TIN අනිවාර්ය වන්නේ ගනුදෙනු අටකට පමණයි: පෝලිම් ගැසෙන්න එපා - කොමසාරිස් ජනරාල්

දේශීය ආදායම් දෙපාර්තමේන්තු කාර්යාල ඉදිරිපිට මේ දිනවල දැකිය හැකි දිගු පෝලිම් සහ ජනතා තෙරපීම පාලනය කරනු වස්, බදු බලධාරීන්ගෙන් විශේෂ නිවේදනයක් නිකුත් වී තිබේ.

නොවැම්බර් 01 දා සිට TIN සහතිකය ඉදිරිපත් කිරීම අනිවාර්ය වන්නේ නිශ්චිත ගනුදෙනු අටක් සඳහා පමණක් බව දේශීය ආදායම් කොමසාරිස් ජනරාල් රුක්දේවි ප්‍රනාන්දු පවසයි. එබැවින් හදිසි හෝ අත්‍යවශ්‍ය අවශ්‍යතාවක් නැති නම් කාර්යාල වෙත පැමිණ අපහසුතාවට පත් නොවන්නැයි ඇය මහජනතාවගෙන් ඉල්ලා සිටියි.

සහතිකය අනිවාර්ය වන ගනුදෙනු 8 මෙන්න

2026 අංක 11 දරන සංශෝධිත පනත ප්‍රකාරව වලංගු TIN සහතිකයක් ඉදිරිපත් කළ යුත්තේ පහත සඳහන් කටයුතුවලදී පමණි:  

1- බැංකුවක හෝ මූල්‍ය ආයතනයක නව ගිණුමක් විවෘත කිරීම.
2- ක්‍රෙඩිට් කාඩ්පතක් (Credit Card) ලබාගැනීම.
3- ගොඩනැගිලි සැලැස්මක් අනුමත කරගැනීම.
4- මෝටර් වාහනයක් ලියාපදිංචි කිරීම.
5- මෝටර් වාහන ආදායම් බලපත්‍රය අලුත් කිරීම.
6- ඉඩමක් හෝ ඉඩම් හිමිකම ලියාපදිංචි කිරීම.
7- ව්‍යාපාරයක් ලියාපදිංචි කිරීම.
8- සමාගමක කොටස් පැවරීම (මෙහිදී පැවරූ සහ ලබාගත් දෙපාර්ශ්වයම සහතිකය ලබාදිය යුතුය).

ඉහත කටයුතුවලින් බැහැර දෛනික ජීවිතයේ අනෙකුත් පොදු කටයුතුවලදී TIN සහතිකයක් ඉදිරිපත් කිරීම අනිවාර්ය නොවේ.

වයස 18 නීතිය සහ බදු ගෙවීම

දේශීය ආදායම් පනත සහ අතිවිශේෂ ගැසට් නිවේදන අනුව, වයස අවුරුදු 18 සම්පූර්ණ සියලු වාසික පුරවැසියන් TIN අංකයක් ලබාගත යුතුය.  

නමුත් TIN අංකයක් තිබූ පමණින් කෙනෙකු බදු ගෙවීමට බැඳී නොසිටියි. බදු අය වන්නේ නීතියෙන් නියම කර ඇති වාර්ෂික ආදායම් සීමාව ඉක්මවන පුද්ගලයින්ගෙන් පමණි. TIN අංකය යනු බදු ලිපිගොනුවක පුද්ගලයෙකු හඳුනාගැනීමේ අංකය හෙවත් හැඳුනුම්පතක් පමණි.

කාර්යාල නොගොස් නිවසේ සිටම TIN ගන්නා හැටි

අවශ්‍යතාව පවතින ඕනෑම අයෙකුට දේශීය ආදායම් දෙපාර්තමේන්තුවේ නිල ඊ-සේවාවන් (e-Services) වෙබ් පිවිසුම හරහා ඉතා පහසුවෙන් TIN අංකයක් ලබාගත හැකිය.  

තමන්ට දැනටමත් TIN අංකයක් නිකුත් කර ඇත්දැයි පරීක්ෂා කරගැනීමේ පහසුකම ද එම වෙබ් අඩවියේ පවතී. එසේ තහවුරු කරගැනීමෙන් පසු ජාතික හැඳුනුම්පත් (NIC) අංකය සහ TIN අංකය සහිතව ලබාගන්නා මුද්‍රිත පිටපත (Printout) ඉහත ගනුදෙනු අට සඳහා වලංගු ලියවිල්ලක් ලෙස පිළිගැනේ.

නීති වෙනස්වීම් හමුවේ කලබල නොවී, ඩිජිටල් ක්‍රමවේද භාවිත කරමින් නිවසේ සිටම මෙම සේවාවන් ලබාගන්නා ලෙස ආදායම් දෙපාර්තමේන්තුව ජනතාවට සිහිපත් කරයි.

යම් අයෙකු දැනටමත් TIN අංකයක් ලබා ගෙන නොමැතිනම් TIN අංකයක් ලබා ගැනීම සඳහා දේශීය ආදායම් දෙපාර්තමේන්තුවේ ඊ - සේවාව හරහා (Sri Lanka Inland Revenue) ඉල්ලුම් කළ හැකි බවද එම කොමසාරිස් ජනරාල්වරිය අවධාරණය කරයි.

(සටහන - ජේ . මුණසිංහ )


වැඩිදුර තොරතුරු සහ පසුබිම් මූලාශ්‍ර :

පුවතේ පසුබිම සහ බලපෑම :
The Leader News - නොවැම්බර් පළමුවැනිදා සිට ගනුදෙනු අටකට TIN අනිවාර්යයි

පැහැදිලි කිරීමේ නිල වීඩියෝව :
Inland Revenue Department Sri Lanka - TIN Registration Video Guide (දේශීය ආදායම් දෙපාර්තමේන්තුවේ නිල සිංහල මාර්ගෝපදේශය)