* සාම්ප්‍රදායික සහ සමාජ මාධ්‍ය මඟින් අධිකරණ ක්‍රියාවලීන් වැරදි ලෙස අර්ථ ගැන්වීම ප්‍රබල අභියෝගයක්
මුල් අවස්ථා අධිකරණවල, විශේෂයෙන්ම මහේස්ත්‍රාත් අධිකරණවල විනිසුරුවරුන් මුහුණ දෙන වඩාත්ම සංවේදී, සංකීර්ණ සහ අභියෝගාත්මක කාර්යය වන්නේ සැකකරුවෙකුට ඇප ප්‍රදානය කරන්නේද නැද්ද යන්න තීරණය කිරීම බව ජ්‍යෙෂ්ඨ ශ්‍රේෂ්ඨාධිකරණ විනිසුරු යසන්ත කෝදාගොඩ ප්‍රකාශ කරයි.
විනිසුරුවරයකු තමා සතු ඉතා සීමිත කාල සීමාව තුළ මෙම නිවැරදි තීරණය ගත යුතුව ඇත්තේ පුද්ගලයෙකු අත්අඩංගුවට පත්වීම සහ රක්ෂිත බන්ධනාගාරගත කිරීම ඔහුගේ මූලික අයිතිවාසිකම් කෙරෙහි සෘජුවම බලපාන බැවින් යැයි ද හෙතෙම පෙන්වා දෙයි.
ශ්‍රේෂ්ඨාධිකරණ විනිසුරුවරයා මේ බව අවධාරණය කළේ අධිකරණ ක්ෂේත්‍රයේ ප්‍රභූන් සහ විද්වතුන් අමතා පවත්වන ලද විශේෂ දේශනයකදීය.
වින්දිත පාර්ශවය සහ නිර්දෝෂීභාවයේ පූර්ව නිගමනය
අධිකරණ ක්‍රියාවලියකදී පොලිසිය ඇතුළු පැමිණිල්ල සහ විත්ති පාර්ශවය පමණක් සක්‍රියව පෙනී සිටියද, විනිසුරුවරයා සැමවිටම වින්දිත පාර්ශවයේ අපේක්ෂාවන් පිළිබඳව සංවේදී විය යුතු බව විනිසුරු යසන්ත කෝදාගොඩ මෙහිදී ප්‍රකාශ කළේය. නීතියේ පවතින "නිර්දෝෂීභාවයේ පූර්ව නිගමනය" (Presumption of Innocence) පිළිබඳව සාමාන්‍ය වින්දිතයන්ට පුළුල් අවබෝධයක් නොමැති අතර, ඔවුන්ගේ එකම සහ ප්‍රධාන අපේක්ෂාව වන්නේ සැකකරු වහාම රක්ෂිත බන්ධනාගාරගත කිරීම පමණක් බව ද හෙතෙම පෙන්වා දෙයි.
එමෙන්ම, දේශපාලනික වශයෙන් සංවේදීතාවයක් පවතින නඩුවලදී මහජනතාව අධිකරණ තීන්දු දෙස පැහැදිලි හෝ අපක්ෂපාතී කණ්ණාඩියකින් නොබලන බවත්, ඔවුන් ඒ දෙස බලන්නේ තමන්ගේ පෞද්ගලික දේශපාලන මත සහ සමාජ ආකල්ප නමැති "ටින්ටඩ් වීදුරුවකින්" (Tinted glass) බවත් විනිසුරුවරයා උදාහරණ සහිතව පැහැදිලි කළේය.
නීතිමය රාමුව සහ මාධ්‍යවලින් එල්ල වන බලපෑම
විනිසුරුවරුන් තීරණ ගැනීමේදී ලිඛිත නීතියට පමණක් නොව, අදාළ නීති සම්පාදනය කළ පාර්ලිමේන්තුවේ සැබෑ චේතනාව (Intent of Parliament) මෙන්ම ඉහළ අධිකරණ මඟින් විවිධ නඩු තීන්දු ඔස්සේ ලබා දී ඇති නීතිමය අර්ථ නිරූපණයන් සැළකිල්ලට ගැනීමට ද නීතිමය වශයෙන් බැඳී සිටින බව මෙහිදී අවධාරණය කෙරුණි.
වර්තමාන විනිසුරුවරුන් මුහුණ දෙන ප්‍රබලතම සහ බරපතලම අභියෝගය වන්නේ සාම්ප්‍රදායික මාධ්‍ය මෙන්ම සමාජ මාධ්‍ය (Social Media) ජාලයන් ක්‍රියාත්මක වන ආකාරය බව ද ශ්‍රේෂ්ඨාධිකරණ විනිසුරුවරයා පවසයි. බොහෝ අවස්ථාවලදී මාධ්‍ය මඟින් අධිකරණ ක්‍රියාවලීන් හෝ විනිසුරුවරුන්ගේ ප්‍රකාශයන් තමන්ට අවශ්‍ය පරිදි, සුවිශේෂී ආකාරයකින් වැරදි ලෙස අර්ථ දක්වමින් ප්‍රචාරය කරන බව පෙන්වා දුන් විනිසුරු යසන්ත කෝදාගොඩ , ඊට නිදසුනක් ලෙස තමන්ගේම පෞද්ගලික අත්දැකීමක් ද දේශනය අතරතුරදී සිහිපත් කළේය.
අධිකරණයේ ස්වාධීනත්වය සහ නීතියේ ආධිපත්‍යය ආරක්ෂා කර ගැනීම උදෙසා විනිශ්චයකාරවරුන් මෙවැනි වටපිටාවක දැඩි අභියෝගාත්මක තත්ත්වයන්ට මුහුණ දෙන බව මෙම දේශනයේදී ඔහු වැඩිදුරටත් අනාවරණය කළේය.
