මෙවර අයවැය ප්‍රතිපාදනවලින් දිගුකාලීන තිරසාර සැලසුම්; කොළඹ නගර සභාව, UDA සහ ඉඩම් සංවර්ධන සංස්ථාව එකම පෙරමුණකට
කොළඹ නගර මධ්‍යයේ පිහිටි ඓතිහාසික බේරේ වැව මුහුණ දී ඇති දැඩි පරිසර දූෂණයට ක්ෂණික සහ කෙටිකාලීන විසඳුමක් ලෙස, ඒ සඳහා මුහුදු ජලය ඇතුළු කර වැව පිරිසිදු කිරීමේ විශේෂ තාක්ෂණික ව්‍යාපෘතියක් කඩිනමින් ආරම්භ කිරීමට සැලසුම් කර තිබේ.
මෙම සුවිශේෂී ව්‍යාපෘතිය සඳහා අවශ්‍ය සම්පූර්ණ මූල්‍ය පිරිවැය දැරීමට ශ්‍රී ලංකාවේ ප්‍රමුඛ පෙළේ ව්‍යාපාරිකයෙකු මෙන්ම ප්‍රවීණ ඉංජිනේරුවරයෙකු වන නහිල් විජේසූරිය සිය එකඟතාව පළ කර ඇත.
ගංගාරාමයේදී ගත් තීරණාත්මක පියවර
හුණුපිටිය ගංගාරාම විහාරාධිපති, පූජ්‍ය ආචාර්ය කිරින්දේ අස්සජී නායක හිමිපාණන් වහන්සේගේ ප්‍රධානත්වයෙන් සහ උපදෙස් පරිදි බේරේ වැව පිරිසිදු කිරීම සහ අලංකරණය කිරීම සඳහා වන විශේෂ සාකච්ඡාවක් අද (09) විහාරස්ථාන පරිශ්‍රයේදී පැවැත්විණි.
ඒකාබද්ධ රාමුව:
රාජ්‍ය සහ පෞද්ගලික අංශ ඒකාබද්ධ කරමින් පැවැති මෙම සාකච්ඡාවේදී බේරේ වැවට මුහුදු ජලය ගලා ඒමට සැලැස්වීම හරහා එහි පවතින දුර්ගන්ධය සහ අපවිත්‍ර ස්වභාවය ක්ෂණිකව මර්දනය කරන ආකාරය පිළිබඳ තාක්ෂණික කරුණු විශ්ලේෂණය කෙරිණි.
අයවැය මුදලින් ක්‍රියාත්මක වන තිරසාර සැලසුම:කෙටිකාලීන පිරිසිදු කිරීම්වලින් ඔබ්බට යමින් බේරේ වැවේ අලංකාරය සහ පවිත්‍රතාව තිරසාරව පවත්වාගෙන යාම සඳහා වන දිගුකාලීන ව්‍යාපෘති මෙවර රජයේ අයවැය ප්‍රතිපාදන යටතේ ක්‍රියාත්මක කිරීමට තීරණය කර ඇත.
ආයතන තුනක මැදිහත් වීම:
මෙම දිගුකාලීන සැලැස්ම සාර්ථක කරගැනීම සඳහා කොළඹ මහා නගර සභාව (CMC), නාගරික සංවර්ධන අධිකාරිය (UDA) සහ ශ්‍රී ලංකා ඉඩම් සංවර්ධනය කිරීමේ සංස්ථාව යන ආයතන ඒකාබද්ධව ඉදිරි මෙහෙයුම් කටයුතු සිදු කිරීමට නියමිතය.
