ජනපති කාර්යාලය අසල රැඳී සිටින හිමිවරුන් ඉවත් කිරීමට පොලිස් සූදානමක්

ජනාධිපති ලේකම් කාර්යාලය අසල රැඳී සිටින භික්ෂූන් වහන්සේලා නිල ලිඛිත පිළිතුරක් ඉල්ලා සිටිද්දී, ජනාධිපති සමාව පිළිබඳ තීන්දු නීතිය හා ව්‍යවස්ථාවට අනුකූලව සිදුවන බව රජය පවසයි.


කොළඹ කොටුවේ රැය පහන් කළ පාගමන

පූජ්‍ය ගලගොඩඅත්තේ ඥානසාර හිමියන් නිදහස් කරන ලෙස බලකරමින් මහනුවරින් ඇරඹි 'නිදහසේ පාද යාත්‍රාව' ඊයේ පස්වරුවේ කොළඹ ජනාධිපති ලේකම් කාර්යාලය අභියසට ළඟා විය. උන්වහන්සේලා සිය ඉල්ලීම් ඇතුළත් ලිපි ලේඛන ජනාධිපති කාර්යාලයේ නිලධාරීන් වෙත භාරදීමට කටයුතු කළහ.

අදාළ ඉල්ලීම පිළිබඳ තීරණයක් දැනුම්දීමට මාසයක පමණ කාලයක් අවශ්‍ය බවට නිලධාරී පාර්ශ්වයෙන් දැනුම්දී තිබුණද, ඊට එකඟ නොවූ සංඝරත්නය නිශ්චිත දිනයක් සඳහන් නිල ලිඛිත ප්‍රකාශයක් ලැබෙන තුරු පරිශ්‍රයෙන් ඉවත් නොවන බව ප්‍රකාශ කරමින් එම ස්ථානයේම රැය පහන් කළහ.


නොසන්සුන්තාව සහ නීතිමය ක්‍රියාමාර්ග

අයහපත් කාලගුණය මධ්‍යයේ බුද්ධ ප්‍රතිමා වහන්සේ ආරක්ෂා කරගැනීම සඳහා තාවකාලික ආවරණයක් ඉදිකිරීමට උත්සාහ කළ අවස්ථාවේදී පොලිසිය සහ විරෝධතාකරුවන් අතර යම් නොසන්සුන් තත්ත්වයක් හටගත්තේය. පසුව එම ආවරණය පසෙකට ගෙන යාමට පියවර ගැණිනි.

අධි-ආරක්ෂිත කලාපයක සිදුවන මෙම රැඳී සිටීම හේතුවෙන් එම ප්‍රදේශයේ විශේෂ පොලිස් ආරක්ෂාවක් යොදවා තිබේ. මහජන පීඩාව සහ මාර්ග අවහිරතාව සැලකිල්ලට ගනිමින්, විරෝධතාවයේ නිරත පිරිස එම ස්ථානයෙන් ඉවත් කිරීම සඳහා අධිකරණ නියෝගයක් ලබාගැනීමට පොලිස් අංශ සූදානම් වන බවට වාර්තා පළවේ.


අග්‍රාමාත්‍යවරියගෙන් නීතියේ ආධිපත්‍යය පිළිබඳ මතක් කිරීමක්

මෙම සිදුවීම් මාලාව අතරතුර, මහනුවර මල්වතු-අස්ගිරි මහා නාහිමිවරුන් බැහැදුටු අග්‍රාමාත්‍ය ආචාර්ය හරිනි අමරසූරිය මාධ්‍ය වෙත අදහස් දක්වමින් අවධාරණය කළේ ජනාධිපති සමාව සම්බන්ධයෙන් වන ඕනෑම පියවරක් ව්‍යවස්ථාව සහ අධිකරණ ක්‍රියාවලියට යටත්ව තීන්දු විය යුතු බවයි.

අධිකරණය ලබාදුන් තීන්දුවක් හමුවේ විධායකය ක්‍රියාත්මක විය යුත්තේ නීතිමය උපදෙස් සහ සම්ප්‍රදායන්ට ගරු කරමින් බව පෙන්වා දුන් අග්‍රාමාත්‍යවරිය, රටේ යහපත හා ප්‍රජාතන්ත්‍රවාදී නීති රාමුව ආරක්ෂා කරමින් නිසි වේලාවට නිසි තීරණ ගැනීමට ජනාධිපතිවරයා බැඳී සිටින බව පැහැදිලි කළාය.