රට තුළ අවශ්‍යතාව ඉක්මවූ පොහොර අතිරික්තයක් !!

යුරියා මෙට්‍රික් ටොන් 120,000ක් මේ වනවිටත් ගොවීන් අතර බෙදාහැර අවසන්

TSP සහ MOP පොහොර තොග ද ප්‍රමාණවත්ව පවතින බව නිල දත්ත පෙන්වයි

මෙවර යල කන්නය සඳහා රටට අවශ්‍ය ඇස්තමේන්තුගත ප්‍රමාණයට වඩා වැඩි පොහොර තොගයක් (පොහොර අතිරික්තයක්) මේ වන විට රට තුළ පවතින බව ජාතික පොහොර ලේකම් කාර්යාලය නිල වශයෙන් ප්‍රකාශ කර තිබේ.

එහි අධ්‍යක්ෂ චන්දන ලොකුහේවගේ සඳහන් කළේ, දැනට පවතින තොග අනුව රට තුළ කිසිදු පොහොර හිඟයක් මතු නොවන බවත්, ඉදිරි කාලසීමාවන් ඉලක්ක කරගනිමින් තවදුරටත් පොහොර තොග ආනයනය කිරීමට අවශ්‍ය සියලු පියවර ගෙන ඇති බවත්ය.

යල කන්නයේ කෘෂිකාර්මික කටයුතු උපරිම ඵලදායීතාවයකින් පවත්වාගෙන යාම සඳහා ගොවීන්ට අත්‍යවශ්‍ය වන යුරියා (Urea), ට්‍රිපල් සුපර් පොස්පේට් (TSP) සහ මියුරියේට් ඔෆ් පොටෑෂ් (MOP) යන ප්‍රධාන පොහොර වර්ග තුනම හිඟයකින් තොරව සැපයීමට රාජ්‍ය සහ පෞද්ගලික අංශය සමත්ව ඇත. මෙය ඉදිරි සහල් නිෂ්පාදනය සහ ආහාර සුරක්ෂිතතාව කෙරෙහි සෘජුවම බලපාන සාධකයකි.

පොහොර වර්ගීකරණය අනුව වත්මන් තත්ත්වය පෙන්වන කරුණු

යුරියා (Urea) පොහොර:
මෙවර යල කන්නය සඳහා අවශ්‍යතාව මෙට්‍රික් ටොන් 125,000ක් ලෙස ඇස්තමේන්තු කර තිබූ අතර, ඉන් මෙට්‍රික් ටොන් 120,000ක්ම මේ වන විට ගොවීන් වෙත බෙදාහැර ඇත. කන්නය ආරම්භ වන විට පැවති මෙට්‍රික් ටොන් 101,000ක තොගයට අමතරව තවත් මෙට්‍රික් ටොන් 50,000ක් ආනයනය කළ බැවින් රට තුළ පැවති සමස්ත තොගය මෙට්‍රික් ටොන් 152,000කි. දැනට සමාගම් සතුව තවත් මෙට්‍රික් ටොන් 32,000ක් පවතින අතර, ඉදිරි සතියේදී තවත් මෙට්‍රික් ටොන් 17,000ක් මෙරටට ලැබීමට නියමිතය.

TSP පොහොර:
මෙවර කන්නයේ අවශ්‍යතාව මෙට්‍රික් ටොන් 19,300ක් වන අතර මේ වන විට මෙට්‍රික් ටොන් 16,000ක් බෙදාහැර අවසන්ය. කන්නය ආරම්භ වන විට රට තුළ TSP පොහොර මෙට්‍රික් ටොන් 34,000ක් පැවති අතර, තවදුරටත් මට්ටම ස්ථාවර කරගැනීම සඳහා තවත් මෙට්‍රික් ටොන් 1,900ක් ආනයනය කිරීමට පියවර ගෙන තිබේ.

MOP පොහොර:
මෙම වර්ගයේ පොහොර සඳහා පවතින අවශ්‍යතාව මෙට්‍රික් ටොන් 42,000ක් වන අතර, රජය සහ පෞද්ගලික සමාගම් එක්ව මේ වන විට මෙට්‍රික් ටොන් 32,000ක් බෙදාහැර ඇත. කන්නය ආරම්භයේදී සමාගම් සතුව MOP මෙට්‍රික් ටොන් 39,000ක් පැවති අතර, පසුගිය මාස තුනක කාලය තුළ පමණක් තවත් මෙට්‍රික් ටොන් 10,000ක් අලුතින් ආනයනය කර ඇත.