කෙසේ වෙතත්, රාජ්‍ය ප්‍රසම්පාදන ක්‍රියාවලියේ සහ තාක්ෂණික ලේඛනවල ඇතුළාන්තය විමසා බැලීමේදී පෙනී යන්නේ, මෙම තත්ත්වය බොහෝ දෙනා සිතනවාට වඩා හාත්පසින්ම වෙනස් කාරණයක් බවයි.
අවලංගු වී ඇත්තේ සමස්ත ව්‍යාපෘතියම නොව, එක් තාක්ෂණික අංගයක් පමණයි!
මෙම මතභේදයට මූලිකම හේතුව වී ඇත්තේ ඊ-විදේශ ගමන් බලපත්‍ර වැඩසටහනේ එක් විශේෂිත සංරචකයකට අදාළ ප්‍රසම්පාදන ක්‍රියාවලියකි. ලංසුකරුවන් වෙත නිකුත් කර ඇති නිල ලේඛනවලට අනුව, බලධාරීන් විසින් අවලංගු කර ඇත්තේ DIE/PRO/PKI/2025 දරන ටෙන්ඩරයයි. මෙම ටෙන්ඩරය වෙන් කර තිබුණේ ඊ-විදේශ ගමන් බලපත්‍රවල ආරක්ෂාව තහවුරු කරන ‘පොදු යතුරු යටිතල පහසුකම්’ (Public Key Infrastructure - PKI) සහ ඊට අදාළ ගුප්ත ලේඛන තාක්ෂණ පද්ධතිය ස්ථාපිත කිරීම සඳහා පමණි.
ජාත්‍යන්තර ප්‍රමිතීන්ට අනුව ක්‍රියාත්මක වන මෙවැනි දැවැන්ත ජාතික ව්‍යාපෘතියක් යනු තනි ටෙන්ඩරයකින් නිමවන එකක් නොවේ. විදේශ ගමන් බලපත්‍ර පොත් මුද්‍රණය, චිප් (Chip) තාක්ෂණය, පුද්ගලීකරණ පද්ධති සහ ඩිජිටල් සහතික කිරීමේ යාන්ත්‍රණයන් ආදී විවිධ අංග රැසක එකතුවකි. ඒ අනුව, එක් සහායක තාක්ෂණික ටෙන්ඩරයක් අවලංගු වීම යනු සමස්ත ඊ-විදේශ ගමන් බලපත්‍ර ව්‍යාපෘතියම අත්හැර දැමීමක් නොවන බව ප්‍රසම්පාදන විශේෂඥයෝ පෙන්වා දෙති.
නෛතික අභියෝග සහ විනිවිදභාවය
මෙම ටෙන්ඩරය සම්බන්ධයෙන් මතුව ඇති ආරවුල් සහ සමාලෝචන ක්‍රියාවලීන්, රජයේ ප්‍රතිපත්තිමය තීරණයකට එරෙහිව වූ ඒවා නොවේ. ඒවා හුදෙක් ලංසුකරුවන් අතර පවතින තරඟකාරිත්වය, තාක්ෂණික ඇගයීම් සහ විනිවිදභාවය පිළිබඳ ගැටලු මත පදනම් වූවකි. ප්‍රගතිශීලී දේශපාලන-ආර්ථික දෘෂ්ටිකෝණයකින් බලන කල, මෙවැනි ක්‍රියාවලීන් තුළ නෛතික සහ තාක්ෂණික විනිවිදභාවය ආරක්ෂා කර ගැනීම දිගුකාලීනව රටේ මූල්‍ය විනය සහ ජාත්‍යන්තර විශ්වාසය තහවුරු කිරීමට හේතු වේ.
රජයේ නිල ප්‍රකාශයන් ද සනාථ කරන්නේ ශ්‍රී ලංකාවේ සංචාරක ලේඛන නවීකරණය කිරීම සහ ජාත්‍යන්තර සිවිල් ගුවන්සේවා සංවිධානයේ (ICAO) ප්‍රමිතීන්ට අනුකූල වීම සඳහා වන ඊ-විදේශ ගමන් බලපත්‍ර ව්‍යාපෘතිය ඉදිරියටම රැගෙන යන බවයි. ජාත්‍යන්තර තාක්ෂණික හවුල්කරුවන් සමඟ ඇති කරගෙන තිබූ මූලික එකඟතාවන්ට ද මෙම ටෙන්ඩර් අවලංගු කිරීමෙන් සෘජු බාධාවක් එල්ල නොවන බව රාජ්‍ය තාන්ත්‍රික ආරංචි මාර්ග පවසයි.
සබැඳි පුවත් :
ඊ-පාස්පෝට් ප්‍රොජෙක්ට් එක නැවතිලා නෑ: 'සමාජ මාධ්‍ය කැළඹූ' ටෙන්ඩර් අවලංගුවේ සැබෑ තත්ත්වය!
