එයාර් බස් අල්ලස් නඩුව: නාමල්ට එරෙහිව ත්‍රිපුද්ගල විනිසුරු මඩුල්ලක්?

ශ්‍රීලංකන් ගුවන් සමාගමට එයාර් බස් ගුවන් යානා මිලදී ගැනීමේදී සිදුවූ බව කියන මහා පරිමාණ අල්ලස් ගනුදෙනුව පිළිබඳ විමර්ශන සම්පූර්ණයෙන්ම අවසන් කර ඇති බව අල්ලස් හෝ දූෂණ චෝදනා විමර්ශන කොමිසම කොළඹ ප්‍රධාන මහේස්ත්‍රාත් අධිකරණය හමුවේ තහවුරු කළේය.

කොළඹ ප්‍රධාන මහේස්ත්‍රාත් අසංග එස්. බෝදරගම හමුවේ නඩුව කැඳවූ අවස්ථාවේදී, නියෝජ්‍ය සොලිසිටර් ජනරාල් ජනක බණ්ඩාර අධිකරණයට පෙන්වා දුන්නේ මෙම සිදුවීමෙන් රජයට එල්ල වූ ආර්ථික හා මූල්‍යමය බලපෑම සුළුපටු නොවන බවයි.

බෲනායි සමාගම 5 වැනි සැකකරු වෙයි

විමර්ශන උදෘත පරීක්ෂා කළ නීතිපතිවරයාගේ උපදෙස් මත, බෲනායි රාජ්‍යයේ ලියාපදිංචි කර ඇති 'බිස් සොලියුෂන්' (Biz Solution) සමාගම මෙම නඩුකරයේ 5 වැනි සැකකරු ලෙස නම් කෙරිණි. එම සමාගමේ අධ්‍යක්ෂවරිය ලෙස කටයුතු කර ඇත්තේ නඩුවේ දෙවැනි සැකකාරිය වන ප්‍රියංකා නියෝමාලි විජේනායක බව වාර්තා විය.

අල්ලස් පනත සහ මුදල් විශුද්ධිකරණ පනත යන ද්විත්වයම යටතේ එකම අධිචෝදනා පත්‍රයක් මඟින් විත්තිකරුවන්ට එරෙහිව චෝදනා ගොනු කිරීමට නීති කෙටුම්පත් සකස් කර අවසන් බව පැමිණිල්ල කියා සිටියේය. ඒ අනුව, අධිකරණ සංවිධාන පනතේ 12(අ)1(අ) වගන්තිය ප්‍රකාරව මෙම නඩුව විභාග කිරීමට ස්ථිර ත්‍රිපුද්ගල මහාධිකරණ විනිසුරු මඩුල්ලක් නම් කරන ලෙස අගවිනිසුරුවරයාගෙන් ඉල්ලීමක් කිරීමට පියවර ගෙන තිබේ.

මව්පියන්ගේ අසනීප තත්ත්වය සහ ඇප විවාදය

සැකකාර නාමල් රාජපක්ෂ වෙනුවෙන් පෙනී සිටි ජනාධිපති නීතිඥ ශවීන්ද්‍ර ප්‍රනාන්දු කරුණු දක්වමින්, විමර්ශන අවසන්ව තිබීම සහ සැකකරුගේ මව්පියන් දෙපළම මේ වන විට රෝහල්ගතව ප්‍රතිකාර ලබමින් සිටීම සුවිශේෂී තත්ත්වයක් සේ සලකා ඔහුට ඇප ලබාදෙන ලෙස ඉල්ලා සිටියේය.

කෙසේවෙතත් නියෝජ්‍ය සොලිසිටර් ජනරාල්වරයා ඊට විරෝධය පළ කරමින් අවධාරණය කළේ, ස්ථිර ත්‍රිපුද්ගල මහාධිකරණයක් හමුවේ නඩු පැවරීමට තීරණය කර ඇති අවස්ථාවක මහේස්ත්‍රාත් අධිකරණයට ඇප සලකා බැලීමේ හැකියාවක් නොමැති බවත්, ඒ පිළිබඳ තීන්දුවක් ගත යුත්තේ එම විනිසුරු මඩුල්ල පත්වීමෙන් පසුව බවත්ය.

මහේස්ත්‍රාත්වරයාගේ තීන්දුව

දෙපාර්ශ්වයේම තර්ක සලකා බැලූ ප්‍රධාන මහේස්ත්‍රාත්වරයා නාමල් රාජපක්ෂගේ ඇප අයදුම ප්‍රතික්ෂේප කරමින් නියෝග කළේ ඔහුව ලබන ඔක්තෝබර් 27 වනදා දක්වා යළි රිමාන්ඩ් භාරයේ තබන ලෙසයි.

විමර්ශන අවසන් වීම හා නඩු පැවරීම අතර ප්‍රමාදයක් සිදු නොවන බැවින් එය ඇප සඳහා 'සුවිශේෂී කරුණක්' නොවන බව විනිසුරුවරයා සඳහන් කළේය.

මව්පියන්ගේ අසනීප තත්ත්වය තහවුරු කිරීමට කිසිදු වෛද්‍ය වාර්තාවක් හෝ නිල ලේඛනයක් අධිකරණයට ඉදිරිපත් කර නොතිබිණි.

සැකකරුට එරෙහිව නොපමාව අධිචෝදනා ගොනු කර ඒ බව මහේස්ත්‍රාත් අධිකරණයට වාර්තා කරන ලෙස අල්ලස් කොමිසමට නියෝග කෙරිණි.

නඩුකරය ත්‍රිපුද්ගල මහාධිකරණය හමුවට යන තෙක් කිසියම් සුවිශේෂී කරුණක් මතු වුවහොත් පමණක් නැවත මහේස්ත්‍රාත් අධිකරණයට ඇප ඉල්ලීමක් ඉදිරිපත් කළ හැකි බවත්, ඉන් අනතුරුව ඇප පිළිබඳ තීරණය සම්පූර්ණයෙන්ම ත්‍රිපුද්ගල මහාධිකරණය සතු වන බවත් අධිකරණය වැඩිදුරටත් පැහැදිලි කළේය.