේ ආර්ථික ප්‍රතිසංස්කරණ ඇගයීමට ලක් කරමින් ඇමරිකානු ඩොලර් මිලියන 695 ක ඊළඟ ණය වාරිකය අනුමත කිරීමත් සමඟ මෙරට ආර්ථික විශ්වාසනීයත්වය ඉහළ ගොස් ඇත. එවැනි පසුබිමක, ජපානය වැනි ප්‍රබල රාජ්‍යයක් මෙරට සංවර්ධන හවුල්කරුවකු ලෙස නැවතත් පෙරමුණ ගැනීම ජාත්‍යන්තර ආයෝජකයින් ශ්‍රී ලංකාව දෙස ධනාත්මකව බැලීමට හේතු වනු ඇත.
මෙම සහයෝගීතාව හුදෙක් මූල්‍ය ආධාරයකට එහා ගිය, අර්බුදයකදී වගකිවයුතු රාජ්‍යයන් එකිනෙකා අත්වැල් බැඳගැනීමේ උදාර මිනිස් සමාජීය වටිනාකම කියාපාන්නකි.
(එස්.බී. ජයවර්ධන )
