මත්ද්‍රව්‍ය වැරදි සහ විහාරාධිපති නමකගේ ළමා අපයෝජන චෝදනා හමුවේ දේශපාලන නායකයන් නිහඬයි
ජ්‍යෙෂ්ඨ හිමිවරුන්, සිවිල් සමාජය සහ අනෙක් ආගමික නායකයන්ගෙන් සමන්විත කමිටුවක් පත් කරන්නැයි යෝජනාවක්
ශ්‍රී ලංකාව තුළ බුද්ධ ශාසනයේ චිරස්ථිතිය සහ ආරක්ෂාව වෙනුවෙන් වහාම ක්‍රියාත්මක වන පරිදි කඩිනම් ව්‍යුහාත්මක ප්‍රතිසංස්කරණ සිදුකළ යුතු බව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග විශේෂ වීඩියෝ ප්‍රකාශයක් නිකුත් කරමින් අවධාරණය කර සිටියි.
ඇය පෙන්වා දෙන්නේ මහාසංඝරත්නයේ ඇතැම් පාර්ශවයන් සම්බන්ධයෙන් වරින් වර වාර්තා වන විනය විරෝධී බරපතළ චෝදනා හේතුවෙන්, බෞද්ධ ජනතාවගේ විශ්වාසය සලිත වෙමින් පවතින අතර විශේෂයෙන්ම තරුණ පරපුර අතර ආගම කෙරෙහි පවතින ගෞරවය ගිලිහී යාමේ අවදානමක් මතුව ඇති බවයි.
සමාජයීය සහ ආගමික වශයෙන් සංවේදී මෙන්ම තීරණාත්මක ගැටලුවක් සම්බන්ධයෙන් මෙරට හිටපු රාජ්‍ය නායිකාවක සෘජුව මැදිහත් වෙමින්, සාසනික ප්‍රතිසංස්කරණ සඳහා නීතිමය සහ පරිපාලනමය රාමුවක් සකස් කරන ලෙස රජයට සහ මහානායක හිමිවරුන්ට නිල වශයෙන් බලකර සිටීම දේශපාලන හා ආගමික ක්ෂේත්‍රයේ දැඩි අවධානයට ලක්ව තිබේ.
චන්ද්‍රිකා බණ්ඩාරනායක කුමාරතුංග මතු කරන ප්‍රධාන කරුණු 3ක්
විශ්වාසය පළුදු කළ මෑතකාලීන සිදුවීම්:
මත්ද්‍රව්‍යවලට අදාළ වැරදි සම්බන්ධයෙන් භික්ෂූන් වහන්සේලා අත්අඩංගුවට පත්වීමේ සිදුවීම් සහ ප්‍රමුඛ පෙළේ බෞද්ධ විහාරස්ථාන අටක විහාරාධිපති ධූරය දැරූ හිමි නමක විසින් වසර දෙකක කාලයක් තිස්සේ තරුණ දැරියක ලිංගික අපයෝජනයට ලක් කළ බවට එල්ල වී ඇති බරපතළ චෝදනා පිළිබඳව ඇය මෙහිදී සෘජුවම සඳහන් කරයි. මෙවැනි සිදුවීම් හමුවේ රටට ආදරය කරන බොහෝ පිරිසක් දැඩි කනස්සල්ලට පත්ව සිටිය ද, දේශපාලන නායකයන් මේ පිළිබඳව නිශ්ශබ්දතාවයක් රැකීම කණගාටුවට කරුණක් බව ඇය පවසයි.
මහානායක හිමිවරුන් වෙත කළ දැනුම්දීම:
මෙම අර්බුදයෙන් බුද්ධ ශාසනය නිදහස් කරගැනීම සඳහා අවශ්‍ය ප්‍රතිසංස්කරණ හඳුන්වා දීමට මහාසංඝරත්නය පෙරමුණ ගත යුතු බව පවසමින් තමන් මහා නායක හිමිවරුන් වෙත ලිඛිතව කරුණු දැනුම් දුන් බවත්, ඒ සඳහා උන්වහන්සේලාගෙන් යහපත් ප්‍රතිචාර ලැබුණු බවත් හිටපු ජනාධිපතිනිය හෙළි කරයි.
ප්‍රතිසංස්කරණ සඳහා කමිටුවක් සහ නීතිමය රාමුවක්:
පවතින තත්ත්වයට පිළියම් සෙවීම සඳහා ජ්‍යෙෂ්ඨ භික්ෂූන් වහන්සේලා, සිවිල් සමාජ නියෝජිතයන් සහ අනෙකුත් ආගමික නායකයන්ගෙන් සමන්විත විශේෂ කමිටුවක් පත්කරන ලෙස ඇය යෝජනා කරයි. එම කමිටුව මඟින් ලබාදෙන නිර්දේශ ප්‍රායෝගිකව ක්‍රියාත්මක කිරීම සඳහා අවශ්‍ය නීතිමය රාමුව සකස් කර දීම වත්මන් රජයේ වගකීමක් බව ද ඇය පෙන්වා දෙයි.
ආගමික ආයතන සහ එහි පිරිසිදුභාවය සුරැකීම පාලකයන්ගේ මෙන්ම පොදු පුරවැසියන්ගේ ද හවුල් වගකීමක් බව පවසන කුමාරතුංග හිටපු ජනාධිපතිවරිය, සමාජය තුළ සිදුවන මෙවැනි වැරදි ක්‍රියාවලට එරෙහිව මහජනතාව තවදුරටත් නිශ්ශබ්දව නොසිටිය යුතු බව ද සිය ප්‍රකාශය මඟින් වැඩිදුරටත් අවධාරණය කර සිටියි.
